Kana Mulimu Wautwanga Litapelo Zaluna?
Kana fokuñwi mwakakanyanga ka za haiba Mulimu wautwanga litapelo zamina? Haiba ki cwalo, haki mina munosi. Batu babañata sebalapezi ku Mulimu kumutaluseza ka za matata abona, kono asazwelapili. Kana fo kutalusa kuli Mulimu halati kuutwa litapelo zamina? Batili! Bibele ilukolwisa kuli Mulimu wautwanga halulapela ku yena ka nzila yeswanela. Halunyakisiseñi zeibulela Bibele.
MULIMU WATEELEZA.
“Wena Yautwa litapelo, batu ba mufuta kaufela bakataha ku wena.”—Samu 65:2.
Batu babañwi balapelanga kabakala kuli kueza cwalo kubatusanga kuikutwa hande, nihaike kuli balumela kuli hakuna luli yateelezanga kwa litapelo zabona. Kono haluswaneli kulapelanga kabakala kuli lubata feela kuikutwa hande ilikuli lutiyele miinelo yetaata yelukopana ni yona. Bibele ilubulelela kuli: “Jehova * u fakaufi ni babahuweleza ku yena kaufela, u fakaufi ni babahuweleza ku yena kaufela ka niti. . . . Uutwa muhuwo wabona wa kuli abatuse.”—Samu 145:18, 19.
Kaniti, lunani buikolwiso bwa kuli Jehova Mulimu wautwanga litapelo za batanga bahae. Ubulela ka lilato kuli: “Muka nibiza ni kutaha kuto lapela ku na, mi nika miteeleza.”—Jeremia 29:12.
MULIMU UBATA KULI MULAPELANGE KU YENA.
“Mutundamene kulapela.”—Maroma 12:12.
Bibele ilususueza kuli ‘luzwelepili kulapela’ ni kuli ‘lulapele ka nako kaufela.’ Taba yeo ibonisa kuli Jehova Mulimu ubata kuli lulapelange ku yena.—Mateu 26:41; Maefese 6:18.
Ki kabakalañi Mulimu habata kuli lulapelange ku yena? Halunyakisiseñi taba ye: Mushemi wa muuna utabanga hahulu kuutwa mwanaa hae hamukupa kuli amutuse. Ki niti kuli ndate lubasi waziba zabata mwanaa hae kamba mwaikutwela, kono hamutaluseza zabata kuli bo ndatahe bamutuse, ndate uikutwanga kusepiwa ki mwanaa hae mi babanga balikani babande. Ka nzila yeswana, halulapela ku Jehova Mulimu, lubonisa kuli lumusepile mi lubata kusutelela ku yena.—Liproverbia 15:8; Jakobo 4:8.
MULIMU WAMIISA PILU LULI.
‘Munepele lipilaelo zamina kaufela ku yena, kakuli wamiisa pilu.’—1 Pitrosi 5:7.
Mulimu ubata kuli lulapelange ku yena kakuli walulata mi waluisa pilu. Waziba matata ni lipilaelo zaluna kaufela, mi ubata kulutusa.
Mwa bupilo bwahae kaufela, Mulena Davida naalapelanga ku Jehova Mulimu kumukupa kuli amutuse mi naamutalusezanga mwanaaikutwela. (Samu 23:1-6) Kana Mulimu naaalabile litapelo za Davida? Mulimu naalata Davida mi naaalabile litapelo zahae. (Likezo 13:22) Ka mukwa oswana, ni luna Mulimu wateelezanga kwa litapelo zaluna kakuli waluisa pilu.
“NALATA JEHOVA KAKULI WAUTWA LINZWI LAKA”
Manzwi ao naañozwi mwa Bibele ki yomuñwi wa bañoli ba samu. Muñoli yo naaziba kuli Mulimu naautwile litapelo zahae, mi taba yeo nei mutusize hahulu. Naaikutwile kuba bukaufi ni Mulimu mi naakonile kutiyela miinelo yetaata yanaakopana ni yona.—Samu 116:1-9.
Kuziba kuli Mulimu wautwanga litapelo zaluna kuka lutusa kuzwelapili kulapelanga ku yena. Halunyakisiseñi mutala wa bo Pedro, babapila kwa mutulo wa Spain. Bo Pedro nebashwezwi ki mwanaa bona wamushimani mwa kozi ya fa mukwakwa. Hane bali mwa maswabi, bo Pedro nebataluselize Mulimu mone baikutwela, mi nebakuta-kutezi kulapela ku yena kuli abaomba-ombe ni kubatusa. Mulimu naabatusize cwañi? Bo Pedro babulela kuli: “Jehova naaalabile litapelo zaka ka kuitusisa mizwale ni likaizeli kuli baluomba-ombe ni kunitusa ni bo musalaa ka.”
Hañata Mulimu ualabanga litapelo zaluna ka kuitusisa balikani baluna kuli baluomba-ombe ni kulutusa
Nihaike kuli mwanaa bona naasika pila hape, kulapela nekutusize bo Pedro ni lubasi lwabona mwa linzila zeñata. Bo Musalaa bo Pedro, bo María Carmen, batalusa kuli: “Kulapela neku nitusize kutiyela masitapilu aka. Neniziba kuli Jehova Mulimu naautwisisa mone niikutwela kakuli hane nilapezi ku yena, neniikutwile kuwa pilu ni kuomba-ombiwa.”
Litaba ze mwa Bibele ni zeezahezi mwa bupilo bwa batu, libonisa hande kuli Mulimu wautwanga litapelo zaluna. Nihakulicwalo, Mulimu haalabangi litapelo kaufela. Ki kabakalañi Mulimu haalabanga litapelo zeñwi ni kusaalaba zeñwi?
^ para. 5 Bibele ibonisa kuli Jehova ki libizo la Mulimu.—Samu 83:18.
