KATHERINE nopon Amerka kendo ne obatise mobedo Janeno mar Jehova ka en jahigini 16. Ne ojalendo gi kinda mak mana ni ji ok ne rwak ahinya wach Pinyruoth e alwora ma nolendoe. Owacho kama: “Ne ajasomo weche moko e wi joma ne kwayo Nyasaye mondo Nyasaye oornegi ng’ato opuonjgi ging’eye. Nasegombo mondo an bende aromie gi ng’at ma kamano, to ok naromogo.”

Bang’ lendo kuom higini mang’eny e alworano, Katherine nochako bedo gi paro mar dar dhi e alwora machielo ma ji ne nyalo rwakoe wach Pinyruoth. Kata kamano, noparore kabe ne odhi nyalo. E ngimane duto, nosebedo mabor gi joodgi dichiel kende—to mana kuom jumbe ariyo—to kuom jumbe ariyogo nosiko ogombo mana dok dala. Kata kamano siso mar yudo mor kuom konyo jomoko ong’e Jehova nomiyo oloyo luoro ma ne en-go. Bang’ paro kuonde mopogore opogore ma nonyalo dhiye, nondiko ne ofis ma Guam, kendo ofisno nonyise weche duto ma nodwaro ng’eyo. E dwe mar Julai 2007, ka en jahigini 26, Katherine nodhi Saipan, ma en chula man e chuny Pacific Ocean, kilomita 10,000 kiwuok dalagi. Weche ne odhine nade kuno?

Mapiyo bang’ chopo e kanyakla manyien, Katherine noromo gi miyo moro miluongo ni Doris, ma jahigini 40 gi wiye moyie puonjore Muma. Bang’ puonjore sula adek mokwongo e bug Muma Puonjo, Katherine nochako parore. Owacho niya: “Doris ne en japuonjre Muma maber ahinya, kendo ok nadwar kethone kata matin. Ne pok apuonjoraga gi ng’ato maok wabare kendo nachako paro ni Doris ne dwarore oyud japuonj molony, ma samoro ne nyalo bedo kata mbasne.” Katherine nokwayo Jehova e lamo mondo okonye oyud nyaminwa machielo ma ne nyalo puonjore gi Doris. Kae to nochano mondo onyis Doris ni ne odhi miye japuonj machielo.

Katherine wacho niya: “Kane pok anyise wachno, Doris nonyisa ni nodwaro wuoyo koda e wi wach moro ma ne chande. Bang’ winje, nanyise kaka Jehova nosekonya nyagora gi chandruok machalo gi ma ne en-gono. Nodwokona erokamano.” Kae to Doris nonyiso Katherine niya: “Jehova tiyo kodi mondo ikonya. E odiechieng’ ma nihango lima, nasebedo kasomo Muma kuom seche mogwaro. Noyudo aywak ka akwayo Nyasaye oorna ng’ato mondo  okonya winjo tiend weche manie Muma. Kae to ema ne idwong’oe dhooda. Jehova nodwoko kwayona!” Pi wang’ Katherine ne rengni seche ma nopimo wechegi. Katherine wacho kama: “Weche ma Doris nowachogo ne gin dwoko mag kwayona. Jehova nokonya ng’eyo ni kare onego adhi nyime puonjora kode.”

Ne obatis Doris e higa 2010, kendo sani otayo jopuonjre mag Muma mogwaro. Katherine wacho niya: “Mano kaka amor ni gombo ma nasebedogo kuom kinde malach mar konyo ng’ato oti ne Jehova nochopo adier!” Sani, Katherine mor ahinya tiyo ka en painia makende e chula miluongo ni Kosrae manie Pacific Ocean.

Owete gi nyimine mokalo mia achiel (ma hikgi nie kind 19 gi 79) osebedo kalendo e alwora ma jolendo dwaroree ahinya e piny Micronesia. Erica, ma nodhi e piny Guam e higa 2006 ka ojahigini 19 nyiso kaka owete gi nyiminegi winjo e chunygi. Owacho niya: “Timo tij painia e alwora ma ji nigi riyo mar winjo adiera en mor lilo. Adwoko ne Jehova erokamano ahinya nikech nokonya mondo atine e yo machalo kama. Ma e ngima maberie moloyo!” Gie sani, Erica mor tiyo ne Nyasaye ka en painia makende e chula mar Ebeye ma en achiel kuom chulini mag Marshall. En adier ni dhi lendo e pinje mamoko bende nigi pek ma mage. We wane ane adek kuom pekgo kod kaka joma ne odhi Micronesia ne onyagore kodgi.

Kit ngima ji. Bang’ chopo e chula mar Palau e higa 2007, Simon ma ne jahigini 22 nofwenyo mapiyo ni pesa ma ne ichule kotiyo Palau ne tin ahinya kopimo gi ma ne ichule thurgi England. Owacho kama: “Nochuna dwoko bajeda piny mondo kik anyiew gik moko duto ma ne adwaro. Sani ayiero ahinya chiemo ma anyiewo, kendo arango nengo gik moko kuonde mopogore opogore kapok anyiepo. Kapo ni nitie gimoro matin mokethore, amanyo machalo kode mar secondhand kae to amanyo ng’at manyalo konya wilo gino.” Lokruok mar bedo gi ngima mayotno nokonye nade? Simon wacho kama: “Mano nokonya ng’eyo gik mochuno e ngima koda kaka anyalo dak gi gik manok. Aseneno kaka Jehova osekonya nyading’eny e yore mopogore opogore. Kuom higini abiriyo masebedo kalendogo kae, kinde duto asebedo gi gima achamo kod kama aninde.” Kuom adier, Jehova rito jogo mayie dak e ngima mayot nikech gidwaro keto wach Pinyruoth obed mokwongo.—Math. 6:32, 33.

Gombo pacho. Erica wacho kama: “Wan waherore ahinya gi joodwa kendo ne aparo ni bedo mabor kodgi ne dhi miyo kik abed gi nyak e tija mar lendo.” Notimo ang’o mondo oikre nyagore gi pekno? “Kapok adar, noyudo asesomo gasede mag Ohinga mar Jarito mawuoyo e wi wach gombo pacho. Mano noiko chunya mondo abi anyagra gi pekno. E achiel kuom  sulago, miyo moro nojiwo nyare ong’e kaka Jehova rito joge konyise niya, ‘Jehova nyalo riti maber moloyo kaka anyalo riti.’ Wachno nojiwo chunya ahinya.” Patrick gi chiege miluongo ni Hannah lendo Majuro mayudore e chulni mag Marshall. Hannah nyagore gi pekno kuom bedo machiegni gi owete gi nyimine ma gin-go e kanyakla. Owacho niya: “Kinde duto adwoko ne Jehova erokamano kuom miyowa riwruok mar owete e piny mangima nikech gin bende gin joodwa. Dine bed ni ok giriwa lwedo, ok apar ka dine adhi nyime lendo kuonde ma jolendo dwaroree.”

Bedo gi osiepe. Simon wacho kama: “Sama idhi e piny machielo, iyudo ka chiegni gimoro amora opogore. Seche moko awinjoga ka tekna ngero jomoko ma giwinj tiend ngeranano.” Erica wacho niya: “Ka nakwongo biro, najawinjo ka gima obuona nikech naonge osiepe. Kata kamano mano nokonya paro matut gimomiyo ne adhi kuno. Ne ok adhi kuno mondo ayud ber ma maga awuon, to ne adhi tiyo ne Jehova.” Omedo wacho niya: “Bang’ ndalo, nabedo gi osiepe mabeyo ahinya.” Simon notimo matek mondo ong’e dho-Palau, to mano nokonye ‘yawo chunye’ ne owete gi nyimine ma ne wacho dhokno. (2 Kor. 6:13) Kinda ma notimo mar puonjore dhokno nomiyo owete ohere ahinya. Kuom adier, sama owete moa e pinje mamoko tiyo kanyachiel gi owete manie alwora ma gidhiyeno, giduto giyudo gueth mar bedo osiepe mati mata e kanyakla. Gin gueth mage mamoko ma jogo machiwore dhi lendo e alwora ma jolendo dwaroree yudo?

Jaote Paulo nowacho kama: “Ng’a ma chwoyo mathoth noka mathoth.” (2 Kor. 9:6) Puonjni nyalo tiyo ahinya kuom jogo mamedo tiyo gi thuologi e tij lendo. Gin ber mage “mathoth” ma gikayo Micronesia?

E piny Micronesia, nitie thuolo mang’eny mag chako puonjruok Muma gi ji kendo neno kaka jogo tiyo gi adiera ma gipuonjore e Wach Nyasaye e timo dongruok e winjruokgi gi Nyasaye. Patrick gi Hannah bende nolendo e chula moro matin miluongo ni Angaur, ma nigi ji 320 kende. Bang’ lendo kanyo kuom dweche ariyo, ne giromo gi miyo moro ma en janyuol achiel. Nochako puonjore Muma mapiyo kendo rwako adiera gi chunye duto, kae to otimo lokruok madongo e ngimane. Hannah wacho kama: “Bang’ puonjruok ka puonjruok, sama ne wan e wi ndiga ka wadok pacho, ne wajong’iyore gi chwora kae to wawacho niya: ‘Erokamano Jehova!’” Hannah medo wacho niya: “Ang’eyo ni Jehova ne nyaka ti gi yo moro amora mondo oywago miyoni ire. Kata kamano, bedo ni ne wachiwore tiyo kama jolendo dwarore ahinya nomiyo wayudo miyoni ma wakonye mondo ong’e Jehova. Mani en achiel kuom gik mabeyo mosetimorenwa e ngimawa duto!” Mana kaka Erica wacho, “Sama ikonyo ng’ato mong’eyo Jehova, iyudo mor mogundho maok nyal pim!”

E pinje mang’eny, pod jolendo mag wach Pinyruoth dwarore ahinya. Be inyalo bedo achiel kuom joma nyalo dhi lendo kuondego? Kwa Jehova e lamo mondo okonyi ibed gi siso mar lendo e okang’ momedore. Wuo e wi wachno gi jodong-kanyakla, jarit-alwora kaachiel gi jogo ma ne osebedo gi thuolo mar dhi e pinje ma jolendo ne dwaroree. Sama ichako timo ikruok, ndik ne ofis matayo tij lendo e alworano, kendo ipenjgi weche momedore. * Samoro in bende inyalo bedo e kwan mar owete gi nyimine tara gi tara—joma tindo gi joma dongo, mosedonjo e kend gi mapodi—machiwore maonge achune mondo iyud mor mayudore kuom ‘keyo mathoth.’