Dîku dietu divua disombele mu musoko wa tellancourt ku Nord-Est kua France. Tatuanyi uvua wa mu France, ne mamuanyi uvua wa mu Italie. Pamvua ne bidimu 8, tuakaya kusombela mu kamusoko kampanda ka bena mudimu bapele kavua pabuipi ne tshimenga tshia Rome mu Italie. Koku aku sombelu wakatukolela bikole. Baledi banyi bavua batandangana ne luonji luonso bua lutatu lua makuta.

Pangakakumbaja bidimu 15, mamuanyi wakansaka bua kumbuka ku nzubu ne kukeba balunda. Nunku ngakatuadija kumbuka ku nzubu bua matuku a bungi. Matuku makese, meme kudimona nkadi nsomba ne balunda babi. Dimue dituku, muntu mukuabu uvua umueneka muntu muimpe, wakalua kundi. Kumpeshaye diamba, meme kuangata bualu mvua musue kumueneka panyi muntu mukole. Diakamue bakambueja mu mulongo wa banu ba diamba ne bena tshiendenda. Misangu ya bungi bakenda nanyi masandi ku bukole. Muoyo kautshivua kabidi ne mushinga kundi to, ntshitshivua kabidi nkema bua kuikala ne muoyo anyi kufua to. Mvua mushikile ne ndimona nkaya. Pamvua ne bidimu 16, ngakateta bua kudishipa pangakanua mulangi wa wiski mujima ne kudiela mu dijiba dinene dia mâyi. Ngakashala mufue tshipuka munda mua matuku asatu.

Ngakatuadija kutata bua kumbuka mu malu aa, kadi ngakalua kabidi muena tshikisu ne tshivua ne bululame to. Mvua ngenda masandi, mpanyisha bantu diamba, ne ngiba bintu bionso bivuabu nabi bia mushinga. Mangumba manene a bena tshikisu akenza nanyi mudimu bua kupanyisha diamba mu Italie. Misangu ya bungi bampulushi bavua bankuata. Nsombelu wanyi kavua ne tshipatshila ne mvua ngenza malu mumvua musue, kadi mvua mumanye ne: dikala dianyi ne muoyo divua ne tshipatshila kampanda. Ngakalomba Nzambi, bua ampeshe anu tshidimu tshimue tshianana tshia ditalala ne disanka.

Pamvua ne bidimu 24, ngakaya mu Angleterre. Bu mumvua pana diamba, muoyo wanyi uvua mu njiwu. Kumpala kua meme kumbuka, ngakaya kumona mamuanyi ne ngakakema bikole bua kumona muntu mukuabu diende Annunziato Lugarà uyukila nende malu a mu Bible. * Bu mumvua mumanye ne: uvua muenzavi ku kale, ngakumvua buôwa ne meme  kumuebeja bua tshinyi uvua mulue kutangila maman. Wakandondela malu avuaye mushintulule bua kulua Ntemu wa Yehowa, ne wakangambila bua meme kuyukila ne Bantemu pandi mfika mu Angleterre. Ngakitaba tshivuaye muambe. Kadi pangakafikaku, ngakapinganununa diakamue mu nsombelu wanyi wa kale.

Dimue dituku ngakapetangana ne Ntemu kampanda, uvua wenda wabanya Tshibumba tshia Nsentedi ne Reveillez-vous! mu musesu uvua bantu bapanyina bintu mu Londres. Pangakavuluka tshimvua mulaye Annunziato, ngakalomba Ntemu au ni tuvua mua kulonga Bible.

Malu angakalonga mu Bible akankemesha bikole be! Tshilejilu, mvese udi mu 1 Yone 1:9 wakandenga bikole, mvese eu udi wamba bua Nzambi ne: “Tuetu batonde mibi yetu, yeye ngua lulamatu ne mmuakane bua kutufuila luse ku mibi yetu ne kutulengeja ku malu onso adi kaayi makane.” Mvese au wakanshintulula bualu mvua diumvua ne manyanu a bungi menemene bua nsombelu wanyi wa kale. Diakamue ngakatuadija kubuela mu bisangilu mu Nzubu wa Bukalenge wa Bantemu ba Yehowa. Bantemu bakangakidila ne disanka dia bungi. Pangakamona muvuabu banangangane bikole, bualu bumvua musue panyi bikole, ngakajinga bua kuikala panyi muena dîku diabu mu tshisumbu.

Nansha mumvua tshiyi ne lutatu lua bungi bua kulekela kunua diamba diakamue ne kulekela nsombelu wanyi wa tshiendenda, bivua bikole bua kuakaja bumuntu buanyi. Ngakamona ne: mvua ne bua kuangata bantu ne mushinga ne kubanemeka. Nunku, ntshidi anu nduangana ne imue ngikadilu mibi. Kadi ne diambuluisha dia Yehowa ndi mulekele ngikadilu ya bungi mibi. Ngakalonga Bible mu ngondo isambombo, meme kutambula ne kulua Ntemu wa Yehowa. Bivua mu tshidimu tshia 1997.

Panyima pa meme mumane kutambula, ngakasela nsongakaji mukuabu diende Barbara utshivua ufuma pende ku dilua Ntemu wa Yehowa. Pavua mulunda wanyi mukuabu wa kale mumone mumvua mushintuluke, wakatuadija kulonga Bible. Matuku makese, wakalua Ntemu ne muanabu wa bakaji pende. Yayende wa muledi wa maman wanyi wa bakaji, ukavua ne bidimu 80, wakatuadija pende kulonga ne kutambula kumpala kua kufuaye.

Mpindieu ndi mukulu mu tshisumbu tshietu, ne meme ne mukajanyi tudi bamanyishi ba ku dîba ne dîba, tudi tulongesha bantu badi bakula tshiena Italie badi basombele mu Londres Bible. Imue misangu bitu bintonda bua nsombelu wanyi wa kale, kadi Barbara utu ungambuluisha bikole. Ndekelu wa bionso, dîku dianyi didi ne nsombelu muimpe udi unsankisha misangu yonso, ne ndi ne Tatu wa dinanga untu musue misangu yonso. Mvua mulombe Nzambi tshidimu tshimue tshia ditalala ne disanka, kadi mmumpeshe bia bungi!