Jin xi testigole Jeobá maijin bʼenelaijin yaonajin nga kui mangíntjenngijin jmeni xi kitsoya je Jesús kʼoa kao jmeni xi kitjenngi je pastro. Je xi fisani kui kuitsoya kʼa josʼin makjainnajin.

1.   Niná. Tojékjoán bʼetsʼoalaijin je Niná xi kixi xi nʼio ngʼa tíjna, xi kisinda ngayeje xi tjín. Jeobá ʼmi jaʼaínle (Salmo 83:18; Apocalipsis 4:11). Jéní Ninále Abrahán, Moisés kao Jesús (Éxodo 3:6; 32:11; Juan 20:17).

2.   Biblia. Kʼoasʼin makjainnajin nga kui tjítʼa jmeni xi mele Niná nga katabe je chjota (Juan 17:17; 2 Timoteo 3:16). Jmeni xi makjainnajin yaa yʼangini je xi 66 libro tjínle Biblia, xi Antiguo Testamento kao Nuevo Testamento sʼin ʼyale. Je chjota xi tʼatsʼe relijión kotʼayason xi Jason BeDuhn ʼmi kui kinchja̱ni xi tʼatsʼe jebi kʼianga kʼoakitso nga je testigole Jeobá “ñaki yaa Biblia bʼangini jmeni xi makjainle kʼoa jmeni xi sʼín, nga tsín je síkʼantjaiyajinle”. a Ningalani makjainnajin ngayeje xi tso je Biblia, ali tsa tomajinkixijinnajin ngayeje jmeni xi tjítʼa. Nkjín én faʼaitʼa xi totjín xi tsoyanile, kʼoa kuinga tsín koa̱nsíni nga tokoa̱njinkixiná ngayeje jmeni xi tso (Apocalipsis 1:1).

3.   Jesús. Kui mangíntjenngijin je choa̱le Jesucristo kao jmeni xi tsakakóya, kʼoa ʼyaxkónníjin nga̱ jéní xi bʼasjentjainá kʼoa jéní ʼNdíle Niná (Mateo 20:28; Hechos 5:31). Jebi kui bakó nga chjotale Cristo maijin (Hechos 11:26). Ninga kʼoalani, je Biblia alikui kʼoatso nga je Jesús je Niná xi ngisasa tse nganʼio tjínle kʼoa nikuijinla bakóya xi tʼatsʼe Trinidad (Juan 14:28).

4.   Reino de Dios. Jngoo Chjotaxá xi ya ngʼajmi tíjna, ali tsa yajin jinni̱ma̱le chjotale Cristo tíjnajin. Kjoaʼaxin ngatsʼi chjotaxá sonʼnde kʼoa jé kʼoéjnayangajaole. Sitjoson jmeni xi tjínndajinle Niná xi tʼatsʼe Sonʼnde (Daniel 2:44; Mateo 6:9, 10). Jeme kʼoasʼin, nga̱ jetíbitjoson je én xi tongini kisʼetʼa ya Biblia kʼoa kui bakóná nga jenichxin fikjetʼa tiyoaa (2 Timoteo 3:1-5; Mateo 24:3-14). Jé Jesús séntítjonle je Chjotaxále Niná xi ya ngʼajmi tíjna. Kʼiaa tsakʼétsʼiakaoni nga tsakatéxoma nga nó 1914 (Apocalipsis 11:15).

5.   Kjoabitjontjai. Nga kʼoasʼin tsakʼéchjíntjainá Jesús, koaan ndaí kuiyolee je jée kao kjoabiya (Mateo 20:28; Hechos 4:12). Tonga tsa mená nga so̱koná kjoanda jebi tjínnele nga koa̱nkjainná xi tʼatsʼe Jesús, nga si̱kʼantjaiyaa josʼin timangínkoaa yaoná kʼoa nga cha̱nisʼenngindá yaoná (Mateo 28:19, 20, Traducción del Nuevo Mundo; Juan 3:16; Hechos 3:19, 20). Kao xáná bakoñá tsa ñaki makjainná (Santiago 2:24, 26). Tonga tokao “kjoandale Niná” nga so̱koniná je kjoabitjontjai, nga̱ niʼyajin xi bakinle nga tokjoatjao (Gálatas 2:16, 21).

6.   Ngʼajmi. Jeobá, Jesucristo kao ánkje xi kixi tjíofitʼale yaa tjío ya ngʼajmi (Salmo 103:19-21; Hechos 7:55). b Kʼoa tjíokʼa chjota xi ya ngʼajmi ni̱kjaʼáyale nga ya koatexomakao Jesús, kʼoa to 144,000 mani (Daniel 7:27; 2 Timoteo 2:12; Apocalipsis 5:9, 10; 14:1, 3).

7.   Sonʼnde. Kui xá kisindani Niná nga i̱ koatio chjota ngantsjai nichxin (Salmo 104:5; 115:16; Eclesiastés 1:4). Je Niná sichikontʼain je chjota xi sitjosonle, alikui tichʼin sʼe̱nile kʼoa koaan koatio ngantsjai nichxin i̱ Sonʼnde kʼianga jeʼndenaxó koa̱n (Salmo 37:11, 34).

8.   Kjoatsʼen kao kjoañʼai. Je Biblia kʼoatso nga jngo ánkje tíjna xi yátsʼi̱n tsakasénle Niná. Kʼiaa kisʼe je kjoatsʼen kao kjoañʼai (Juan 8:44). Ánkje jebi Na̱i kao Satanás sʼin tsaʼyale nga koanskanni, kʼoa tsakʼanachale je Adán kao Eva nga tosa je kitʼale. Nga kʼoakisʼin je Adán kao Eva nʼio tse kjoañʼai jaʼaikaone je ntje̱le (Génesis 3:1-6; Romanos 5:12). Kʼianga sʼe̱ndajin je kjoa xi tsakʼéjnabasen je Na̱i, je Niná títsjoáʼndee choatse nga tísʼe kjoatsʼen kao kjoañʼai. Tonga alikui tsjoáʼnde nga tokʼoakoa̱nntsjai.

9.   Kjoabiya. Kʼianga jngo chjota biya jngokʼa cha (Salmo 146:4; Eclesiastés 9:5, 10). Je ʼndíkʼien ali tsa kjoañʼaijin tjíofaʼá ya jña títi lʼí josʼin makjain kʼale chjota. Nʼio nkjín miyón xi kuisótjenni kʼianga sikjaʼáyale Niná (Hechos 24:15). Je xi kjoaʼáyanile sa̱kóyale jotjínni je kjoatéxomale Niná, tonga tsa tsín sitjoson ni̱kjesonní kʼoa nikʼiajinla tikoatiokonni (Apocalipsis 20:14, 15).

10.   Familia. Je Niná kʼoasʼin tsakʼéndajin nga je xi kjoabixan ʼmi kʼianí nga jngo chjoón jngo xʼin xi bixankao xínkjín. Kʼoa tokʼianí nga ma xijnda je xo̱n kjoabixan kʼiatsa ʼya xi kasíchajngitʼale xínkjín (Mateo 19:4-9). Ñaki kʼoatjío tokuinjin nga nʼio ndatjín je kjoafaʼaitsjen xi faʼaitʼa ya Biblia kʼoa nga binyakao je familia nga ndasʼin batio (Efesios 5:22–6:1).

11.   Josʼin ʼyaxkuínjin Niná. Likui kro bʼetsʼoalaijin kʼoa kao xi kjaʼaísa xkóson (Deuteronomio 4:15-19; 1 Juan 5:21). Kui kʼa jebi josʼin ʼyaxkuínjin je Niná:

    •   Bʼetsʼoalaijin je Niná (Filipenses 4:6).

    •   Bʼexkianíjin kʼoa chotʼayaníjin je Biblia (Salmo 1:1-3).

    •   Nikjaʼaitsjenjinníjin jmeni xi bʼexkiaijin ya Biblia (Salmo 77:12).

    •   Kʼianga biyojtínjin, bʼetsʼoaníjin, Biblia chotʼayaijin, jndaníjin, bʼainíjin énnajin kʼoa ninʼiojinngañáníjin xíngijin (Colosenses 3:16; Hebreos 10:23-25).

    •   ʼMiyasonníjin je énnda chjotse xi tʼatsʼe Chjotaxále Niná (Mateo 24:14).

    •   Binyakaoníjin je xi nganʼio machjénle (Santiago 2:14-17).

    •   Bʼendaníjin kʼoa nikuindaníjin je Ndʼia jña biyojtínjin kʼoa kao xi kjaʼaí ndʼia xi tinichjainjin nga tibakoyaijin je Énle Niná jngo tjíjtsa Sonʼnde (Salmo 127:1).

    •   Bʼainganʼioníjin jñani kjoaxkón sʼe (Hechos 11:27-30).

12.   Josʼin tiyojtínjin. Nʼio nkjín jtín tjíonajin jñani mañaijin. Kʼoa je xi síkuinda nga jngó jngó jtín chjotajchínga ʼmile. Tonga ali tsa ngʼajko̱jin sʼin tjío kʼoa ali tsa machjíjinle (Mateo 10:8; 23:8). Likui diezmo bʼaijin kʼoa ni tao̱njinla sʼeña jñani biyojtínjin (2 Corintios 9:7). Je tao̱n xi machjén nga tinikʼabísuinjin je Énle Niná kui xi tsjoá je xíngiaa jotjín nroajin ni̱ma̱le kʼoa alikui jaʼaínle bʼaxki̱.

     Kʼoa jngo jtín mani chjotale Cristo xi nʼio tjínle kjoafaʼaitsjen xi Cuerpo Gobernante ʼmi xi tjíobándiaale ngatsʼi je testigole Jeobá, kʼoa jtín jebi yaa tíjna jña tjen tísʼendiaanile je xále Niná jngo tjíjtsa Sonʼnde (Mateo 24:45).

13.   Jtín tiyuijin. Tojñani tsainjin kʼoa tojñani tiyuijin ngóson sʼin makjainnajin ngatsʼijin (1 Corintios 1:10). Bʼenelaijin yaonajin nga tsínkui mangínnijin josʼin tjíosíjchá yaole xi ngikʼa, josʼin tsen yaole, jotso je én xi nchja̱ kʼoa jñani tsʼe (Hechos 10:34, 35; Santiago 2:4). Ningalani jtín tiyuijin, nga jngó jngóníjin nga chjoéjinjin jmeni xi nʼiaijin kʼoa kui mangíntjenngijin jmeni xi tso je Biblia.

14.   Josʼin mangínkoaijin yaonajin. Tojmeni xi nʼiaijin bʼenelaijin yaonajin nga bakuijin kjoatsjoacha (Juan 13:34, 35). Alikui kui kʼoanʼiaijin jmeni xi tsín sasénle Niná. Kuinga tsín kjaʼaísʼin nichjénnijin je njín, jolani nga tsín bʼaiʼndaijin nga kui xinyánajin (Hechos 15:28, 29; Gálatas 5:19-21). Nyʼán sʼin tinijcháijin yaonajin kʼoa alikui kjoajchán mangínjinjin (Mateo 5:9; Isaías 2:4). ʼYaxkónníjin je chjotaxá kʼoa nitjosonníjin je kjoatéxoma xi bʼasje kʼiatsa tsín kontra tíjnale jotso je kjoatéxomale Niná (Mateo 22:21; Hechos 5:29).

15.   Josʼin mangínkoaijin xi ngikʼa. Je Jesús i kitso: “Tsjoacha katamai je xíngi josʼin nga tsjoachai je yaoli”. Kʼoa kʼoakitso nga je chjotale “ali tsʼe sonʼndejin” (Mateo 22:39; Juan 17:16). Ningalani tsín ya nojinjin yaonajin je kjoa polítika kʼoa ni yajinla nijngokoaijin yaonajin je relijión xi kjaʼaí, bʼenelaijin yaonajin nga nda nikoaijin ngatsʼi chjota (Gálatas 6:10; 2 Corintios 6:14). Kʼoati ʼyaxkuínjin nga jngó jngó chjota nga tiʼndele nga tsen skoéjin jmeni xi sʼin xi tʼatsʼe jebi (Romanos 14:12).

 Kʼiatsa jmesani xi meli jchai xi tʼatsʼe josʼin makjainnajin xi testigole Jeobá maijin, i koa̱nsjaitʼasali i̱ pájina jebi xi tsʼe Internet. Kʼoati koa̱n chjílai jngo oficina xi tjíonajin, koaan kʼuín je kjoajtín xi satíonajin ya Ndʼia jña chotʼayaijin xi chrian koa̱nli, kʼoa tsa maije̱ koaan tosa jesoa chjónangilai jngo testigole Jeobá.