Steven unena’mba “potwepelele na nsongwakaji umo, natyumukilwe mu bidyoma, yadi misanshi yonadi nkyaivwene kashā mu būmi bwami.”

 Le nobe kodi mutanwe na myanda na ino? Shi i amo, kino kishinte kisa kukukwasha.

•  Mokusanshilanga

•  Byobwanya kulonga

 Kwipela kusanshijanga bonso babidi.

•   Shi i abe upelañene, padi ukeivwana bwa Jasmine wanenene amba “Kuyuka’mba nasanshija muntu onadi nsenswe bininge, kyadi kiselwa kilēma bininge mu mutyima wami nkyokilangapo nansha dimo kusela monka.”

•   Shi i abe upelelwe, ukevwanija kinenenanga bamo ke bapelwe amba kudi pamo bwa kufwilwa. Nsongwakaji umo, Janet unena’mba “nadi’nka bwa ami mufwilwe; bine nkyadipo nebitabija, nadi ngivwana nsungu ne mpungiji​—mfulo mfulō kubwipi kwa mwaka mutuntulu pa kupita’po​—nebitabija.”

 Mu Kīpi: Kwipela kubwanya kukulengeja wiivwane bibi ne kutyumukwa mutyima. Enka na munenena mulembi umo wa Bible amba: “Mushipiditu mutyumuke ūmija bikupa te-e.”​—Nkindi 17:22.

•  Lombola’mo mutame okulupile. Bible unena’mba: “Mulunda usanswanga mafuku onso nyeke, mukimonya-malwa wilombola bu-mwanabo” (Nkindi 17:17) Kulombola mbutwile nansha mulunda nobe mutame byonso byoivwana, kubwanya kukukwasha wiivwane biyampe.

   “Nadi mwitolwele mu bula bwa myeji mivule, kadi nkyadipo nombola muntu nansha umo byonadi neivwana. Ino balunda babwanya kukukwasha wialuje. Ponebalombwele’mo’tu, kala nashilula kwialuja.”​—Janet.

•  Boila ñeni ku bikutana. Lukindi lukwabo lwa mu Bible lunena’mba: “Mona ñeni, mona kwivwanija.” (Nkindi 4:5) Makambakano akokeja kwitufundija bintu bivule pa motwikadile ne pa muswelo wa kupwija kutyumukwa mutyima.

   “Potwepelele, mulunda nami umo wangipangwile’mba, ‘I myanda’ka yowifundile ku kipwano kyenu, ne i muswelo’ka obwanya kwiingidija shi kokimbe monka muntu wa kwisonga nandi?’”​—Steven.

•  Lombela. Bible unena’mba: “Ela kiselwa kyobe padi Yehova, nandi ukakulelanga.” (Ñimbo ya Mitōto 55:22) Milombelo ikokeja kukukwasha unekenye njia ne kwikala na mumweno muyampe pa kwipela.

   “Lombela kitatyi kyonso. Yehova umwene makambakano obe kadi uyukile senene myanda ikutene kupita ne abe mwine.”​—Marcia.

•  Kwasha bakwabo. Bible unena’mba: “Kemwakitai mutyima enka ku tumweno twa banwe bene, ino i ne ku tumweno twa bakwenu.” (Fidipai 2:4) Shi ulonga bukomo bwa kukwasha bakwenu, bukidi bonka ukapēlelwa kumona kutyibika kwa kipwano kyenu mu muswelo mukwabo.

   “Shi abakupele, bisansanga bininge kupita’nka ne misanshi ya ku ngitu, ubwanya kulanga’mba ye mfulo ya ntanda. Ino najingulwile amba ino misanshi ipwanga. Byadi’tu bilomba papite kitatyi, ebiya neivwane biyampe.”​—Evelyn .