Adieyi Bibila Kivovanga mu Kuma kia Fu kia Kaya?
Mvutu za Bibila
Bibila kikutukasakesanga vo twakayilanga akaka kuna mvevo ye twavanganga wo ye kani diasikila. Kisonganga mpe vo e fu kia kaya ke kitwasanga kaka nluta kwa ndiona otambulanga ko, kansi kwa ndiona mpe ovananga. (Ngana 11:25; Luka 6:38) Yesu wavova vo: “E diambu disundidi e kiese i vana, ke mu tambula ko.”—Mavangu 20:35.
Nkia ntangwa e fu kia kaya kiyangidikanga Nzambi?
Nzambi oyangalalanga vava tukayilanga akaka muna luzolo lwa yeto kibeni. Bibila kivovanga vo: “Yambula konso muntu kavanga wauna kakanini muna ntim’andi, ke mu lukatikisu ko ngatu komekenua, kadi Nzambi mvani amvevo kezolanga.”—2 Korinto 9:7, mvovo vana yand’a lukaya.
E fu kia kaya ye nsi a ntima wawonso, i dimosi muna mambu ma “nsambila” itondakananga kwa Nzambi. (Yakobo 1:27) Ndiona osadisanga awana bena muna mpasi, Nzambi keyikamanga. Nzambi obadikilanga e vangu dia muntu ndioyo se mfuka kuna kwa yandi. (Ngana 19:17) Bibila kivovanga vo Nzambi osenda muntu ndioyo.—Luka 14:12-14.
Nkia ntangwa e fu kia kaya kikendelekanga Nzambi?
Avo muntu okayidi mu vava wete dia yandi kibeni. Muna bonga e nona:
Muna sivikisa akaka.—Matai 6:2.
Kimana akaka mpe bankayila.—Luka 14:12-14.
Muna sumba luvuluzu.—Nkunga 49:6, 7.
Avo muntu okayidi mu yikama salu yovo fu ina Nzambi kemenganga. Muna bonga e nona, ke diambote ko mu vana nzimbu kwa muntu una ye fu kia tá mpanza (jogatina), kia sadila droga yovo kolwa malavu. (1 Korinto 6:9, 10; 2 Korinto 7:1) Ke diambote mpe ko mu kaya nzimbu kwa molo.—2 Tesalonika 3:10.
Avo muntu okayilanga akaka yo lembi sia e sungididi kwa esi nzo andi. Bibila kilonganga vo mfumu a nzo kafwete lungisanga e nsatu za esi nzo andi. (1 Timoteo 5:8) Ke diambote ko kwa mfumu a nzo mu kayila akaka lekwa yayingi yo lembi lungisa e nsatu za esi nzo andi. Yesu watumba awana ke basadisanga mase mau ko bakala vo anunu, kansi bavovanga vo yawonso bakala yau yakala se ‘nkayilu kwa Nzambi.’—Maku 7:9-13.