Lelo Torah I Bika?

VUMIJA MU

Lelo Torah I Bika?

Bilondolola Bible

Kishima “Torah” i kitambe ku kishima kya Kihebelu tohrah, kine kibwanya kwalamunwa bu “bulombodi,” “bufundiji,” nansha bu “kijila.” a (Nkindi 1:8; 3:1; 28:4) Bimfwa bilonda’ko’bi bilombola muswelo wingidijibwe mu Bible kino kishima kya Kihebelu.

Divule kishima Tohrah kifunkilanga pa mikanda itano mibajinji ya mu Bible—Ngalwilo, Divilu, Bene Levi, Umbadilo, ne Kupituluka mu Bijila. Kadi ino mikanda itwanga ne bu Pantateke, kishima kishintulula mu Kingidiki amba “mivungo itano.” Torah byoyālembelwe na Mosesa, o mwanda itwanga bu “mukanda wa bijila wa Mosesa.” (Yoshua 8:31; Nehemia 8:1) Na bubine, yālembelwe dibajinji bu mukanda umo, ebiya waābanibwa mwenda mafuku mwanda wa wikale upēla kwingidija.
Kadi kishima Tohrah kifunkila ne pa bijila byāpēlwe bene Isalela mu myanda kampanda, pamo bwa “kijila [tohrah] kya kyamulambu kya bubi,” “kijila kya makopo,” ne “kijila kitala mwine Nazila.”—Levi 6:25; 14:57; Umbadilo 6:13.
Kitatyi kimo kishima Tohrah kifunkilanga ne pa bulombodi nansha pa bufundiji butamba ku bambutwile, ku bantu ba tunangu, nansha kudi Leza aye mwine.—Nkindi 1:8; 3:1; 13:14; Isaya 2:3.

Lelo mu Torah nansha Pantateke mudi bika?

Mudi mānga ya mwādi mwikadile Leza na muzo wa muntu kutamba ku bupangi kutūla ku lufu lwa Mosesa.—Ngalwilo 1:27, 28; Kupituluka 34:5.
Mudi mbila ya mu Bijila bya Mosesa. (Divilu 24:3) Mu bino Bijila mudi tubijila 600. Kintu kya mvubu bininge mu bino bijila i Shema, nansha bu kusapula lwitabijo kwa Bayuda. Kipindi kimo kya Shema kinena’mba: “Ukasanswa Yehova Leza obe ne mutyima obe onso, ne muya obe onso, ne bukomokomo bobe bonso.” (Kupituluka 6:4-9) Yesu wāshintulwile amba ino’i yo “mbila itabukile bukatampe kadi yo imbajinji.”—Mateo 22:36-38.
Dijina dya Leza, Yehova, i ditelwe’mo kintu kya misunsa 1800. Pa kyaba kya kukankaja kwingidija dijina dya Leza, Torah udi na mbila yādi isoñanya bantu ba Leza beditele.—Umbadilo 6:22-27; Kupituluka 6:13; 10:8; 21:5.

Milangwe mifwe itala pa Torah

Milangwe mifwe: Bijila bya mu Torah i bya nyeke, kebikatalulwa’kopo nansha dimo.

Bubine: Malamuni amo a Bible esambilanga ne pa bijila bipotoloke bya mu Torah—kubadila’mo byobya bisambila pa Sabato, pa mwingilo wa butobo, ne pa Difuku dya Kipwanyo—amba i bya “nyeke” nansha bya “nyeke ne nyeke-ke.” (Divilu 31:16; 40:15; Levi 16:33, 34, Mukanda Ukola) Inoko, bishima bya Kihebelu bibwanya ne kushintulula’mba kya endaenda mu bula bwa kitatyi kyampikwa kuyukana, ke enkapo’tu amba kya nyeke lonsololo. b Kipwano kya Bijila bya Mosesa pa kupwa kulāla kintu kya myaka 900, Leza wālaile amba ukapingakanya’kyo na “kipwano kipya.” (Yelemia 31:31-33) Pa “kunena’mba ‘kipwano kipya’ [Leza] waalamuna kipwano kibajinji ke kya kala.” (Bahebelu 8:7-13) Kyāpingakanibwe pano kepadi kintu kya myaka 2 000, kupityila ku lufu lwa Yesu Kidishitu.—Efisesa 2:15.

Milangwe mifwe: Bibidiji bya kwisambulwila kukanwa bya Bayuda ne Talmud bidi na lupusa lwa muswelo umo na bilembwa bya Torah.

Bubine: I kutupu bubinga bwa mu Bisonekwa nansha bumo bulombola’mba Leza wāpēle Mosesa bijila bya kukanwa bya kubweja ku bilembwa bya Torah. Ino, Bible unena’mba: “Penepa Yehova wamunena Mosesa’mba: ‘Lemba myanda ino’i.’” (Divilu 34:27) Bijila bya kukanwa byālembelwe mwenda mafuku ne kuyukana bu Mishnah, byobya byāvudijibwe ku mfulo ke Talmud, i bibundwe na bibidiji bya Bayuda byobāshilwile kudi Bafadiseo. Divule bino bibidiji kebyādipo bitane na Torah. O mwanda Yesu wātopekele Bafadiseo amba: “E momwaalamwina kinenwa kya Leza ke kya bitupu mwanda’tu wa kishi kyenu.”—Mateo 15:1-9.

Milangwe mifwe: Bana-bakaji kebafwaninwepo kufundijibwa myanda idi mu Torah.

Bubine: Mu Bijila bya Mosesa mwādi kijila kimo kyādi kinena’mba bantu bonso ba Isalela, kubadila’mo bana-bakaji ne bana bene, bafwaninwe kutangilwa Bijila byonso. Mwanda waka? ‘Amba bevwane, kadi amba balombolwe, ne kwakamwa Yehova Leza wabo, ne kutentekela kulonga binenwa byonso bya mukanda wa bijila.’—Kupituluka 31:10-12. c

Milangwe mifwe: Mu Torah mudi myanda mifyame.

Bubine: Mosesa, mwine wālembele Torah, wānenene amba myanda idi’mo idi patōka kadi ifwaninwe kuyukwa na bantu bonso, ke mifyamepo. (Kupituluka 30:11-14) Mulangwe wa amba mu Torah mudi myanda mifwame i mutambe mu Kabbalah nansha bibidiji bya Bayuda bya myanda ya majende, manwa ‘mafwatakanye na bunwa’ a kushintulula Bisonekwa. d—2 Petelo 1:16.

a Tala dibuku The Strongest Strong’s Exhaustive Concordance of the Bible, dya panopano mu kipindi kya 8451, mu kamutwe ka mwanda kanena’mba “Hebrew-Aramaic Dictionary-Index to the Old Testament.”

b Tala dibuku Theological Wordbook of the Old Testament, Volime 2, paje 672-673.

c Kwishila na byobya bifundija Torah, divule dine, bijila bitala bibidiji bya Bayuda byādi bikankaja bana-bakaji kwifunda Torah. Kimfwa, Mishnah upituluka mu binenwa bya Labi Ediezala ben Hyrcanus amba: “Muntu yense ufundijanga wandi mwana mwana-mukaji Torah, udi bwa aye umufundija bintu bya mutonko.” (Sotah 3:4) Mu Talmud wa mu Yelusalema mudi binenwa bya amba: “Binenwa bya Torah bifwaninwe kusōkwa mu mudilo pa kyaba kya kufundija’byo bana-bakaji.”—Sotah 3:19a.

d Kimfwa, dibuku Encyclopaedia Judaica dishintulula muswelo wādi umona bene Kabbalah Torah amba: “Torah kadipo’tu na nshintulwilo mipotoloke, nansha byashintulula myanda mivule mishile mu ndingo mivule palapala.”—Dibuku dya bubidi, Volime 11, paje 659.