Aa, ketufwaninwepo kwibitōta. Dibuku dimo (the New Catholic Encyclopedia) dinena pa mwanda wa bijila byobāpele muzo wa Isalela kudi Leza amba: “Nsekununi mivule ya mu Bible ilombola’mba kebādipo bengidija byelekejo mu mutōtelo wa bine wa Leza.” Langulukila pa ano mavese a mu Bible:

•   “Kokelongela nkishi musōnge nansha kyelekejo kya kintu kyo-kyonso kidi mūlu nansha kidi panshi, nansha kidi mu mema munshi mwa ntanda. Kokevukwila kobadi nansha kwibengidila kwine, mwanda amiwa Yehova Leza obe ne Leza usakanga kulamatwa bunka.” (Divilu 20:4, 5) Leza byasaka “kulamatwa bunka,” kasangalangapo shi tutumbija nansha kutōta byelekejo, bifwatulo, bilezaleza, bankishi, nansha byengelekejo.

•   “Nkikalekapo bankishi batumbijibwe pa kyami kyaba.” (Isaya 42:8, Easy-to-Read Version) Leza upelanga butōtyi bobamutōta kupityila ku byelekejo. Bene Isalela bamo pobātompele kumutōta na kwingidija nkishi wa kyana kya ñombe, Leza wānenene amba bālongele “bubi bukatampe.”—Divilu 32:7-9, Easy-to-Read Version.

•   “Ketufwaninwepo kulanga’mba Leza Mwine udi bwa olo, nansha ndalama, nansha dibwe, pamo bwa kintu kisōngwe mungya bwino ne milangwe ya bantu.” (Bilongwa 17:29) Kwishila na mutōtelo wa bajentaila, mobengidijanga divule byelekejo “[bisōngwe] mungya bwino ne milangwe ya bantu,” bene Kidishitu abo ‘bafwaninwe kunanga na lwitabijo, ke na kumonapo na meso,’ monka munenena Bible.—2 Bene Kodinda 5:7.

•   “Mwilamei ku bilezaleza.” (1 Yoano 5:21) Mu misoñanya yobāpele muzo wa Isalela ne yobapele bene Kidishitu, Bible ulombola kyaba kyonso amba bufundiji bwa amba Leza witabije kwingidija byelekejo ne bifwatulo mu butōtyi i lufumo.