Etu Vinjiho jaYehova, tweji kuzatanga nangolo hakukavangiza jishimbi jaVaka-Kulishitu jize Yesu anangwile vaposetolo jenyi. Shikaho chihande chino chinalumbununa mukavatu vyuma twafwelela.

1.   Kalunga. Tweji kulemesanga Kalunga wamuchano ou Wangolo Josena, kaha nawa Tengi ou atwama nalijina Yehova. (Samu 83:18; Kusoloka 4:11) Ikiye Kalunga kaApalahama, naMose, naYesu.—Kulovoka 3:6; 32:11; Yowano 20:17.

2.   Mbimbiliya. Twamona Mbimbiliya kupwa Mazu aKalunga ahwima aze ahana vatu. (Yowano 17:17; WaChimoteu 2, 3:16) Twafwelela vyuma vyatwama mumikanda yosena 66 yize yatwama “muTesetamende Yamwaka” “namuTesetamende Yayihya.” Mutu alinangula chikuma Jason D. BeDuhn alumbunwine muchano hali Vinjiho jaYehova hakuhanjika ngwenyi: “Vyuma vafwelela navilinga vyavo vyapendamina havyuma veji kulinangulanga muMbimbiliya chakuzeneka kulisakwila vavene vyakulinga.” a

    Etu katwakaluhwisa jishimbiko oloze twetavila vyuma vyosena vize yanangula Mbimbiliya. Twatachikiza ngwetu mikanda yimwe yamuMbimbiliya vayisoneka muvishimo chipwe kuzachisa vifwanyisa. Ngocho katwatela kumbata ulumbunwiso walizu hilizuko.—Kusoloka 1:1.

3.   Yesu. Tweji kukavangizanga vyuma anangwilenga Yesu nachakutalilaho chenyi, nakufwelela ngwetu ikiye Mulwilo kaha nawa MwanaKalunga. (Mateu 20:28; Vilinga 5:31) Shikaho twapwa tuvaka-Kulishitu. (Vilinga 11:26) Twalinangula muMbimbiliya ngwetu Yesu kapwa Kalunga Wangolo Josenako, kaha nawa kavavulukamo kunangula chaTulunga Vatatuko.—Yowano 14:28.

4.   Wangana waKalunga. Wangana waKalunga wapwa hifulumende yamwilu, ngocho kawatwama mumichima yavaka-Kulishituko. Naukashisa mawangana avatu nakukatesamo vyuma ajina Kalunga hano hamavu. (Ndanyele 2:44; Mateu 6:9, 10) Upolofweto wamuMbimbiliya wasolola nge tuli nakuyoyela ‘mumakumbi akukuminyina.’ Shikaho Wangana kana kalinwomu utesemo vyuma ajina Kalunga.—WaChimoteu 2, 3:1-5; Mateu 24:3-14.

    Yesu ikiye Mwangana waWangana waKalunga. Kaha aputukile kuyula mu 1914.—Kusoloka 11:15.

5.   Ulwilo. Navakatulwila kushili nakukufwa kuhichila mundando yakusokola yaYesu. (Mateu 20:28; Vilinga 4:12) Hakusaka vatu vanganyale kuwana kanou, kavatela kukumina hakufwelela Yesu kahako, oloze vatela nawa kwalumunako chiyoyelo chavo nakuvambapachisa. (Mateu 28:19, 20; Yowano 3:16; Vilinga 3:19, 20) Vyuma eji kulinganga mutu vyeji kumusolola numba nge ali nalufwelelo chipwe chiku. (WaYakova 2:24, 26) Chipwe ngocho, navakatulwila mwomwo ‘yalikoji lyalinene lyaKalunga’ keshi mwomwo yakusaka chetuko.—Wavaka-Ngalesha 2:16, 21.

6.   Mwilu. Yehova Kalunga, naYesu Kulishitu navangelo vakushishika vatwama mwilu muvene. b (Samu 103:19-21; Vilinga 7:55) Kaha vatu vavandende vakuheta ku 144,000, navakavasangula vakayoyele mwilu nakuyula hamwe naYesu muWangana.—Ndanyele 7:27; WaChimoteu 2, 2:12; Kusoloka 5:9, 10; 14:1, 3.

7.   Mavu. Kalunga atengele mavu mangana hatwamenga vatu haya myaka yosena. (Samu 104:5; 115:16; Muka-kwambulula 1:4) Kalunga mwakakisula vatu vakwononoka, nakukavalingisa vakapwe vakulikangula nakuyoya haya myaka yosena mupalachise hano hamavu.—Samu 37:11, 34.

8.   Upi nakuyanda. Vyaputukile omu kangelo umwe alikangile kuli Kalunga. (Yowano 8:44) Omu alikangile ou kangelo, vamuvulukilenga jino ngwavo “Satana” kaha nawa “Liyavolo.” Kaha ahungumwishile valunga napwevo vakulivanga navakiko valikange, echi chaneha ukalu waunene kuli vana vavo. (Kuputuka 3:1-6; Wavaka-Loma 5:12) Hakusaka mangana Kalunga akumise chihande akatwile Satana, netavisa kupwenga upi nakuyanda, oloze keshi kwechelela vitwaleho likako.

9.   Kufwa. Vatu vaze veji kufwanga, kavapwako chekako. (Samu 146:4; Muka-kwambulula 9:5, 10) Kaha kavavayekelesa mukakahya kaheloko.

    Kalunga mwakasangula vatu vavavulu vaze vafwa. (Vilinga 24:15) Chipwe ngocho, vaze navakakana kulinangula jishimbi jaKalunga hanyima yakuvasangula, navakavanongesa haya myaka yosena.—Kusoloka 20:14, 15.

10.   Tanga. Tweji kukavangizanga jishimbi jaKalunga jize jahanjika haulo ngwajo lunga atela kupwa napwevo umwe, kaha pwevo nawa atela kupwa nalunga umwe. Kaha ukoji ukiko unahase kulingisa valunga napwevo valilukulule. (Mateu 19:4-9) Twafwelela chikupu ngwetu mangana amuMbimbiliya akiko eji kukafwanga mutu afukile.—Wavaka-Efwesu 5:22–6:1.

11.   Kulemesa Kalunga. Katwazachisa kulusu chipwe kala tuponya hakulemesa Kalungako. (Lushimbi lwamuchivali 4:15-19; WaYowano 1, 5:21) Vyuma vyavilemu mukulemesa chetu shina:

    •   Kulomba kuli Kalunga.—Wavaka-Fwilipi 4:6.

    •   Kutanga nakulinangula Mbimbiliya.—Samu 1:1-3.

    •   Kushinganyeka havyuma tweji kulinangulanga muMbimbiliya.—Samu 77:12.

    •   Kulikungulwila hamwe nakulomba, nakulinangula Mbimbiliya, nakwimba, nakuhanjika vyuma twafwelela, nakukolezeza vakwetu vinjiho navatu veka.—Wavaka-Kolose 3:16; WavaHepeleu 10:23-25.

    •   Kwambulula “mujimbu wamwaza waWangana.”—Mateu 24:14.

    •   Kukafwa vaze vali muukalu.—WaYakova 2:14-17.

    •   Kutunga nakutungulula jiZuvo jaWangana navihela vyeka vyakuzachisa kumulimo wakunangula Mbimbiliya mukaye kosena.—Samu 127:1.

    •   Kwazana mumulimo wakukafwa vaze vali muukalu.—Vilinga 11:27-30.

12.   Liuka lyetu. Valongesa vikungulwilo, vize veji kutwaminyinanga kumazavu avakulwane. Chipwe ngocho, vakulwane kana kavatunga tumazavu twavo twakulihandununako, kaha nawa kavavafwetako. (Mateu 10:8; 23:8) Katwatambula vyakusokesa mumakumi chipwe kuhitamo nakutambula jimbongo nge tuli nakukungulukako. (Wavaka-Kolinde 2, 9:7) Mulimo wetu wosena veji kuukundwizanga namawana akulisakila.

     Lizavu lyaKutwaminyina lyapwa lizavu lyalindende lyavaka-Kulishitu vakuhya kushipilitu vahachikota chetu. Vatu kana vakiko veji kuhananga jindongi Vinjiho jaYehova mukaye kosena.—Mateu 24:45.

13.   Kulinunga. Twalinunga hakufwelela vyuma vyovimwe mukaye kosena. (Wavaka-Kolinde 1, 1:10) Kaha nawa tweji kuzatanga nangolo mangana tuhonesa vishinganyeka vyakulitala havikova namiyachi chipwe kulitala kumesoko. (Vilinga 10:34, 35; WaYakova 2:4) Chipwe ngocho, katwashinjila mutu alinge ngochoko. Chinjiho hichinjiho atela kulisakwila yivene vyakulinga, kweseka nachivezu chenyi vanangula naMbimbiliya.—Wavaka-Loma 14:1-4; WavaHepeleu 5:14.

14.   Vilinga vyetu. Tweji kufwilanga kusolola zangi muvyuma vyosena tweji kulinganga. (Yowano 13:34, 35) Tweji kulihendanga kuvyuma vize ahunga Kalunga, kuhakilako vene nakuzachisa manyinga mujila yakuhenga hakwitavila vatuhakewo. (Vilinga 15:28, 29; Wavaka-Ngalesha 5:19-21) Twapwa vakuunda ngocho katwazana mujitako. (Mateu 5:9; Isaya 2:4) Tweji kwononokanga jifulumende nakukavangiza jishimbi jamulifuchi twatwama chikalu kaha jishimbi kana kajeshi kutulingisa tulikange kujishimbi jaKalungako.—Mateu 22:21; Vilinga 5:29.

15.   Kulikata navakwetu. Yesu atulwezele ngwenyi: “Zangenunga vakwenu nganomu mwalizanga enu vavene.” Ambile nawa kuli vaka-kulishitu ngwenyi “kaveshi vakukayeko.” (Mateu 22:39; Yowano 17:16) Shikaho tweji kufwilanga ‘kulinga vyuma vyamwaza kuli vosena’ nakutwalaho lika kulihenda kuvihande vyamapolitiki nakuhona kulikata namauka eka akwitava. (Wavaka-Ngalesha 6:10; Wavaka-Kolinde 2, 6:14) Chipwe ngocho, twavumbika vyuma veji kusakulanga vatu kulinga kutalisa kuvyuma kana.—Wavaka-Loma 14:12.

 Kachi nge muli nakusaka kutachikiza vyavivulu kutalisa kuvyuma vafwelela Vinjiho jaYehova, kaha yenu hakeyala yetu mutange mijimbu yayivulu yahanjika hali etu, chipwe kutumina ofesi yetu yamutango, chipwe kuya nakukunguluka kuZuvo yaWangana yamungalila yenu, chipwe kuhulisa Chinjiho chaYehova wamungalila yenu.