Injili mar Johana 17:1-26
17 Bang’ ka Yesu nosewacho wechego, noting’o wang’e e polo mowacho kama: “Wuora, sa osechopo, koro mi wuodi duong’ mondo wuodi omiyi duong’+
2 mana kaka isemiye teko e wi ji duto,+ eka ochiw ngima ma nyaka chieng’+ ne jogo duto ma isemiye.+
3 Ka ng’ato ong’eyi, in Nyasaye makende mar adier+ kod jal ma ne ioro Yesu Kristo,+ to en gi ngima ma nyaka chieng’.+
4 Asemiyi duong’ e piny,+ nimar asetieko tich ma nimiya mondo atim.+
5 Omiyo, koro Wuora, miya duong’ e bathi, duong’ ma chal gi ma ne an-go e bathi ka ne piny pok obetie.+
6 “Asemiyo nyingi ong’ere ne jo ma ne imiya e piny.+ Ne gin meki, to ne imiyagi, kendo giserito wachni.
7 Koro giseng’eyo ni gik moko duto ma ne imiya noa kuomi;
8 nikech asenyisogi weche ma ne imiya,+ mi girwakogi, kendo adier giseng’eyo ni ne abiro e loyi+ kendo giseyie ni niora.+
9 Akwayo nikech gin; ok akwa ne piny, to akwayo nikech jogo misemiya, nimar gin jogi;
10 kendo giga duto gin magi to meki gin maga;+ bende, aseyudo duong’ e diergi.
11 “Koro ok an e piny, to gin, gin e piny,+ an to abiro iri. Wuora Maler, ritgi+ nikech nyingi misemiya, mondo gibed achiel* mana kaka wan kodi wan achiel.*+
12 Ka ne an kodgi, ne aritogi+ nikech nyingi ma isemiya; kendo aseritogi maber, mi onge kata achiel kuomgi moselal+ mak mana wuod kethruok,+ mondo weche manie Ndiko ochopi.+
13 To koro abiro iri, kendo awacho wechegi e piny mondo gibed gi morna mogundho.+
14 Asemiyogi wachni, to piny osin kodgi, nikech ok gin mag piny,+ mana kaka an ok an mar piny.
15 “Ok akwayi ni mondo igolgi e piny, to mondo iritgi nikech ng’at marach.+
16 Ok gin mag piny,+ mana kaka an ok an mar piny.+
17 Pwodhgi* gi adiera;+ wachni en adiera.+
18 Mana kaka niora e piny, an bende aorogi e piny.+
19 Asiko ka apwodhora nikech gin, mondo gin bende opwodhgi gi adiera.
20 “Ok akwa ne jogi kende, to bende ne jo ma keto yie kuoma kokalo kuom wachgi,
21 mondo eka giduto gibed achiel,+ mana kaka in, Wuora, in e winjruok achiel koda, kendo an e winjruok achiel kodi,+ mondo gin bende gibed e winjruok achiel kodwa, eka piny oyie ni ne iora.
22 Asemiyogi duong’ ma isemiya mondo eka gibed achiel mana kaka wan kodi wan achiel.+
23 Mondo abed e winjruok achiel kodgi, kendo ibed e winjruok achiel koda, eka mondo gibed e achiel chuth,* mondo piny ong’e ni ne iora kendo ni ne iherogi mana kaka ne ihera.
24 Wuora, akwayi ni jo ma isemiya obed ka ma antieree,+ mondo gine duong’ misemiya, nimar ne ihera ka piny pok obetie.+
25 Wuora makare, adier piny pok ong’eyi,+ to aseng’eyi+ kendo jogi oseng’eyo ni ne iora.
26 Asemiyo ging’eyo nyingi kendo abiro miyo nyingi omed ng’ere,+ mondo eka hera ma ne iherago obed kuomgi, kendo abed e winjruok achiel kodgi.”+
Weche Moler Piny
^ Kata, “e winjruok.”
^ Kata, “e winjruok.”
^ Kata, “Walgi; Ketgi gibed maler.”
^ Kata, “gibed e winjruok achiel chuth.”
