Mvua mukolele mu Puerto Limón, tshimenga tshidi ne dilobo kumpenga kua mâyi ku est kua Costa Rica. Baledi banyi bavua ne bana muanda mukulu, meme mvua wa muanda mutekete. Papa wakafua pamvua ne bidimu muanda mukulu. Nunku, maman wakatukolesha yeye nkayende.

Mvua munange bikole dinaya dia base-ball (dinaya dia kukupilangana kandundu). Mvua munange dinaya edi katshia ku buana. Mu bunsonga buanyi, ngakabuela mu tshisumbu tshia banayi bavua banaya anu bua tshianana. Patuvua tunaya ne bisumbu bikuabu bia banayi bavua banaya anu bua tshianana, pine apu nkavua ne bidimu bipite pa 20, muntu mukuabu uvua ukeba banayi bimpe wakandomba bua kubuela mu tshisumbu tshia banayi badibu bafuta tshia mu ditunga dia Nicaragua. Kadi tshikondo atshi, bu muvua maman usama ne meme muine mmulama, tshivua musue kusombela mu Nicaragua to. Nanku ngakabenga dilomba adi. Pashishe muntu mukuabu wakambikila bua kunaya mu tshisumbu tshia base-ball tshia ditunga tshia mu Costa Rica tshivua tshienza kudi banayi ba tshianana basungula. Musangu eu, meme kuitaba dilomba adi. Mvua munaye mu tshisumbu tshia manaya tshia ditunga etshi kumbukila mu 1949 too ne 1952, ne mvua munaye mu manaya a mu Cuba, mu Mexique, ne mu Nicaragua. Mvua munayi wa mu ditumba ne mvua nnaya bimpe, ngakanaya too ne manaya 17 tshinyi muenze kalema nansha kamue to. Mvua munange kumvua muvua misumba ya bantu itela dîna dianyi bua kutumbisha!

Diakabi, mvua kabidi ne nsombelu wa tshiendenda. Nansha mumvua ne muena dianyi wa bakaji anu umue, misangu ya bungi mvua ndonda bakaji bakuabu kabidi. Mvua nnua maluvu kabidi bikole. Dimue dituku meme kukuatshika bikole, kuenzabi bua ne: ntabuluke dituku diakalonda pa bulalu buanyi tshiyi mumanye kabidi mumvua mufike kumbelu to! Mvua kabidi nnaya manaya a domino a makuta ne loteri.

Pamvua meme mu nsombelu au, maman wakalua Ntemu wa Yehowa. Wakateta bua kungambila malu avuaye witabuja, kadi ku ntuadijilu kakakokesha to, bualu mvua mudifile bikole mu manaya. Meme muikale mu tshipalu tshia didibidija, dîba dia kudia tshivua ngumvua nansha nzala to! Lungenyi luanyi luonso  luvua lutuma anu ku dinaya edi. Mvua munange kunaya base-ball kupita tshintu kayi tshionso!

Kadi pamvua ne bidimu 29, ngakajiwuka bibi bia dikema pamvua nkeba kukuata ndundu utuvua tunaya. Pangakumvua bimpe, ngakalekela kunaya bu munayi udibu bafuta. Nansha nanku, ngakatungunuka ne dinaya dia base-ball, ngenda ndongesha tshisumbu tshia banayi ba tshianana pabuipi ne kuanyi.

Mu 1957, ngakitaba dibikila bua kubuela mu mpungilu uvua Bantemu ba Yehowa benza mu tshipalu tshimvua munayile base-ball. Pamvua musombe mu bantu, ngakadimuena dishilangana pankatshi pa kanemu kamvua mumone Bantemu naku ne tshimvundu tshimvua mmona mu bantu bavua babandila manaya a base-ball. Malu angakamona mu mpungilu au akansaka bua kutuadija kulonga Bible ne Bantemu ne kubuela mu bisangilu biabu.

Malongesha a bungi a mu Bible angakalonga akankemesha bikole. Tshilejilu, Yezu wakamba ne: mu matuku a ku nshikidilu, bayidi bende bavua ne bua kuyisha lumu luimpe lua Bukalenge bua Nzambi pa buloba bujima. (Matayi 24:14) Ngakalonga kabidi ne: bena Kristo balelela kabena benzela Nzambi mudimu bua kupeta makuta to. Yezu wakamba ne: “Nuvua bapete tshianana, nufile tshianana.”​—Matayi 10:8.

Pamvua ndonga Bible, mvua mfuanyikija tshidiye wamba ne tshimvua mmona munkatshi mua Bantemu ba Yehowa. Didifila diabu bua kuyisha lumu luimpe lua Bukalenge bua Nzambi pa buloba bujima divua dinsankisha bikole. Mvua mbamona ne lungenyi lua didifila luvua Yezu muambile bena Kristo bua kuleja. Nunku pangakabala Mâko 10:21, kumona dibikila dia Yezu dia ne: “Ulue, undonde,” ngakajinga bua kulua Ntemu.

Kadi biakangangata ndambu wa matuku bua kutungunuka ne muoyo mujima. Tshilejilu, munkatshi mua bidimu bia bungi, mvua nnaya loteri ne nimero yanyi ya dikasa dimpe lumingu luonso. Kadi ngakalonga mu Bible ne: Nzambi ki mmusue batendeledi ba ‘nzambi wa Dikasa Dimpe,’ ne bena lukuka kabidi. (Yeshaya 65:11; Kolosayi 3:5) Nanku ngakapangadija bua kulekela manaya a makuta. Dia Lumingu diakalonda dilekela dianyi dia kunaya loteri, nimero yanyi ya dikasa dimpe yakakuata! Bantu bakanseka bua mumvua tshiyi munaye lumingu alu, kungelabu mutoyi bikole bua nnaye kabidi, kadi tshiakanaya to. Tshitu munaye kabidi manaya a makuta nansha.

Ngakapeta kabidi diteta dikuabu dia ‘bumuntu buanyi bupiabupia’ dituku mene dimvua mubatijibue mu mpungilu wa Bantemu ba Yehowa. (Efeso 4:24) Dilolo adi, ngakapingana ku nzubu wa tshilala benyi kumvua, meme kusangana muena dianyi wa bakaji wa kale mungindile ku tshiibi. Kungambilaye ne: “Sammy wetu, tuanji tusankaku’s!” Kadi ngakamuandamuna diakamue ne: “Tòo!” Ngakamuvuluija ne: nkavua nnemeka mikenji ya bikadilu bilenga ya mu Bible. (1 Kolinto 6:18) Yeye kuamba ne: “Tshinyi?” Nunku wakadiombola tshidi Bible wamba bua tshiendenda tshia masandi ne wakasumisha bua tupingaje nende malanda etu. Kadi ngakabuela mu nzubu muanyi, meme kukanga tshiibi. Lelu eu, ndi ne disanka dia kuamba ne: katshia ngalua Ntemu mu 1958, ndi mulame ne lulamatu luonso mashintuluka angakenza mu nsombelu wanyi.

Ndi ngumvua anu bu ne: ndi mua kufunda mukanda mujima wa masanka andi mupete bua mundi mulonde buludiki bua mu Bible! Amue a ku masanka au adi ne: mpindieu ndi ne balunda balelela ba bungi, nsombelu wa nsongo menemene, ne disanka dia bushuwa.

Ntu anu musue kunaya base-ball, kadi ndi muakajilule mmuenenu wanyi bua malu andi ngangata ne mushinga. Mu dinaya dia base-ball, mvua mupete lumu ne makuta, kadi bionso ebi kabiakanenga to. Kadi malanda anyi ne Nzambi ne tshisumbu tshia bena Kristo tshindi nebishale kashidi. Bible udi wamba ne: “Buloba budi bupita ne majinga abu kabidi, kadi muntu udi wenza disua dia Nzambi, udi ushala kashidi.” (1 Yone 2:17) Mpindieu ndi munange Yehowa Nzambi ne bantu bende kupita tshintu kayi tshionso!