“Wewe muntu, yeye mmukuambile tshidi tshimpe. Nanku, ntshinyi tshidi Yehowa ukulomba? Anu bua kuenza malu makane, kunanga lulamatu, ne kuenda ne Nzambi webe ne bupuekele!”​—Mika 6:8, Nkudimuinu wa bulongolodi bupiabupia.

 ‘Wewe kampanda, bakukuleja bualu budi buakane; ne Yehowa udi utekemena malu kayi kuudi? Anu bua wewe kuenza malu makane, kunanga kuleja bakuabu luse, ne kuenda ne Nzambi webe ne mutshima mupuekele.’​—Mika 6:8, Mukanda wa Nzambi.

 Muprofete Mika wakumvuija ne: ki mbikole menemene bua bantu kusankisha Yehowa a Nzambi to. (1 Yone 5:3) Mvese eu udi uleja tshidi Nzambi utulomba mu biambilu bisatu bia mushinga. Bibidi bia kumpala bidi bitangila nangananga mushindu utudi tuenzela bakuabu malu, kadi tshisatu tshidi tshitangila bulunda buetu ne Nzambi.

 “Kuenza malu makane.” Nzambi udi ulomba batendeledi bende bua benze malu makane. Mbuena kuamba ne: bikale bela meji ne benza malu adi apetangana ne mikenji yende ya tshidi tshimpe ne tshidi tshibi. (Dutelonome 32:4) Tshilejilu, bantu badi balonda mikenji ya Nzambi badi benza muabu muonso bua kuenzela bantu bonso malu ne bululame, kabayi ne kansungansunga; nansha bantu abu bakolele muaba kayi, bikale ba mu ditunga kayi, peshi bikale babanji anyi bapele.​—Lewitiki 19:15; Yeshaya 1:17; Ebelu 13:18.

 “Kunanga lulamatu.” Badi mua kukudimuna tshiambilu etshi kabidi ne: “kunanga dinanga dia lulamatu.” (Mika 6:8, dimanyisha dia kuinshi kua dibeji) Mu tshiena Ebelu tshia ntuadijilu, muaku “lulamatu” udi umvuija kuikala ne lulamatu kudi muntu, kabidi kumuleja bulenga ne luse, kuya dia muamua dia tshidi mikenji ilomba. Nzambi udi ulomba badi basue kumusankisha bua kuleja bulenga ne luse, kabidi bua kunanga ngikadilu eyi. Bidi biumvuija ne: batendeledi bende badi ne bua kuambuluisha bakuabu ne disanka dionso nangananga badi mu ntatu. Kufila kudi kutupesha disanka.​—Bienzedi 20:35.

 “Kuenda ne Nzambi webe ne bupuekele.” Mu Bible, tshiambilu tshia “kuenda” tshidi mua kumvuija “kulonda ngenzelu wa malu kampanda.” Muntu udi wenda ne Nzambi padiye wenza malu adi amusankisha. Noa udi tshilejilu tshimpe. “Wakenda ne Nzambi mulelela” bualu uvua muakane ku mêsu kua Nzambi. “Wakadileja kayi kalema munkatshi mua bantu ba tshikondo tshiende.” (Genese 6:9) Lelu ‘tudi tuenda ne Nzambi’ patudi tutumikila malongesha adi mu Bible Dîyi diende. Nanku, tudi ne bua kuikala ne bupuekele bua kuitaba mikalu yetu ne kumanya ne: tudi dijinga ne Nzambi mu malu onso.​—Yone 17:3; Bienzedi 17:28; Buakabuluibua 4:11.

 Mika uvua muprofete mu Isalele mu bidimu bia 700 K.Y. Tshikondo atshi, ditunga divua diuwule tente ne ditendelela dia mpingu, dibila ne dikengeshangana. (Mika 1:7; 3:1-3, 9-11; 6:10-12) Bena Isalele ba bungi bavua balekele mikenji ya Nzambi ivuaye mubapeshe ku diambuluisha dia Mose, ivuabu babikila ne: mikenji ya Mose. Mu tshikondo tshimue tshimue atshi, bamue bavua bela meji ne: bavua mua kuanyishibua kudi Nzambi pavuabu benza mikiya ya malu a ntendelelu anyi bafila milambu.​—Nsumuinu 21:3; Hoshea 6:6; Mika 6:6, 7.

 Bidimu nkama ya bungi panyima pa Mika, Yezu wakavuluija ne: Tatu wende mmunange bantu badi ne dinanga, buakane, luse, kadi mmukine bena lubombo. (Matayi 9:13; 22:37-39; 23:23) Mêyi a Yezu adi atuambuluisha bua kumanya tshidi Nzambi ulomba batendeledi bende lelu.

 Tangila filme muîpi eu bua kumona kadiosha ka mukanda wa Mika.