Kwa Maheberu 2:1-18
2 Ki lona libaka haluswanela kuisa hahulu mamelelo kwa lika zeluutwile,+ kuli lusike lwayauluka nikamuta.+
2 Kakuli haiba linzwi lene libulezwi ka mangeloi+ nelibonahezi kuli ki la niti, mi foso kaufela ni kezo ya kusautwa neifumani koto kulikana ni katulo yelukile,+
3 lukabanduka cwañi haiba lukeshebisize kupiliswa kokutuna cwalo?+ Kakuli kupiliswa ko nekubulezwi pili ka Mulenaa luna+ mi nekupakilwe kuba kwa niti ku luna ki bane bamuutwile,
4 Mulimu inzaa swalisana ni bona mwa kufa bupaki ka lisupo ni ka zekomokisa* ni ka misebezi yemaata yeshutana-shutana+ ni ka moya okenile oabelwa ka kuya ka tato yahae.+
5 Kakuli haki kwa mangeloi kwafile maata a kubusa lifasi lelitaha,+ lona lelubulela zalona.
6 Kono paki yomuñwi naañozi kuli: “Mutu ki mañi kuli umuhupule, kamba mwanaa mutu ki mañi kuli umubabalele?+
7 Umuezize hanyinyani kuba kwatasaa mangeloi; umuapesize kuwani ya kanya ni likute, mi wamuketa kuba fahalimwaa misebezi ya mazoho ahao.
8 Lika kaufela neu libeile kwatasaa mahutu ahae.”+ Ka kubeya lika kaufela kwatasaa hae,+ Mulimu naasika siya sesiñwi sisika beiwa kwatasaa hae.+ Kono ka nako yacwale, haluboni lika kaufela inze lili kwatasaa hae.+
9 Kono lubona Jesu, yanaabeilwe hanyinyani kwatasaa mangeloi,+ yasaapesizwe kanya ni likute kabakala kunyanda kuisa lifu,+ kuli ka sishemo sa Mulimu ashwele batu kaufela.+
10 Kakuli nekuswanela kuli yena yo linto kamukana liezelizwe yena mi libile teñi ka yena, ka kukanyisa bana babañata,+ apetahalise Muyemeli Yomutuna yebaka piliswa ka yena+ ka kunyanda kwahae.+
11 Kakuli yakenisa ni babakeniswa,+ kaufela bazwa ku ndate alimuñwi,+ mi ka lona libaka leo haswabi kubabiza kuli banyani baka,+
12 hali: “Nikabulela libizo lahao kwa banyani baka; nika kulumbeka ka pina mwahalaa puteho.”+
13 Hape uli: “Nika musepa.”+ Mi hape uli: “Hamubone! Na ni bana babanyinyani, benifilwe ki Jehova.”*+
14 Ka mukwa ocwalo, bakeñisa kuli “bana babanyinyani” ki ba mali ni nama, ni yena ki wa mali ni nama,+ kuli ka lifu lahae akone kuyundisa yena yanani maata a kutahisa lifu,+ fo kikuli, Diabulosi,+
15 ni kuli akone kulukulula kaufela bane bali mwa butanga mwa bupilo bwabona kaufela ka kusaba lifu kwabona.+
16 Kakuli haki mangeloi luli baatusa, kono utusa bana* ba Abrahama.+
17 Kabakaleo naanani kuba sina “banyani” bahae mwa linzila kaufela,+ kuli abe muprisita yapahami yasishemo ni yasepahala mwa sebelezo yahae ku Mulimu, kuli akone kufa sitabelo sa swalelo ya libi*+ za batu sesi bakutiseza ku Mulimu.+
18 Bakeñisa kuli naanyandile hanaalikiwa,+ wakona kutusa babalikiwa.+
Litaluso ze kwatasi
^ Kamba “lisupo.”
^ Mubone Litaba Zeekelizwe A5.
^ Linzwi ka linzwi, “peu.”
^ Kamba “kueza sebelezo ya kukwahela libi.”
