“Cwale ku yena yakona kueza hahulu nikufita mwa lika kaufela zelukupa kamba kuutwisisa, kulikana ni maata ahae asebeza ku luna, ku yena kufiwe kanya.”—Maefese 3:20, 21, Bibele ya Toloko ya Lifasi Lelinca.

 “Cwale ku yena yakona kueza hahulu nikufita mwa lika kaufela zelukupa kamba kunahana, ka kuya ka maata ahae asebeza ku luna, ku yena kufiwe kanya.”—Maefese 3:20, 21, Bibele ya King James Version.

 Muapositola Paulusi ubonisa buikolwiso bwanani bona bwa kuli Mulimu wakona kualaba litapelo za batu baba mulapela ni kubafa lika zebabata mwa linzila zebasa libeleli. Wakona nihaiba kualaba litapelo zabona mwa linzila zende hahulu kufita ni mone banahanela.

 “Cwale ku yena yakona . . , kulikana ni maata ahae asebeza ku luna.” Timana 21 iluluta kuli “yena” iyemela Jehova Mulimu. a Kwateñi, Paulusi naañozi kuli: “Ku yena kufiwe kanya ka puteho ni ka Kreste Jesu.” (Joani 20:31) Hape, Mulimu wakona kulufa maata elutokwa ilikuli lueze tato yahae.—Mafilipi 4:13.

 Mwa timana 20, muapositola Paulusi ubonisa nto yeñwi yeipitezi ka za maata anani ona Jehova a kutusa batanga bahae. Ka za pulelo yetolokilwe kuli “yena yakona,” hatiso yeñwi ibulela cwana: “Timana ye haibuleli feela kuli Mulimu wakona kueza nto yeñwi kamba kuli kwakonahala kuli aieze. Italusa kuli unani maata akuieza.” Hañata mulikanaa luna ubatanga kulutusa kono haakoni kueza cwalo nako kaufela, ka kushutana Jehova wakona kueza nto ifi kamba ifi kuli ababalele batanga bahae ni kualaba litapelo zabona. Ki yena feela yanani maata amatuna.—Isaya 40:26.

 “[Mulimu] yakona kueza hahulu nikufita mwa lika kaufela zelukupa kamba kuutwisisa.” Jehova wakona kuezeza batanga bahae lika zetuna hahulu nikufita. Wakona kubatusa hahulu nikufita nihaiba mwa lika zebakona kuunga kuli ki zeñata hahulu.

 Manzwi ali “nikufita mwa lika kaufela zelukupa kamba kuutwisisa” aluluta tuto yeñwi ka za timana ye. Ka kubulela kuli “nikufita mwa lika kaufela zelukupa kamba kuutwisisa,” muapositola Paulusi ubata kuli Bakreste kaufela bautwisise kuli Mulimu wakona kubatusa mwa linzila zebasika libelela. Bibele ya New International Version ibulela ka za kalulo yapili ya timana 20 kuli: “Cwale ku yena yakona kueza hahulu nikufita mwa lika kaufela zelukupa kamba kunahana.” Ka linako zeñwi, Bakreste bakona kuikutwa kuli miinelo yetaata yebakopana ni yona itaata hahulu kuli mane haikoni kutatululwa. Mane mwendi habazibangi ni zebakona kukupa mwa litapelo zabona. Kono Jehova wautwisisa miinelo yabona mi unani maata a kubatusa. Wakona kutatulula butata bufi kamba bufi ka nako yeswanela—mi wakona kueza cwalo mwa linzila zebakona kunahana kuli halikonahali. (Jobo 42:2; Jeremia 32:17) Ka nako ya cwale, ubafanga maata a kuitiisa ka tabo!—Jakobo 1:2, 3.

 Buka ya Maefese ki liñolo lanaañozi muapositola Paulusi kwa Bakreste bane bapila mwa muleneñi wa Efese mwa Asia Minor, yona kalulo ya tolopo yebizwa Turkey mazazi a. Mwa liñolo lahae, Paulusi naañozi mihupulo yahae mwa tapelo yanaa balapelela. (Maefese 3:14-21) Naalapezi kuli Bakreste kaufela balikanyise lilato la Kreste ka kueza mobakonela kaufela kunahana ni kueza lika ka lilato. Paulusi naafelize tapelo yahae ka kulumbeka Mulimu ni ka kubulela manzwi a kwa Maefese 3:20, 21.

 Mubuhe vidio yekuswani ye kuli muzibe litaba zeñwi ka za buka ya Maefese.