Mbila dikumi i bijila byobāpele muzo wa Isalela wa kala kudi Leza. Bino bijila byādi biyukane ne bu binenwa dikumi, bine byalamwinwe kishima pa kishima ku kishima kya Kihebelu ʽaseʹreth had·deva·rimʹ. Kino kishima kitanwa misunsa isatu mu Pantateke (Torah), mikanda itano mibajinji ya mu Bible. (Divilu 34:28; Kupituluka mu Bijila 4:13; 10:4) Kishima kya Kingidiki kidingakene nakyo i deʹka (dikumi) loʹgous (binenwa), kwine kutambile kishima “Bijila Dikumi.”

 Leza wālembele Mbila Dikumi pa bipapo bibidi bya mabwe, wāpa’byo mupolofeto Mosesa ku Lūlu lwa Shinai. (Divilu 24:12-18) Mbila dikumi i mitelwe mu Divilu 20:1-17 ne mu Kupituluka mu Bijila 5:6-21.

•  Mbila Dikumi

•  Mwanda waka Mbila Dikumi i mishileshile?

•  Le Mbila Dikumi yādi na kitungo’ka?

•  Le bene Kidishitu bafwaninwe kulama Mbila Dikumi?

•  Le Mbila Dikumi ikingila ne dyalelo?

•  Misoñanya idi mu Kipwanino Kipya itambile ku Mbila Dikumi

1.   Tōta’nka Yehova Leza.​—Divilu 20:3.

2.   Kokatōta bilezaleza.​—Divilu 20:4-6.

3.   Kokengidija dijina dya Leza mu muswelo wampikwa kwendela’mo.​—Divilu 20:7.

4.   Lama Sabato.​—Divilu 20:8-11.

5.   Lēmeka bambutwile bobe.​—Divilu 20:12.

6.   Kokepayañana.​—Divilu 20:13.

7.   Kokalonga makoji.​—Divilu 20:14.

8.   Kokeba.​—Divilu 20:15.

9.   Kokatūla bukamoni bwa bubela.​—Divilu 20:16.

10.   Kokabila.​—Divilu 20:17.

 Bible kapelepo lubila ne lubila kibalwa kyalo. Inoko bantu badi na milangwe mishileshile pa mufwaninwe kwilondela mbila. Mulongo wa mbila udi kūlu’u ye uyukilwe na bantu bavule. Inoko bantu bamo batūlanga mu mulongo Mbila Dikumi mu miswelo mishileshile. Kwishila kudi pa muswelo obanza na mbila mibajinji, ya bubidi, ne ya mfulo. a

 Mbila dikumi yādi mu Bijila bya Mosesa. Uno mulongo wa bijila wadi na mbila 600 ne kupita, kadi kwādi kwiivwana nansha kipwano kyāsambile Leza na muzo wa Isalela wa kala. (Divilu 34:27) Leza wālaile bantu ba Isalela amba bakekala biyampe shi bakōkele Bijila bya Mosesa. (Kupituluka mu Bijila 28:1-14) Inoko, kitungo kikatampe kyādi kya kuteakanya bene Isalela batengele Meshiasa wālailwe, nansha Kidishitu.​—Bene Ngalatea 3:24.

 Aa, Leza wāpele muzo wa Isalela wa kala bino Bijila byandi, mubadilwa ne Mbila Dikumi. (Kupituluka mu Bijila 5:2, 3; Ñimbo ya Mitōto 147:19, 20) Bijila bya Mosesa kebikutyilepo bene Kidishitu, kadi enka ne Bayuda bene Kidishitu bādi “banyongololwe ku Bijila.” (Bene Loma 7:6) b Bijila bya Mosese bēbipingakenye na “kijila kya Kidishitu,” mwine mubadilwa bintu byonso byāfundije Yesu balondi bandi kulonga.​—Bene Ngalatea 6:2; Mateo 28:19, 20.

 En-en. Mu Mbila Dikumi byomudi milangwe ya Leza, tubwanya kumwena’mo shi twifunda’yo. (2 Temote 3:16, 17) Mbila Dikumi imanine pa misoñanya miyampe keikapupo bulēme nansha dimo. (Ñimbo ya Mitōto 111:7, 8) Na bubine, ino misoñanya mivule po pemanine bufundiji buvudile kwitwa bu Kipwanino Kipya.—Tala “ Misoñanya idi mu Kipwanino Kipya itambile ku Mbila Dikumi.”

 Yesu wāfundije amba Bijila byonso bya Mosesa, kubadila’mo ne Mbila Dikumi, bimanine pa mbila ibidi mikatampe. Wānenene amba: “‘Sanswa Yehova Leza obe na mutyima obe onso, na muya obe onso, ne na ñeni yobe yonso.’ Ino’i yo mbila itabukile bukatampe kadi yo mibajinji. Ya bubidi, iifwene nayo, i ino: ‘Sanswa mukwenu mowisanshilwe abe mwine.’ Pa ino mbila ibidi po pemanine Bijila byonsololo.” (Mateo 22:34-40) Nanshi, nansha bene Kidishitu byokebanenenwepo kulama Bijila bya Mosesa, i basoñanibwe kusanswa Leza ne bakwabo.​—Yoano 13:34; 1 Yoano 4:20, 21.