Nzambi utu miaba yonso anyi?

TELEJA MU

Diandamuna dia mu Bible

Nzambi udi umona bintu bionso ne wenza mudimu muaba wonso udiye musue. (Nsumuinu 15:3; Ebelu 4:13) Kadi Bible kena ulongesha ne: Nzambi utu miaba yonso ne mu bintu bionso to. Udi uleja ne: mmuntu mulelela ne mmusombele muaba kampanda.

Mushindu utu Nzambi: Nzambi udi nyuma. (Yone 4:24) Bantu kabena mua kumumona to. (Yone 1:18) Bikena kumona bia Nzambi bidi mu Bible bitu misangu yonso bileja ne: Nzambi mmusombele muaba kampanda musunguluke. Kadi kabitu bileja ne: udi miaba yonso nansha.—Yeshaya 6:1, 2; Buakabuluibua 4:2, 3, 8.
Muaba udi Nzambi musombele: Nzambi mmusombele muaba wa mu nyuma udi mushilangane ne bufuki budi bumueneka. Mu muaba wa mu nyuma au, Nzambi udi ne ‘muaba udiye musombele mu diulu.’ (1 Bakalenge 8:30) Bible udi uleja ne: musangu mukuabu bifukibua bia mu nyuma “[biakabuela] bua kuimana kumpala kua Yehowa,” * bileja ne: mu ngumvuilu kampanda, Nzambi mmusombele muaba musunguluke.—Yobo 1:6.

Bikalabi ne: Nzambi katu miaba yonso to, udi mua kuntabalela anyi?

Eyowa. Nzambi utu utabalela bantu bikole. Nansha mudiye musombele muaba wa mu nyuma, udi umona bantu badi basue kumusankisha bushuwa pa buloba, ne udi ubambuluisha. (1 Bakalenge 8:39; 2 Kulondolola 16:9) Mona mudi Yehowa uleja mudiye utabalela badi bamutendelela ne muoyo mujima:

Paudi usambila: Yehowa udi mua kuteleja disambila diebe anu dîba diudi usambila adi.—2 Kulondolola 18:31.
Paudi mubungame: “Yehowa udi pabuipi ne badi ne muoyo musunsuke; udi upandisha badi bazajibue mu lungenyi luabu.”—Misambu 34:18.
Paudi ukeba buludiki: Yehowa ‘neakupeshe busunguluji ne neakulongeshe’ ku diambuluisha dia Bible, Dîyi diende.—Misambu 32:8.

Malu atubu babuejakaja pa bidi bitangila dikalaku dia Nzambi miaba yonso

Mudi bamue babuejakaja: Nzambi udi miaba yonso mu bufuki.

Bulelela bua bualu: Nzambi ki mmusombele pa buloba anyi muaba mukuabu mu tshibuashibuashi to. (1 Bakalenge 8:27) Bushuwa mitoto ne bintu bikuabu bia mu bufuki “[bidi biamba] butumbi bua Nzambi.” (Misambu 19:1) Kadi Nzambi ki mmusombele mu bintu bidiye mufuke to, anu mudi muzodi kampanda kayi mua kusombela mu bintu bidiye muzole nansha. Tshintu tshizola tshidi mua kutulongesha bualu kampanda pa bidi bitangila muzodi watshi. Bia muomumue, bintu bidi bimueneka pa buloba bidi bitulongesha ‘ngikadilu ya Mufuki idi kayiyi imueneka,’ bu mudi bukole, meji, ne dinanga.—Lomo 1:20.

Mudi bamue babuejakaja: Nzambi udi ne bua kuikala miaba yonso bua kumanya malu onso ne udi ne bua kuikala ne bukole buonso.

Bulelela bua bualu: Nyuma muimpe wa Nzambi, anyi bukole buenzeji mbukole budi Nzambi wenza nabu mudimu. Ku diambuluisha dia nyuma wende muimpe, Nzambi udi mua kumona ne kuenza bualu buonso, muaba wonso, dîba dionso, kayi muaba au to.—Misambu 139:7.

Mudi bamue babuejakaja: Misambu 139:8 udi ulongesha ne: Nzambi udi miaba yonso wamba ne: “Bu meme mua kubanda mu diulu, wewe newikalamu, ne bu meme mua kuenza bulalu buanyi mu Lukita, tangila, wewe newikalamu.”

Bulelela bua bualu: Mvese eu kena wakula bua muaba udi Nzambi musombele to. Udi ulongesha mu kasala ne: kakuena muaba nansha umue udi kule menemene udi mua kupangisha Nzambi bua kutuambuluisha to.

^ Bible udi uleja ne: Yehowa ke dîna dia Nzambi.