Tusadilanga tukau twatu muna yikama mana mevavuanga muna nsambil’eto yo sadisa o wantu. Tuvanganga wo muna lungisa e kani dieto diantete, i sia vo, sadisa o wantu bakituka alandi a Yesu Kristu.—Matai 28:19, 20.

 Ke tusadilanga tukau tweto ko muna vuamisa muntu mosi. Ke tufutanga akuluntu ko ngatu selo vana vena e Mbangi za Yave. Kuna diak’e sambu, ke mosi ko muna Mbangi za Yave ofutwanga muna kwenda mu nzo ke nzo. Awonso besadilanga muna mavula meto, kuna vula diasina kumosi ye Selo Yambuta ke befutwanga nzimbu ko.

•   Vaikisa Nkanda ye Video: Konso mvu, tusekolanga, nieteka yo kayanesa ulolo wa Bibila ye nkanda miankaka lembi lomba nzimbu. Muna nzil’eto ya Internete jw.org kumosi ye aplicativo JW Library, o muntu olenda solola nkanda miayingi yo kulumuna mio lembi futa nzimbu.

•   Tunga yo Lunga-lunga: Tutunganga yo lunga-lunga e fulu ya nsambila mu nz’amvimba kimana e nkutakani zakala ye fulu yambote muna kutakana yo sambila Nzambi. Tutunganga mpe yo lunga-lunga mavula ye nzo zisadilwanga muna salu kia sekola e nkanda mieto. Kiayingi muna salu kiaki kisalwanga kwa wantu bekuyivananga kuna mvevo, ediadi disadisanga mu lembi fwasa nzimbu zayingi ekolo tutunganga yo lunga-lunga e fulu yayi.

•   Mpila ya Sadila Tukau: E salu yawonso isalwanga kuna vula diasina, muna mavula mankaka, nzo zisadilwanga muna salu kia sekola e nkanda mieto kumosi ye salu kisalwanga kwa awana bekangalanga muna kingula e nkutakani, isadilwanga muna lusadisu lwa tukau tuvewanga muna yikama e salu kia nz’amvimba.

•   Salu kia Umbangi: E Mbangi za Yave ke befutwanga ko muna samuna e nsangu zambote yovo longa akaka oma ma “diambu dia Nzambi.” (2 Korinto 2:17) Muna landa e mbandu ya Akristu muna lumbu ya antumwa, akaka besolwanga yo longwa kimana bayivana muna salu kia samuna e nsangu zambote yo vewa filusadisu, i sia vo, fulu kia zingila yo lusadisu muna lungisa e nsatu za lumbu ke lumbu.—Filipi 4:16, 17; 1 Timoteo 5:17, 18.

•   Salu kia Longa: O tukau tusadisanga mpe mu yikama tukutakanu twa zunga ye tukutakanu tweto twa mvivu. Kuna diak’e sambu, tuvaikisanga video ye audio zisasilanga e Bibila. Tuna mpe ye sikola zilonganga akuluntu ye selo yankaka bena muna salu kia ntangwa ke ntangwa kimana batoma lungisa e salu kiau.

•   Salu kia sadisa o wantu: Tuvananga maza, madia ye fulu kia leka kwa awana babwidilu sumbula. E salu kiaki kisadisanga “awana tuna yau entwadi muna lukwikilu” kumosi ye awana bena vo ke Mbangi za Yave ko.—Ngalatia 6:10.