Ingeta. Nzambi osadisanga selo yandi bena vo mbevo. Avo selo kia Nzambi oyelele, Nkand’a Nzambi uvovanga vo: “O Yave okunkindisa vana mfulu a yela.” (Nkunga 41:3) Avo kimbevo kilembi sasukanga una kiau, vena ye mambu matatu malenda kufiaulwisa.

1.   Lomba o nkuma muna sambu. Olenda tambula “luvuvamu lwa Nzambi luna luviokele umbakuzi wawonso,” lulenda vuvika ngindu zaku yo kusadisa mu zizidila e mpasi zaku.—Filipi 4:6, 7.

2.   Kala ye ngindu zambote. Nkand’a Nzambi uvovanga vo: “O ntim’a kiese, nlongo miambote: O ntim’atoloka, visi uyumisa.” (Ngana 17:22) Sevesanga wantu, e diadi dilenda kulula nkenda zaku yo kumika e nitu aku.

3.   Kwikila muna nsilu mia Nzambi. E vuvu kia sikila kilenda kusadisa mu kala ye kiese kana una vo kimbevo kilembi sasukanga una kiau. (Roma 12:12) Nkand’a Nzambi wasakula e ntangwa ina “o ntungi kevova ko vo, yela nyela.” (Yesaya 33:24) Muna ntangwa yayina, Nzambi ofokola yimbevo yawonso, ina madotolo ma unu ke belendanga fokola ko. Kasikil’owu, muna songa una e kinunu kifokokela, Nkand’a Nzambi uvovanga vo: “E nitu andi isundidi o wete ke mu nitu a mwana ko; ovutuka kuna lumbu ya kileke kiandi.”—Yobi 33:25.

 Zaya e diambu edi: Kana una vo yeto Mbangi za Yave tukwikilanga vo Nzambi okutusadisanga, nkumbu miayingi tuvavanga mpe lusadisu lwa madotolo vava tuyelanga kimbevo kilembi sasukanga. (Maku 2:17) Kansi ke tusolelanga muntu ko e mpila mawuku kafwete baka, kadi tuzeye wo vo konso muntu kafwete baka nzengo za yandi kibeni muna diambu dia mawuku ketonda yovo lembi tonda.