Wangana waKalunga wapwa hifulumende yize vahakako kuli Yehova Kalunga. MuMbimbiliya “wangana waKalunga” vauvuluka nawa ngwavo “wangana wamelu” mwomwo weji kuyulilanga mwilu. (Mako 1:14, 15; Mateu 4:17 King James Version) Wangana waKalunga naukiko watwama navihela ngana muze japwa jifulumende javatu, oloze vihela vyawo vyapwa vyakulipwila chikuma.

•   Vaka-Kuyula. Kalunga atongola Yesu Kulishitu kupwa Mwangana waWangana wenyi, kaha nawa amuhana wata waunene kuhambakana vaka-kuyula vahano hamavu. (Mateu 28:18) Yesu eji kuzachisanga ngolo vamuhana mujila yamwaza mwomwo apwa Twamina wamwenemwene kaha nawa wakeke. (Mateu 4:23; Mako 1:40, 41; 6:31-34; Luka 7:11-17) Mwomwo yakumutwaminyina kuli Kalunga, Yesu asakula vatu vakufuma kumiyachi yosena vaze “navakapwanga vamyangana nakuyula mavu” hamwe naikiye mwilu.—Kusoloka 5:9, 10.

•   Lwola. Wangana waKalunga kawapwa ngana mwajifulumende javatu jize jeji kukumangako, ukiko ‘kaveshi kukaunongesako.’—Ndanyele 2:44.

•   Vatu Vayula kuWangana waKalunga. Weshowo eji kulinganga vyuma asaka Kalunga nahase kupwa mutu vayula kuWangana waKalunga chamokomoko nakuchisaka afuma nokwo asemukila.—Vilinga 10:34, 35.

•   Jishimbi. Jishimbi (chipwe jindongi) jaWangana waKalunga kajakanyisa kulinga vyuma vyavipi kahako, oloze jazata muvyuma vyavivulu. Jeji kukafwanga vatu vayula kuWangana waKalunga kupwa navilinga vyamwaza. Chakutalilaho, Mbimbiliya yahanjika ngwayo: “‘Zangenunga Yehova Kalunga kenu namichima yenu yosena, namyono yenu yosena, navishinganyeka vyenu vyosena.’ Elu lukiko lushimbi lwalulemu kaha nawa lukiko lwatete. Kaha lwamuchivali, lunalifwaneko, lukiko vene elu ngwavo: ‘Zangenunga vakwenu nganomu mwalizanga enu vavene.’” (Mateu 22:37-39) Kuzanga Kalunga navatu cheji kukafwanga vatu vayula kuWangana vahake vyuma vasaka vakwavo kulutwe keshi vize vasaka vakikoko.

•   Kunangula. Hakuwana nge Wangana waKalunga wahakako jishimbi, ngocho Kalunga asaka vatu vamuWangana vakavangize jishimbi jamuWangana kana.—Isaya 48:17, 18.

•   Vyuma Wafwila Kutesamo. Wangana waKalunga kawalingisa vatwamina jawo vahetele havatu vayula kuWangana kanako, oloze Wangana kana naukatesamo vyuma ajina Kalunga kuhakilako vene nalushiko navakalivwisa kuwaha lwakukayoyela mupalachise hano hamavu haya myaka yosena.—Isaya 35:1, 5, 6; Mateu 6:10; Kusoloka 21:1-4.