Nani Okwenda Kuna Zulu?
Mvutu za Bibila
Nzambi wasola lutangu lwasikididi lwa wantu akwa kwikizi, ana bena vo vava befwa befutumunua muna kwenda kuna zulu. (1 Petelo 1:3, 4) Vava besolwanga, Akristu awana bafwete tatidila kwikizi kiau yo lemvokela nkanikinu mia Nzambi. Bafwete wo vanga muna lembi vidisa elau diau diakwenda zingila kuna zulu.—Efeso 5:5; Filipi 3:12-14.
Nkia salu wantu awaya bekwenda vanga?
Akristu awana besala kumosi yo Yesu se atinu ye anganga mu 1.000 dia mvu. (Lusengomono 5:9, 10; 20:6) Bekala se “zulu diampa,” i sia vo, luyalu lwa zulu, beyala e “nz’ampa” i sia vo, wantu ana bezingila muna paradiso ova ntoto. Awana beyala kuna zulu, besadisa kimana wantu bakituka balunga, nze una Nzambi kakana kuna lubantiku lwa nsema.—Yesaya 65:17; 2 Petelo 3:13.
Wantu akwa befutumunua muna kwenda zingila kuna zulu?
Bibila kiyikanga wantu 144.000 befutumunua mu kwenda zingila kuna zulu. (Lusengomono 7:4) Muna mona-meso kiasonama muna Lusengomono 14:1-3, Yoane wa ntumwa wamona “Mwan’a meme otelamene vana Mongo a Zione, ana bena yandi 144.000.” Muna mona-meso kiaki, e “Mwan’a meme,” Yesu ona wafulwa kesunzulanga. (Yoane 1:29; 1 Petelo 1:19) O “Mongo a Zione,” usunzulanga wisa kiampwena kia Yesu ye kia 144.000 ma wantu ana beyala yandi.—Nkunga 2:6; Ayibere 12:22.
Akristu awaya ana “babokelwa yo solwa” mu yala yo Yesu kuna zulu beyikilwanga vo “fikambi-kambi.” (Lusengomono 17:14; Luka 12:32) Ediadi disongele vo akete avo batezaneso ye mameme mawonso ma Yesu.—Yoane 10:16.
Ngindu zabendomoka mu kuma kia awana bezingila kuna zulu
Luvunu: Wantu awonso ambote ku zulu bekwenda.
Ludi: Nzambi wasia nsilu vo wantu ambote bezingila yakwele mvu ova ntoto.—Nkunga 37:11, 29, 34.
Yesu wavova vo: “Ke vena muntu ko watomboka kuna zulu.” (Yoane 3:13) Yesu wasonga mpe vo wantu ambote ana bafwa vitila yandi, nze Abarayama, Mose, Yobi ye Davidi ke bayenda ku zulu ko. (Mavangu 2:29, 34) Kansi, wantu awaya bakala ye vuvu kia fulua mu zingila ova ntoto.—Yobi 14:13-15.
O lufuluku lwa awana bekwenda kuna zulu luyikilwanga vo “lufuluku lwantete .” (Lusengomono 20:6) Ediadi disongele vo vekala ye lufuluku lwankaka, luvangama ova ntoto.
Bibila kilonganga vo muna Kintinu kia Nzambi, “o lufwa ke lukala diaka ko.” (Lusengomono 21:3, 4) E nsilu wau ova ntoto ulunganena kadi kuna zulu ke kuna lufwa ko.
Luvunu: Konso muntu olenda sola kana vo ku zulu kekwenda.
Ludi: Nzambi osolanga vana vena Akristu kana vo nani ‘otambula mboka,’ i sia vo, vuvu kia kwenda zingila kuna zulu. (Filipi 3:14) Kiakala vo muntu una ye luzolo lwayingi lwa kwenda zingila kuna zulu, Nzambi osolanga kuna konso muntu kafwete zingila.—Matai 20:20-23.
Luvunu: E vuvu kiazingila va ntoto ke kiambote beni ko. Wantu bezingila va ntoto i awana ke bafwanukini zingila ku zulu ko.
Ludi: Nzambi oyikilanga awana bezingila ova ntoto yakwele mvu vo, “nkangu ame” ye ‘basambulwa kwa Yave.’ (Yesaya 65:21-23) Wantu awana bekala ye lau dialungisa kani dia Nzambi mu kuma kia wantu, i sia vo, wantu awonso bakala balunga yo zinga yakwele mvu muna paradiso ova ntoto.—Tuku 1:28; Nkunga 115:16; Yesaya 45:18.
Luvunu: O lutangu lwa 144.000 ma wantu luyikwanga muna Lusengomono nsisu kwandi kaka, ke lwasikididi ko.
Ludi: Dialudi vo nkand’a Lusengomono uyikanga lutangu lwayingi luna vo nsisu, kansi lutangu lwankaka lwasikididi. Muna bonga e nona, nkand’a Lusengomono uvovelanga “e nkumbu 12 za ntumwa za Mwan’a meme.” (Lusengomono 21:14) Tala nona isonganga vo lutangu lwa 144.000 ma wantu, lwasikididi kibeni.
Sono kia Lusengomono 7:4 kivovanga vo “lutangu lwa awana basiwa e dimbu” yovo awana basolwa mu kwenda zingila kuna zulu, i 144.000 ma wantu. Kuna ntwala, nkand’a Lusengomono uswaswanesanga e buka kiaki ye buka kiankaka. E sono kiaki kiyikanga “ndong’ayingi ina ke ilendi tangwa kwa muntu ko.” Awana bena muna lutangu lwalu lwa “ndong’ayingi,” bevuluzwa mpe kwa Nzambi. (Lusengomono 7:9, 10) Kele vo lutangu lwa 144.000 ma wantu ke lwasikididi ko, e nswaswani vana vena buka yayi yole ke yadi kala mfunu ko. a
Vana ntandu, e buka kia 144.000 ma wantu, kiyikilwanga vo “basumbwa vana vena wantu nze ntomoni.” (Lusengomono 14:4) O mvovo ntomoni, usunzulanga lutangu lwakete lw’awana basolwa. Uyikanga awana bekwenda kuna zulu yo yala kumosi yo Kristu, o lutangu lwa wantu ke lulendi tangwa ko ova ntoto.—Lusengomono 5:10.
a O longi Robert L. Thomas wasoneka mu kuma kia lutangu lwa 144.000 ma wantu luyikwanga muna Lusengomono 7:4 vo: “Lutangu lwalu lwasikididi, nswaswani ye lutangu luyikwanga muna Lusengomono 7:9. Kele vo lutangu lwalu nsisu kwandi kaka, ke vena lutangu ko mu nkanda wau lwadi kala lwasikididi.”—Revelation 1-7: An Exegetical Commentary (Lusengomono 1-7: um Comentário Exegético), lukaya lwa 474.)
Nanga Oyangalela Mpe Malongi Mama
ESSENTIAL BIBLE TEACHINGS
Nki i Kintinu kia Nzambi?
Muna salu kiandi kia umbangi, Yesu watoma vovela oma ma Kintinu kia Nzambi ke mu mambu mankaka ko. Tuka kolo, alongoki andi besambanga kimana e Kintinu kiza.
