Eyowa, Nzambi udi wambuluisha bantu badi basambila ne muoyo mujima bamulomba malu adi umvuangana ne disua diende. Nansha bikalawu musangu webe wa kumpala wa kusambila, bilejilu bia mu Bible bia bantu bavua basambile anu ne: “Nzambi, ngambuluishaku,” bidi mua kukukankamija. Tshilejilu:

•   ‘Ngambuluisha, Yehowa Nzambi wanyi; mpandisha [“bua luse luebe,” Mukanda wa Nzambi].’​—Misambu 109:26.

•   “Meme ndi mupele ne muena diakabi; [Nzambi] wanyi, vuaku ungambuluishe.”​—Misambu 70:6, Mukanda wa Mvidi Mukulu [Katolike].

 Bushuwa, mufundi wa mêyi au uvua ne ditabuja dikole kudi Nzambi. Kadi Nzambi utu uteleja bantu bonso badi basemena kudiye ne meji mimpe, bu mudi badi “ne muoyo musunsuke” anyi “bazajibue mu lungenyi luabu.”​—Misambu 34:18.

 Kutshinyi ne: Nzambi udi kule kua kayi mua kutangila ntatu yebe to. Bible udi wamba ne: “Nansha mudi Yehowa kuulu, udi umona bena budipuekeshi, kadi badibandishi udi ubamanyina anu ku bule.” (Misambu 138:6) Ke bualu kayi Yezu wakambila bayidi bende ne: “Nansha nsuki ya ku mutu kuenu mmibala yonso.” (Matayi 10:30) Nzambi udi utangila too ne tumalu tukese tudi tukutangila tuudi wewe muine kuyi nansha mutabalele to. Nunku mmunyi muapangaye kukuteleja paudi umulomba diambuluisha dîba dia ntatu?​—1 Petelo 5:7.