ພະເຈົ້າໃຊ້ວິວັດທະນາການໃນການສ້າງສິ່ງມີຊີວິດຊະນິດຕ່າງໆບໍ?
ຄຳຕອບຈາກຄຳພີໄບເບິນ
ບໍ່. ຄຳພີໄບເບິນບອກຢ່າງຈະແຈ້ງວ່າພະເຈົ້າສ້າງມະນຸດ ສ້າງສັດແລະພືດຕາມ “ຊະນິດ” ຂອງມັນ. a (ຕົ້ນເດີມ 1:12, 21, 25, 27, ລ.ມ.; ພະນິມິດ 4:11) ຄຳພີໄບເບິນຍັງບອກວ່າມະນຸດທຸກຄົນເປັນລູກຫຼານຂອງອາດາມແລະເອວາພໍ່ແມ່ຄູ່ທຳອິດ. (ຕົ້ນເດີມ 3:20; 4:1) ເລື່ອງຕ່າງໆໃນຄຳພີໄບເບິນບໍ່ໄດ້ສະໜັບສະໜູນທິດສະດີທີ່ວ່າພະເຈົ້າໃຊ້ວິວັດທະນາການໃນການສ້າງສິ່ງມີຊີວິດຊະນິດຕ່າງໆ. ແຕ່ກໍບໍ່ມີບ່ອນໃດໃນຄຳພີໄບເບິນຂັດແຍ່ງກັບຂໍ້ສັງເກດທາງວິທະຍາສາດທີ່ວ່າສິ່ງມີຊີວິດແຕ່ລະຊະນິດມີສາຍພັນທີ່ຫຼາກຫຼາຍ. b
ພະເຈົ້າໃຊ້ວິວັດທະນາການບໍ?
ຫຼາຍຄົນທີ່ເຊື່ອວ່າພະເຈົ້າໃຊ້ວິວັດທະນາການເພື່ອສ້າງສິ່ງມີຊີວິດມີຄວາມຄິດເຫັນຕ່າງກັນ. ສາລານຸກົມບຣິແທນນິກາ ບອກວ່າບາງຄົນເຊື່ອວ່າ “ການຄັດເລືອກໂດຍທຳມະຊາດເປັນວິທີໜຶ່ງທີ່ພະເຈົ້າໃຊ້ຊີ້ນຳໂລກແຫ່ງທຳມະຊາດ.”
ທິດສະດີທີ່ວ່າພະເຈົ້າໃຊ້ວິວັດທະນາການເພື່ອສ້າງສິ່ງມີຊີວິດຍັງອາດລວມເຖິງແນວຄິດຕໍ່ໄປນີ້:
ສິ່ງມີຊີວິດທັງໝົດສືບເຊື້ອສາຍມາຈາກບັນພະບຸລຸດດຽວກັນມາຕັ້ງແຕ່ສະໄໝບູຮານ.
ສິ່ງມີຊີວິດຊະນິດໜຶ່ງສາມາດວິວັດທະນາການເປັນອີກຊະນິດໜຶ່ງທີ່ຕ່າງກັນແທ້ໆ ບາງເທື່ອມີການເອີ້ນແນວຄິດນີ້ວ່າວິວັດທະນາການລະດັບມະຫາພາກ.
ພະເຈົ້າມີສ່ວນກ່ຽວຂ້ອງກັບຂະບວນການເຫຼົ່ານີ້ບໍ່ທາງໃດກໍທາງໜຶ່ງ.
ວິວັດທະນາການສອດຄ່ອງກັບຄຳພີໄບເບິນບໍ?
ທິດສະດີທີ່ວ່າພະເຈົ້າໃຊ້ວິວັດທະນາການເພື່ອສ້າງສິ່ງມີຊີວິດຊະນິດຕ່າງໆ ກຳລັງຊີ້ໃຫ້ເຫັນວ່າເລື່ອງການສ້າງໃນປຶ້ມຕົ້ນເດີມຂອງຄຳພີໄບເບິນບໍ່ໄດ້ຖືກຕ້ອງທັງໝົດ. ແຕ່ພະເຢຊູເວົ້າເຖິງປຶ້ມຕົ້ນເດີມວ່າເປັນຄວາມຈິງທາງປະຫວັດສາດ. (ຕົ້ນເດີມ 1:26, 27; 2:18-24; ມັດທາຍ 19:4-6) ຄຳພີໄບເບິນບອກວ່າກ່ອນທີ່ພະເຢຊູຈະມາເທິງໂລກ ເພິ່ນຢູ່ເທິງສະຫວັນກັບພະເຈົ້າແລະມີສ່ວນໃນການສ້າງ “ທຸກສິ່ງ”. (ໂຢຮັນ 1:3) ດັ່ງນັ້ນ ແນວຄິດທີ່ວ່າພະເຈົ້າໃຊ້ວິວັດທະນາການໃນການສ້າງສິ່ງມີຊີວິດຊະນິດຕ່າງໆຈຶ່ງບໍ່ສອດຄ່ອງກັບສິ່ງທີ່ຄຳພີໄບເບິນສອນ.
ການທີ່ພືດແລະສັດສາມາດປັບໂຕເພື່ອໃຫ້ຢູ່ລອດເປັນວິວັດທະນາການບໍ?
ຄຳພີໄບເບິນບໍ່ໄດ້ອະທິບາຍວ່າສິ່ງມີຊີວິດສາມາດມີຄວາມຫຼາກຫຼາຍໄດ້ຫຼາຍສ່ຳໃດພາຍໃນຊະນິດດຽວກັນ. ແລະຄຳພີໄບເບິນກໍບໍ່ໄດ້ຂັດແຍ່ງກັບສາຍພັນໃໝ່ໆຂອງສັດແລະພືດທີ່ເກີດຂຶ້ນຈາກການປະສົມພັນຫຼືການປັບໂຕໃຫ້ເຂົ້າກັບສິ່ງແວດລ້ອມໃໝ່ໆ. ເຖິງບາງຄົນຈະເບິ່ງວ່າການປັບໂຕແບບນີ້ເປັນວິວັດທະນາການ ແຕ່ນີ້ກໍບໍ່ໄດ້ເຮັດໃຫ້ເກີດສິ່ງມີຊີວິດຊະນິດໃໝ່.
a ຄຳພີໄບເບິນໃຊ້ຄຳວ່າ “ຊະນິດ” (kind) ເຊິ່ງມີຄວາມໝາຍກວ້າງກວ່າຄຳວ່າ “ຊະນິດ” (species) ທີ່ນັກວິທະຍາສາດໃຊ້. ຫຼາຍຄັ້ງເມື່ອເກີດສາຍພັນໃໝ່ ນັກວິທະຍາສາດມັກຈະບອກວ່າເປັນສິ່ງມີຊີວິດຊະນິດໃໝ່ (species) ທີ່ເກີດຈາກວິວັດທະນາການ ແຕ່ແທ້ໆແລ້ວເປັນພຽງຄວາມຫຼາກຫຼາຍຂອງສາຍພັນໃນ “ຊະນິດ” ດຽວກັນຄືກັບທີ່ໃຊ້ໃນປຶ້ມຕົ້ນເດີມ.
b ບາງຄັ້ງແນວຄິດນີ້ໝາຍເຖິງວິວັດທະນາການລະດັບຈຸນລະພາກ.
ເລື່ອງທີ່ເຈົ້າອາດຈະມັກ
ຄຳສອນທີ່ສຳຄັນໃນຄຳພີໄບເບິນ
ເອກະພົບເກີດຂຶ້ນມາໄດ້ແນວໃດ?
ເລື່ອງການສ້າງໃນຄຳພີໄບເບິນຖືກເຂົ້າໃຈຜິດຢູ່ເລື້ອຍໆຫຼືເຖິງຂັ້ນຖືກເບິ່ງວ່າເປັນພຽງເລື່ອງເລົ່າ. ສິ່ງທີ່ຄຳພີໄບເບິນບອກເຊື່ອຖືໄດ້ບໍ?
ປຶ້ມແລະຈຸນລະສານ
ມີຜູ້ສ້າງສິ່ງທີ່ມີຊີວິດບໍ?
ສິ່ງທີ່ເຈົ້າເຊື່ອກ່ຽວກັບການເລີ່ມຕົ້ນຊີວິດເປັນເລື່ອງທີ່ສຳຄັນ
ກ່ຽວກັບເຮົາ
ຂໍໃຫ້ມີຄົນມາສອນ
ເບິ່ງວ່າຄຳພີໄບເບິນສອນຫຍັງ ຫຼືມາຮູ້ຈັກພະຍານພະເຢໂຫວາຫຼາຍຂຶ້ນ.