Nyasaye Nigi Nyinge Adi?

TUGE

Dwoko ma Muma chiwo

Nyasaye nigi nying achiel kende. Indike ni יהוה e dho Hibrania kendo iluonge ni “Jehova” e Dholuo. * Kokalo kuom janabi Isaya, Nyasaye nowacho kama: “An Jehova. Mano e nyinga.” (Isaya 42:8) Nyingno yudore nyadi 7,000 kama e kitepe machon mag Muma. Oyudore ding’eny moloyo “Nyasaye” kata nying ng’ato ng’ata. *

Be Jehova nigi nyinge mamoko?

Kata obedo ni Muma nyiso ni Nyasaye nigi nying achiel, onyiso ni en gi nyinge mamoko mag telo kata mipakego. Nyinge mag pak kata mag telogo nyisowa kido mag Jehova.

Nying mar telo	Ndiko	Tiende
*Allah*	(Onge)	“Allah” en nying mowuok e dho Arab kendo ok en nying Nyasaye. Kata kamano, en nying mar telo ma tiende en “Nyasaye.” Mumbni molok e dho Arab kod dhok mamoko tiyo gi “Allah” kar “Nyasaye.”
Manyalo Duto	Chakruok 17:1	En gi teko mokalo apima. ʼEl Shad·daiʹ, tiende en “Nyasaye Manyalo Duto”. Oyudore nyadibiriyo e Muma.
Alfa kendo Omega	Fweny 1:8; 21:6; 22:13	Tiende en “chakruok kendo giko.” Onge Nyasaye Manyalo Duto ma osegabetie mak mana Jehova, kendo onge ma biro betie bang’e. (Isaya 43:10) E dho Grik, alfa en nyukta mokwongo to omega en nyukta mogik.
Ng’at ma Hike Ng’eny	Daniel 7:9, 13, 22	Oonge gi chakruok; osebedoe kuom higni duto kata ka pok ng’ato ang’ata kata gimoro amora obetie.—Zaburi 90:2.
Jachuech	Isaya 40:28	En e ma nochueyo gik moko duto.
Wuonwa	Mathayo 6:9	En e ma ochiwo ngima.
Nyasaye	Chakruok 1:1	Jal monego olam, en ema en gi teko duto. ʼElo·himʹ ma en dho Hibrania wuoyo kuom gik mang’eny ma nyiso duong’, teko, kod nyalo ma Jehova nigo.
Nyasach nyiseche	Rapar mar Chik 10:17	En kende e Nyasaye monego olam, kar lamo “nyiseche manono” ma jomoko lamo.—Isaya 2:8.
Japuonj Maduong’	Isaya 30:20, 21	Omiyowa puonj mabeyo kendo otayowa e yo mowinjore.—Isaya 48:17, 18.
Jachuech Maduong’	Zaburi 149:2	En e ma nochueyo gik moko duto.—Fweny 4:11.
Nyasaye mamor	1 Timotheo 1:11	Omor kinde duto.—Zaburi 104:31.
Jawinj lamo	Zaburi 65:2	Owinjowa sama walemo ka wan gi yie.
An Mantie	Wuok 3:14, The Bible in Luo, 1968	Onyalo bedo gimoro amora ma dwarore mondo ochop dwache. Wachno bende inyalo lok ni “Anabed Gima Ayiero” kata “Anabed Gima Adwaro Bedo.” (The Emphasised Bible, ma nondik gi J. B. Rotherham; New World Translation) Wechego konyowa lero tiend nying Jehova ma onyiswa e Wuok 3:15.
Janyiego	Wuok 34:14, The Bible in Luo, 1968	Ok odwar ng’at ma piem kode. Odwaro ni en kende e ma olame.
Ruoth mochwere	Fweny 15:3	Lochne onge chakruok gi gikone.
Ruoth	Zaburi 135:5	Wuon gimoro; E dho Hibrania en ʼA·dhohnʹ kata ʼAdho·nimʹ.
Nyasach oganda lweny	Isaya 1:9; Jo-Rumi 9:29	En e jatend malaike ma gin oganda lweny manie polo.
Jal Mamalo Chutho	Zaburi 47:2	En ema en gi telo maduong’ moloyo ng’ato ang’ata.
Ng’at Maler Moloyo	Ngeche 9:10	En e ma oler (timbene ler) moloyo gimoro amora.
Jachue-Agulni	Isaya 64:8	En e ma en gi teko e wi dhano kod pinje mana kaka jachue-agulni nigi teko kuom lowo motiyogo.—Jo-Rumi 9:20, 21.
Jawar	Isaya 41:14	Owaro dhano kata nyiewogi kogologi e tuech mar richo kod tho kokalo kuom misango mar Yesu Kristo.—Johana 3:16.
Lwanda	Zaburi 18:2, 46	En e kar buok kendo oresowa.
Jakwath	Zaburi 23:1	Orito jotichne maber.
Wuon Loch Duto	Chakruok 15:2	Loch duto ni e lwete; dho Hibrania en ʼAdho·naiʹ.

Kuonde ma niluongo gi nying Nyasaye e Ndiko mag dho Hibrania

Nitie kuonde moko ma niluongo gi nying Nyasaye. Kata kamano, mano ok nyis ni mago gin nyinge Nyasaye.

Nying kamoro	Ndiko	Tiende
Jehova-jire	Chakruok 22:13, 14	“Jehova Biro Chiwo.”
Jehova-nissi	Wuok 17:15	“Jehova en Siro mar Bandecha.” Jehova Nyasaye ni machiegni gi joge kendo onyalo timo gimoro amora mondo oritgi kendo okonygi.—Wuok 17:13-16.
Jehova-shalom	Wuok 6:23, 24	“Jehova En Kuwe.”
Jehova-shamma	Ezekiel 48:35, weche moler piny, American Standard Version	“Jehova ni Kanyo.”

Gimomiyo onego wang’e nying Nyasaye kendo tiyo kode

Nyasaye ogeno nyinge ma Jehova, to mano e momiyo ne okete nyading’eny e Muma .—Malaki 1:11.5
Yesu ma en wuod Nyasaye nolero nyading’eny gimomiyo onego wati gi nying Nyasaye. Kuom ranyisi, ne onyiso Jehova kama: “Nyingi mondo obed maler.”—Mathayo 6:9; Johana 17:6.
Ng’eyo nying Nyasaye kendo tiyo kode en okang’ mokwongo mar loso osiep kode. (Zaburi 9:10; Malaki 3:16) Osiep ma kamano nyalo miyo ng’ato oyud gueth ma Nyasaye osingo e Zaburi 91:14 ma wacho niya: “Abiro rese nikech ohera. Abiro rite nikech ong’eyo nyinga.”
Muma wacho kama: “Nitiere gik ma ji luongo ni nyiseche, bed ni gin e polo kata e piny, mana kaka adier nitie nyiseche mang’eny kod ruodhi mang’eny.” (1 Jo-Korintho 8:5, 6) Kata kamano, olero ni nitie Nyasaye achiel kende mar adier ma en Jehova.—Zaburi 83:18.

^ par. 1 Josomo moko mag dho Hibrania ohero tiyo gi “Yahweh” kaka nying Nyasaye.

^ par. 1 Nying Jehova koket e yo machuok en “Jah” kata “Yah.” Oyudore nyadi 50 kama e Muma kendo kwanno oriwo kama otiye kode kaka “Haleluya,” kata “Alleluia,” ma tiende en ni “Pakuru Jah.”—Fweny 19:1; The Bible in Luo 1968; King James Version.