ພະເຈົ້າເປັນພະເຈົ້າແບບໃດ?
ແຮ່ງເຮົາຮູ້ຈັກໝູ່ຂອງເຮົາວ່າລາວເປັນຄົນແບບໃດ ເຮົາກໍຈະແຮ່ງສະໜິດກັບລາວຫຼາຍຂຶ້ນ. ຄ້າຍຄືກັນ ແຮ່ງເຮົາຮູ້ຈັກພະເຢໂຫວາວ່າເພິ່ນເປັນພະເຈົ້າແບບໃດ ເຮົາກໍຈະແຮ່ງສະໜິດກັບເພິ່ນຫຼາຍຂຶ້ນ. ພະເຈົ້າມີຄຸນລັກສະນະພິເສດຫຼາຍຢ່າງ ແຕ່ທີ່ເດັ່ນມີຢູ່ 4 ຢ່າງຄື: ພະລັງອຳນາດ ສະຕິປັນຍາ ຄວາມຍຸຕິທຳ ແລະຄວາມຮັກ.
ພະເຈົ້າມີພະລັງອຳນາດ
“ພະເຢໂຫວາພະເຈົ້າຜູ້ຍິ່ງໃຫຍ່ສູງສຸດ ພະອົງສ້າງສະຫວັນແລະໂລກດ້ວຍພະລັງແລະອຳນາດອັນຍິ່ງໃຫຍ່ຂອງພະອົງ.”—ເຢເຣມີ 32:17, ລ.ມ.
ຫຼັກຖານທີ່ສະແດງເຖິງພະລັງອຳນາດຂອງພະເຈົ້າເຫັນໄດ້ຈາກສິ່ງທີ່ເພິ່ນສ້າງ. ຕົວຢ່າງເຊັ່ນ ເມື່ອເຈົ້າຢືນຢູ່ທາງນອກໃນມື້ທີ່ແດດແຮງ ເຈົ້າຈະຮູ້ສຶກແນວໃດ? ເຈົ້າຄືຊິຮູ້ສຶກຮ້ອນ. ທີ່ຈິງ ເຈົ້າກຳລັງຮູ້ສຶກເຖິງພະລັງອຳນາດຂອງສິ່ງທີ່ພະເຢໂຫວາສ້າງ. ດວງຕາເວັນມີພະລັງຫຼາຍສ່ຳໃດ? ແກນກາງຂອງດວງຕາເວັນມີອຸນຫະພູມ 15.000.000 ອົງສາເຊ. ແລະທຸກວິນາທີ ດວງຕາເວັນປ່ອຍພະລັງງານທຽບເທົ່າກັບລະເບີດນິວເຄຼຍຫຼາຍຮ້ອຍລ້ານລູກ.
ແຕ່ດວງຕາເວັນຂອງເຮົາກໍຍັງຖືວ່ານ້ອຍເມື່ອທຽບກັບດວງດາວຈຳນວນມະຫາສານໃນເອກະພົບທີ່ເຮົາຍັງບໍ່ຮູ້ຈັກທັງໝົດ. ນັກວິທະຍາສາດຄາດຄະເນວ່າ ໜຶ່ງໃນດາວທີ່ມີຂະໜາດໃຫຍ່ທີ່ສຸດແມ່ນ ດາວຢູວາຍໃນກຸ່ມດາວໂລ້ (UY Scuti) ເຊິ່ງມີເສັ້ນຜ່າສູນກາງປະມານ 1.700 ເທົ່າຂອງດວງຕາເວັນ. ຖ້າດາວດວງນັ້ນຕັ້ງຢູ່ໃນຕຳແໜ່ງຂອງດວງຕາເວັນ ໂລກຂອງເຮົາກໍຈະຢູ່ທາງໃນດາວນັ້ນແລະຍັງກິນພື້ນທີ່ໄປເຖິງວົງໂຄຈອນຂອງດາວພະຫັດນຳ. ນີ້ອາດຊ່ວຍເຮົາໃຫ້ເຂົ້າໃຈຄຳເວົ້າຂອງຜູ້ຂຽນຄຳພີໄບເບິນທີ່ຊື່ເຢເຣມີຫຼາຍຂຶ້ນທີ່ບອກວ່າພະເຢໂຫວາພະເຈົ້າສ້າງສະຫວັນແລະໂລກ ເຊິ່ງກໍຄືເອກະພົບ ດ້ວຍພະລັງແລະອຳນາດທີ່ຍິ່ງໃຫຍ່ຂອງເພິ່ນ.
ພະລັງອຳນາດຂອງພະເຈົ້າເປັນປະໂຫຍດຕໍ່ເຮົາແນວໃດ? ເຮົາມີຊີວິດຢູ່ໄດ້ກໍຍ້ອນສິ່ງທີ່ພະເຈົ້າສ້າງ ເຊັ່ນ ດວງຕາເວັນແລະສິ່ງສວຍງາມຕ່າງໆໃນທຳມະຊາດອ້ອມໂຕເຮົາ. ນອກຈາກນັ້ນ ພະເຈົ້າຍັງໃຊ້ພະລັງອຳນາດຂອງເພິ່ນເພື່ອເຮົາແຕ່ລະຄົນນຳ. ເພິ່ນເຮັດຫຍັງ? ໃນສະຕະວັດທຳອິດ ພະເຈົ້າໃຫ້ພະລັງກັບພະເຢຊູເພື່ອເຮັດການອັດສະຈັນຫຼາຍຢ່າງ. ຄຳພີໄບເບິນບອກວ່າ: “ຄົນຕາບອດກໍເຫັນຮຸ່ງ ຄົນງ່ອຍກໍຍ່າງໄດ້ ຄົນຂີ້ທູດກໍດີເປັນປົກກະຕິ ຄົນຫູໜວກກໍໄດ້ຍິນ ຄົນຕາຍກໍຟື້ນຄືນມາ.” (ມັດທາຍ 11:5) ແລ້ວທຸກມື້ນີ້ເດ? ຄຳພີໄບເບິນບອກວ່າ: “ເພິ່ນໃຫ້ພະລັງກັບຄົນທີ່ອິດເມື່ອຍ” ແລະ “ຄົນທີ່ວາງໃຈພະເຢໂຫວາຈະກັບມີເຫື່ອແຮງອີກ.” (ເອຊາອີ 40:29, 31, ລ.ມ.) ພະເຈົ້າໃຫ້ “ກຳລັງທີ່ຫຼາຍກວ່າປົກກະຕິ” ກັບເຮົາເພື່ອເຮົາຈະຮັບມືກັບບັນຫາແລະອົດທົນກັບຄວາມລຳບາກຕ່າງໆໃນຊີວິດໄດ້. (2 ໂກຣິນໂທ 4:7) ເຈົ້າຮູ້ສຶກຢາກຈະໃກ້ຊິດກັບພະເຈົ້າທີ່ໃຊ້ພະລັງອຳນາດທີ່ບໍ່ມີມື້ສິ້ນສຸດດ້ວຍຄວາມຮັກເພື່ອພວກເຮົາບໍ?
ພະເຈົ້າມີສະຕິປັນຍາ
“ພະເຢໂຫວາ ຜົນງານຂອງພະອົງມີຫຼາຍແທ້ໆ ພະອົງສ້າງທຸກຢ່າງດ້ວຍສະຕິປັນຍາ.”—ຄຳເພງ 104:24, ລ.ມ.
ແຮ່ງເຮົາຮຽນຮູ້ກ່ຽວກັບສິ່ງທີ່ພະເຈົ້າສ້າງ ເຮົາກໍແຮ່ງຮູ້ສຶກງຶດງໍ້ໃນສະຕິປັນຍາຂອງເພິ່ນ. ທີ່ຈິງ ມີສາຂາວິຊາໜຶ່ງທີ່ເອີ້ນວ່າໄບໂອມິເມຕິກສ໌ ຫຼືໄບໂອມິມິຄຣີ ເຊິ່ງເປັນສາຂາວິຊາທີ່ນັກວິທະຍາສາດພະຍາຍາມຮຽນຮູ້ຈາກທຳມະຊາດທີ່ພະເຢໂຫວາສ້າງເພື່ອໃຊ້ອອກແບບແລະພັດທະນາສິ່ງປະດິດຕ່າງໆໃຫ້ດີຂຶ້ນ. ຕັ້ງແຕ່ສິ່ງປະດິດງ່າຍໆເຊັ່ນເທັບຕີນກັບແກ້ໄປຈົນຮອດຍົນທີ່ມີຄວາມຊັບຊ້ອນຫຼາຍ.
ບໍ່ມີຫຍັງເຮັດໃຫ້ເຮົາເຫັນສະຕິປັນຍາຂອງພະເຈົ້າໄດ້ຈະແຈ້ງເທົ່າກັບຮ່າງກາຍຂອງມະນຸດ. ຕົວຢ່າງເຊັ່ນ ລອງຄິດເຖິງພັດທະນາການຂອງແອນ້ອຍ. ຂະບວນການນີ້ເລີ່ມຕົ້ນຈາກຈຸລັງທີ່ໄດ້ຮັບການປະຕິສົນທິ ເຊິ່ງເມື່ອປະຕິສົນທິແລ້ວຈຸລັງຈະມີຊຸດຄຳສັ່ງທາງພັນທຸກຳຢ່າງຄົບຖ້ວນ. ຈາກນັ້ນຈຸລັງນີ້ຈະແບ່ງໂຕເປັນຫຼາຍຈຸລັງທີ່ເບິ່ງຄ້າຍໆກັນ. ແລະເມື່ອຮອດເວລາທີ່ເໝາະສົມ ຈຸລັງເຫຼົ່ານີ້ຈະກາຍເປັນຈຸລັງຕ່າງຊະນິດກັນຫຼາຍຮ້ອຍຊະນິດ ເຊັ່ນ ຈຸລັງເມັດເລືອດ ຈຸລັງປະສາດ ແລະຈຸລັງກະດູກ. ບໍ່ດົນລະບົບຂອງອະໄວຍະວະຕ່າງໆກໍເກີດຂຶ້ນແລະເລີ່ມເຮັດວຽກ. ພຽງແຕ່ 9 ເດືອນເທົ່ານັ້ນ ທີ່ຈຸລັງທຳອິດພັດທະນາເປັນແອນ້ອຍທີ່ມີອະໄວຍະວະຄົບຖ້ວນເຊິ່ງປະກອບໄປດ້ວຍຈຸລັງເປັນລ້ານໆຈຸລັງ. ສະຕິປັນຍາທີ່ເຫັນໄດ້ຈາກການອອກແບບນີ້ເຮັດໃຫ້ຫຼາຍຄົນເຫັນດີກັບຜູ້ຂຽນຄຳພີໄບເບິນທີ່ບອກວ່າ: “ຂ້ອຍສັນລະເສີນພະອົງ ເພາະຂ້ອຍຖືກສ້າງຢ່າງໜ້າອັດສະຈັນແລະໜ້າຢຳເກງ.”—ຄຳເພງ 139:14, ລ.ມ.
ສະຕິປັນຍາຂອງພະເຈົ້າເປັນປະໂຫຍດຕໍ່ເຮົາແນວໃດ? ພະເຈົ້າຜູ້ສ້າງທຸກສິ່ງຮູ້ວ່າເຮົາຈຳເປັນຕ້ອງມີຫຍັງຈຶ່ງຈະມີຄວາມສຸກ. ແລະຍ້ອນພະເຈົ້າມີຄວາມຮູ້ແລະຄວາມເຂົ້າໃຈຫຼາຍ ເພິ່ນຈຶ່ງໃຫ້ຄຳແນະນຳທີ່ສະຫຼາດໄວ້ໃນຖ້ອຍຄຳຂອງເພິ່ນ ເຊິ່ງກໍຄືຄຳພີໄບເບິນ. ຕົວຢ່າງເຊັ່ນ ຄຳພີໄບເບິນກະຕຸ້ນໃຫ້ເຮົາ: “ໃຫ້ອະໄພກັນຢ່າງໃຈກວ້າງຕໍ່ໄປ.” (ໂກໂລຊາຍ 3:13) ນີ້ເປັນຄຳແນະນຳທີ່ດີຫຼາຍ. ທີ່ຈິງ ງານວິໄຈພົບວ່າຖ້າເຮົາໃຫ້ອະໄພຄົນອື່ນ ເຮົາກໍຈະຫຼັບສະບາຍແລະຊ່ວຍບໍ່ເຮັດໃຫ້ຄວາມດັນເລືອດສູງ. ນອກຈາກນັ້ນ ຍັງອາດຫຼຸດຄວາມສ່ຽງຕໍ່ການເປັນໂລກຊຶມເສົ້າແລະບັນຫາສຸຂະພາບອື່ນໆນຳ. ພະເຈົ້າເປັນຄືໝູ່ທີ່ສະຫຼາດແລະຫ່ວງໃຍເຮົາ ບໍ່ເຄີຍຢຸດທີ່ຈະຊ່ວຍເຫຼືອແລະໃຫ້ຄຳແນະນຳທີ່ເປັນປະໂຫຍດກັບເຮົາ. (2 ຕີໂມທຽວ 3:16, 17) ເຈົ້າຄືຊິຢາກມີໝູ່ແບບນີ້ແມ່ນບໍ?
ພະເຈົ້າຍຸຕິທຳ
“ພະເຢໂຫວາຮັກຄວາມຍຸຕິທຳ.”—ຄຳເພງ 37:28, ລ.ມ.
ພະເຈົ້າເຮັດສິ່ງທີ່ຖືກຕ້ອງສະເໝີ. ທີ່ຈິງ “ບໍ່ມີວັນທີ່ພະເຈົ້າທ່ຽງແທ້ຈະເຮັດຊົ່ວ ແລະບໍ່ມີທາງທີ່ຜູ້ມີພະລັງອຳນາດສູງສຸດຈະເຮັດຜິດ!” (ໂຢບ 34:10, ລ.ມ.) ເມື່ອພະເຢໂຫວາຕັດສິນ ເພິ່ນເຮັດດ້ວຍຄວາມຍຸຕິທຳສະເໝີ ຄືທີ່ຜູ້ຂຽນປຶ້ມຄຳເພງບອກວ່າ: “ພະອົງຈະພິພາກສາທຸກຊາດດ້ວຍຄວາມຍຸຕິທຳ.” (ຄຳເພງ 67:4, ລ.ມ.) ເນື່ອງຈາກ “ພະເຢໂຫວາເບິ່ງທີ່ຫົວໃຈ” ຄົນໜ້າຊື່ໃຈຄົດຈຶ່ງຕົວະເພິ່ນບໍ່ໄດ້ ເພິ່ນຮູ້ຄວາມຈິງແລະຕັດສິນຢ່າງຖືກຕ້ອງສະເໝີ. (1 ຊາເມືອນ 16:7, ລ.ມ.) ນອກຈາກນັ້ນ ພະເຈົ້າຮູ້ທຸກຢ່າງກ່ຽວກັບຄວາມບໍ່ຍຸຕິທຳແລະການສໍ້ໂກງທີ່ເກີດຂຶ້ນເທິງໂລກ ແລະເພິ່ນສັນຍາວ່າອີກບໍ່ດົນ “ຄົນຊົ່ວຈະຖືກທຳລາຍໃຫ້ໝົດໄປຈາກໂລກ.”—ສຸພາສິດ 2:22, ລ.ມ.
ແນວໃດກໍຕາມ ພະເຈົ້າບໍ່ແມ່ນຜູ້ຕັດສິນທີ່ໂຫດຮ້າຍແລະຈອບແຕ່ຈະລົງໂທດ. ເພິ່ນສະແດງຄວາມເມດຕາເມື່ອເຫັນວ່າເໝາະສົມ. ຄຳພີໄບເບິນບອກວ່າ: “ພະເຢໂຫວາເມດຕາ ສົງສານ” ແມ່ນແຕ່ກັບຄົນຊົ່ວຖ້າລາວກັບໂຕກັບໃຈແທ້ໆ. ນັ້ນເປັນຄວາມຍຸຕິທຳທີ່ແທ້ຈິງແມ່ນບໍ?—ຄຳເພງ 103:8, ລ.ມ.; 2 ເປໂຕ 3:9
ຄວາມຍຸຕິທຳຂອງພະເຈົ້າເປັນປະໂຫຍດຕໍ່ເຮົາແນວໃດ? ອັກຄະສາວົກເປໂຕບອກວ່າ: “ພະເຈົ້າບໍ່ລຳອຽງ ພະອົງຍອມຮັບທຸກຄົນທີ່ຢຳເກງພະອົງແລະເຮັດສິ່ງທີ່ຖືກຕ້ອງ ບໍ່ວ່າລາວຈະເປັນຄົນຊາດໃດກໍຕາມ.” (ກິດຈະການ 10:34, 35) ຄວາມຍຸຕິທຳຂອງພະເຈົ້າເປັນປະໂຫຍດຕໍ່ເຮົາຍ້ອນເພິ່ນບໍ່ເຄີຍລຳອຽງຫຼືເລືອກປະຕິບັດ. ພະເຈົ້າຈະຍອມຮັບເຮົາໃຫ້ເປັນຜູ້ນະມັດສະການເພິ່ນບໍ່ວ່າເຮົາຈະເປັນຄົນຊາດໃດ ມີການສຶກສາ ຫຼືຖານະທາງສັງຄົມແນວໃດ.
ພະເຈົ້າຢາກໃຫ້ເຮົາເຂົ້າໃຈແລະໄດ້ຮັບປະໂຫຍດຈາກຄວາມຍຸຕິທຳຂອງເພິ່ນ ເພິ່ນຈຶ່ງສ້າງເຮົາໃຫ້ມີໃຈຮູ້ຜິດຮູ້ຖືກ. ພະຄຳພີອະທິບາຍວ່າໃຈຮູ້ຜິດຮູ້ຖືກແມ່ນ ‘ກົດໝາຍທີ່ຢູ່ໃນໃຈ’ ເຊິ່ງ ‘ບອກໃຫ້ຮູ້ວ່າເຮົາຖືກຫຼືຜິດ’. (ໂຣມ 2:15) ໃຈຮູ້ຜິດຮູ້ຖືກເປັນປະໂຫຍດຕໍ່ເຮົາແນວໃດ? ຖ້າເຮົາຝຶກໂຕເອງໃຫ້ມີໃຈຮູ້ຜິດຮູ້ຖືກທີ່ເໝາະສົມ ເຮົາກໍຈະບໍ່ຢາກເຮັດຊົ່ວຫຼືເຮັດສິ່ງທີ່ບໍ່ຍຸຕິທຳ. ແລະຖ້າເຮົາເຮັດຜິດພາດໄປແລ້ວ ເຮົາກໍຢາກຈະກັບໃຈແລະປ່ຽນແປງໂຕເອງ. ທີ່ຈິງ ການເຂົ້າໃຈເລື່ອງຄວາມຍຸຕິທຳຂອງພະເຈົ້າສົ່ງຜົນດີຕໍ່ເຮົາແລະເຮັດໃຫ້ເຮົາຢາກຮູ້ຈັກເພິ່ນຫຼາຍຂຶ້ນ!
ພະເຈົ້າເປັນຄວາມຮັກ
“ພະເຈົ້າເປັນຄວາມຮັກ.”—1 ໂຢຮັນ 4:8
ພະເຈົ້າມີພະລັງອຳນາດທີ່ຈະເຮັດທຸກສິ່ງ ແລະເພິ່ນໃຊ້ສະຕິປັນຍາ ແລະຄວາມຍຸຕິທຳໃນການເຮັດສິ່ງເຫຼົ່ານັ້ນ. ແຕ່ຄຳພີໄບເບິນບອກວ່າພະເຈົ້າເປັນຄວາມຮັກ. ດັ່ງນັ້ນ ສິ່ງທີ່ກະຕຸ້ນເພິ່ນໃຫ້ລົງມືເຮັດທຸກສິ່ງທຸກຢ່າງກໍຄື ຄວາມຮັກ.
ເຖິງວ່າພະເຢໂຫວາບໍ່ໄດ້ຂາດຫຍັງເລີຍ ແຕ່ຄວາມຮັກກະຕຸ້ນໃຫ້ເພິ່ນສ້າງສິ່ງມີຊີວິດທີ່ມີສະຕິປັນຍາ ທັງໃນສະຫວັນແລະເທິງໂລກ ຄວາມຮັກແລະຄວາມຫ່ວງໃຍຂອງເພິ່ນເຮັດໃຫ້ເຂົາເຈົ້າໄດ້ຮັບປະໂຫຍດແລະມີຄວາມສຸກ. ດ້ວຍຄວາມຮັກ ເພິ່ນກຽມໂລກໃຫ້ເປັນເຮືອນທີ່ເປັນຕາຢູ່ເພື່ອມະນຸດທີ່ເພິ່ນສ້າງ. ແລະເພິ່ນສະແດງຄວາມຮັກຕໍ່ມະນຸດທຸກຄົນສະເໝີໂດຍ “ໃຫ້ດວງຕາເວັນສ່ອງແສງແກ່ທັງຄົນດີແລະຄົນຊົ່ວ ແລະໃຫ້ຝົນຕົກແກ່ຄົນເຮັດດີແລະຄົນເຮັດຊົ່ວ.”—ມັດທາຍ 5:45
ນອກຈາກນັ້ນ “ພະເຢໂຫວາເມດຕາແລະມີຄວາມເຫັນອົກເຫັນໃຈແທ້ໆ.” (ຢາໂກໂບ 5:11) ເພິ່ນສະແດງຄວາມຮັກຕໍ່ຄົນທີ່ພະຍາຍາມຢ່າງຈິງໃຈເພື່ອຈະຮູ້ຈັກແລະເຂົ້າໃກ້ເພິ່ນ. ພະເຈົ້າສົນໃຈເຂົາເຈົ້າແຕ່ລະຄົນ. ທີ່ຈິງ “ພະອົງຫ່ວງໃຍພວກເຈົ້າ.”—1 ເປໂຕ 5:7
ຄວາມຮັກຂອງພະເຈົ້າເປັນປະໂຫຍດຕໍ່ເຮົາແນວໃດ? ເຮົາປະທັບໃຈຄວາມສວຍງາມຕອນຕາເວັນຕົກ. ເຮົາມັກເວລາໄດ້ຍິນສຽງເດັກນ້ອຍຫົວ. ເຮົາມີຄວາມສຸກທີ່ໄດ້ຮັບຄວາມຮັກຈາກຄົນໃນຄອບຄົວ. ທັງໝົດນີ້ອາດບໍ່ແມ່ນສິ່ງຈຳເປັນຕໍ່ການມີຊີວິດຢູ່ ແຕ່ຍ້ອນພະເຈົ້າຮັກເຮົາເພິ່ນຈຶ່ງຢາກໃຫ້ເຮົາມີຄວາມສຸກ.
ປະໂຫຍດອີກຢ່າງໜຶ່ງຈາກຄວາມຮັກຂອງພະເຈົ້າກໍຄື: ເຮົາສາມາດອະທິດຖານເຖິງເພິ່ນໄດ້. ຄຳພີໄບເບິນບອກເຮົາວ່າ: “ຢ່າອຸກໃຈໃນເລື່ອງໃດເລີຍ ແຕ່ໃຫ້ຂໍທຸກສິ່ງຈາກພະເຈົ້າດ້ວຍການອະທິດຖານແລະການອ້ອນວອນ ແລະໃຫ້ຂອບໃຈພະອົງນຳ.” ພະເຈົ້າເປັນຄືພໍ່ທີ່ຮັກລູກ ເພິ່ນຢາກໃຫ້ເຮົາຂໍຄວາມຊ່ວຍເຫຼືອໃນເລື່ອງທີ່ເຮົາເປັນຫ່ວງຫຼືກັງວົນຫຼາຍທີ່ສຸດ. ແລະດ້ວຍຄວາມຮັກທີ່ບໍ່ເຫັນແກ່ໂຕ ພະເຢໂຫວາສັນຍາວ່າຈະໃຫ້ເຮົາມີ “ສັນຕິສຸກຂອງ [ເພິ່ນ] ທີ່ເກີນຄວາມເຂົ້າໃຈທຸກຢ່າງ.”—ຟີລິບປອຍ 4:6, 7
ການໄດ້ຮູ້ກ່ຽວກັບລັກສະນະເດັ່ນຂອງພະເຈົ້າເຊັ່ນ ພະລັງອຳອາດ ສະຕິປັນຍາ ຄວາມຍຸຕິທຳ ແລະຄວາມຮັກ ຊ່ວຍເຈົ້າໃຫ້ຮູ້ຫຼາຍຂຶ້ນບໍວ່າເພິ່ນເປັນພະເຈົ້າແບບໃດ? ແລະເພື່ອເຈົ້າຈະຮູ້ຈັກພະເຈົ້າຫຼາຍຂຶ້ນອີກ ເຮົາຂໍເຊີນເຈົ້າໃຫ້ຮຽນຮູ້ວ່າເພິ່ນໄດ້ເຮັດຫຍັງໄປແລ້ວແລະຈະເຮັດຫຍັງອີກເພື່ອປະໂຫຍດຂອງເຈົ້າ.
ພະເຈົ້າເປັນພະເຈົ້າແບບໃດ? ພະເຢໂຫວາເປັນຜູ້ທີ່ມີພະລັງອຳນາດ ສະຕິປັນຍາ ແລະຄວາມຍຸຕິທຳຫຼາຍກວ່າຜູ້ອື່ນ. ແຕ່ລັກສະນະເດັ່ນທີ່ສຸດທີ່ເຮັດໃຫ້ເຮົາຢາກເຂົ້າໃກ້ເພິ່ນແມ່ນຄວາມຮັກ