Nleke mosi una ye nkumbu Will wavova vo: “Avo kuzeye mpila yambote ko yatangila Bibila, dilenda kuyoyesa.”

 Nga ozolele zaya una olenda kadilanga ye kiese muna tangaga e Bibila? E longi diadi dilenda kusadisa.

•  Tomesa ntangilu aku a Bibila

•  Vavulwila

•  Mana aleke akaka bevovanga

 Ukisia muna mana otanganga. Olenda sadila ndekwa ezi:

1.   Sola lusansu lwa Bibila ozolele longoka. Olenda sola diambu diabwa diyikwanga muna Bibila, mambu mena muna Nsangu Zambote yovo olenda sola kimosi muna fuka ina muna nzil’eto ya jw.org.

2.   Tanga lusansu. Olenda tanga ngeye mosi, ye akundi aku yovo ye yitu yaku muna nding’angolo. Omosi olenda tanga mvovo mia nzingudi a lusansu, vo i ankaka balenda tanga mvovo mia wantu ankaka.

3.   Sadila ndekwa zimosi yovo zizole muna ndekwa zilende:

   •   Vanga babu yafwaniswa mu sasila e ndandani yavangamena lusansu. Soneka mana mevangamanga muna konso babu kia fwaniswa.

   •   Vava otanganga lusansu lwa muntu wasonga e kwikizi, soneka e fu yandi yambote ye mavangu mandi ye nsambu katambula.

   •   Kitula lusansu nze mbokena. Yika mambu maswaswana mana mavangama. Yuvula wantu ana betoma yikwanga mu lusansu lwalu ye akaka mpe.

   •   Yindula mpila yankaka yafokolwela lusansu. Avo vena ye muntu muna lusansu wabaka nzengo zambi, yindula e nluta kadi baka kele vo kabaka nzengo zambote. Muna bonga e nona, yindula vava Petelo kavakulwila Yesu nkalu. (Maku 14:66-72) Nkia diambu diaswaswana Petelo kadi vanga vava banzayidila?

   •   Avo ozolele vanga diambu diankaka, olenda soneka lusansu ngeye mosi muna sadila tusansu tuna muna Bibila. Yika mambu mamfunu olenda longoka muna lusansu lwalu. —Roma 15:4.

 Avo otomene fimpa mambu makete-kete mena muna lusansu, olenda solola mambu mayingi mamfunu. Ezak’e ntangwa, diambu dimosi yovo mambu mole mena muna lusansu luna muna Bibila malenda vanga diambu.

 Muna bonga e nona, tala e sono kia Matai 28:7 ye Maku 16:7.

•    Ekuma Maku kavovela vo Yesu wazola monana ye alongoki andi “yo Petelo”?

•  Ngindu: O Maku kakala vana fulu kiavangamena mambu mama ko; nanga Petelo wanzayisa mo.

•  Diambu diaswekama: Yesu wazola monana diaka yo Petelo. Ekuma diadi diayangidikila Petelo? (Maku 14:66-72) O Yesu aweyi kasongela kwa Petelo vo nkundi akieleka kakala? Aweyi olenda tanginina mbandu a Yesu yo kala nkundi akieleka kwa akaka?

 Avo otomese ntangilu aku a Bibila yo toma fimpulula mambu, otoma yangalela kibeni e ntangilu aku.