Adieyi oyindulanga vava owanga vo “E mbaninu ifinamene?” Nga oyindulanga ngiz’a Masia muna nata wantu ambote kuna zulu yo fila wantu ambi kuna bilungi? Nga lufwa lwa muntu oyindulanga? E ngindu zazi zilenda tokanesa wantu ayingi, zilenda mpe fila akaka mu lembi kwikila yovo badikila zo vo nsaka kwandi.

Bibila kivovanga vo: ‘Mbaninu kwiza ikwiza.’ (Matai 24:14) E mbaninu yayi iyikilwanga mpe vo “lumbu kianene kia Nzambi” ye “Armangedo.” (Lusengomono 16:14, 16) Mabundu mayingi melonganga mambu mabendomoka mu kuma kia mbaninu. Kansi, Bibila kilonganga e ludi mu kuma kia mbaninu. Kikutusadisanga mpe mu kala ye ziku vo e mbaninu ifinamene. Vana ntandu​—Bibila kikutusonganga mana tufwete vanga muna vuluka. Entete, yambula twasasila mambu mabendomoka melongwanga mu kuma kia mbaninu. Nki i mbaninu mun’owu wa Bibila?

1. LUFWASU LWA NTOTO KO MUNA TIYA.

   Bibila kivovanga vo: “[Nzambi] wakuba nkubilwa mia nza, ke yanikunwa yakwele mvu.” (Nkunga 104:5) E sono kiaki ye sono yankaka isonganga e ziku vo Nzambi ke fwasa ntoto ko ngatu yambula vo wafwaswa.​—Kimpovi 1:4; Yesaya 45:18.

2. IKWIZILA KUKINSALUKISA KO.

   Bibila kivovanga vo Nzambi wasikidisa e ntangwa ikwiza e mbaninu. Bibila kivovanga vo: ‘Mu kuma kia lumbu kiakina yovo ola, ke vena muntu ko ozeye kio, kana nkutu ambasi kuna zulu ngatu Mwana, kansi Se kaka. Nutoma tala, nuyingila, kadi ke nuzeye yo ko e ntangwa yasikidiswa.’ (Maku 13:32, 33) Dialudi, o Nzambi (“wa Se”) wasikidisa e “ntangwa” ikwiza e mbaninu.

3. MATADI MA TIYA KO METUKA KUNA ZULU YOVO WANTU BETWASA YO.

   Nki kitwasa e mbaninu? E sono kia Lusengomono 19:11 kivovanga vo: “Mbwene zulu diziwukidi, tala! mvalu ampembe. Ndiona ofongele wo oyikilwanga vo Nkwa Kwikizi ye Ludi.” E tini kia 19 kivovanga vo: ‘Mbwene bulu kiansisi ye ntinu mia nza ye vu ya makesa mau balungalakene kimana banwanisa ndiona ofongele vana mvalu ye vu kiandi kia makesa.’ (Lusengomono 19:11-21) Dialudi vo mambu mankaka mayikilu mu tini yayi sinsu, kansi mu sono kiaki tulenda bakula vo: Nzambi osinga tuma mbasi muna fwasa mbeni zandi.

1. MFOKO A LUYALU LWA WANTU.

   E Bibila kivovanga vo: “Muna lumbu y’atinu awana, o Nzambi ezulu otongeka kintinu [luyalu], kina ke kibangalakeswa ko yakwele mvu,  ngatu vingilwa untinu wandi kwa nkangu akaka; kansi kikosomona yo sukisa yintinu yayi yawonso, kitongama mpe yakwele mvu.” (Daniele 2:44) Nze una tumwene muna diambu dia 3, Nzambi ofwasa e “ntinu mia nza ye vu ya makesa mau” vava “belungalakana kimana banwanisa ndiona ofongele vana mvalu ye vu kiandi kia makesa.”​—Lusengomono 19:19.

2. MFOKO A VITA, UMPUMBULU YE MPASI.

   “[Nzambi] osima vita yakuna nsuk’a nza.” (Nkunga 46:9) “Asongi bekal’omu nsi, alungi besala mo. Yimpumbulu ikendonwa muna nsi, akwa maleko, vuzuka.” (Ngana 2:21, 22) “Tala! mvanga lekwa yawonso se yampa.”​—Lusengomono 21:4, 5.

3. MFOKO A MABUNDU MALUVUNU.

   “Angunza besakula tuvunu, anganga beyadila muna wisa kiau. . . . Aweyi nuvanga muna mbaninu?” (Yeremiya 5:31) “Ndonga bekumpovesa muna lumbu kiakina vo: E Mfumu, e Mfumu, ke yeto ko twasakula muna nkumbu aku, ye muna nkumbu aku twavaikisila nkuya ye muna nkumbu aku twavangila mavangu mayingi mankuma e? I bosi, ikubavovesa vo: Kinuzeye nkutu ko! Nukatuka ova ngina, yeno avangi a umpumbulu!’”​—Matai 7:21-23.

4. LUFWASU LWA WANTU AWONSO BEVANGANGA MAMBU MAMBI.

   Yesu Kristu wavova vo: “I lufundisu lulu, o ntemo wizidi omu nza, kansi wantu balutidi zola tombe, ke mu ntemo ko; kadi mavangu mau mabi.” (Yoane 3:19) Bibila kiyikanga lufwasu lwa nz’amvimba lwavangama muna lumbu ya Noa wa nkwa kwikizi. “E nza ya tandu kiakina yafwaswa vava yazala yo maza. Muna mvovo wau umosi e zulu ye nza ina owau yalundilwa muna tiya, ilundwanga yamuna lumbu kia lufundisu ye kia lufwasu lwa mindembi vumina Nzambi.”​—2 Petelo 3:5-7.

E “lumbu kia lufundisu ye kia lufwasu” kitezaneswanga ye lufwasu lwa “nza” ya tandu kia Noa. Nkia nza yafwaswa? O ntoto ke wafwaswa ko, kansi “akwa luvezo” yovo atantu a Nzambi yau “bafwaswa.” Muna “lumbu kia lufundisu” kia Nzambi​—awana bena vo mbeni za Nzambi—​fwaswa mpe befwaswa. Kansi, akundi a Nzambi bevuluzwa nze una Noa y’esi nzo andi bavuluzilwa.​—Matai 24:37-42.

Yindula una e nza ikala vava Nzambi kefokola yimpumbulu yawonso. Kieleka, e nsangu za Bibila mu kuma kia mbaninu zambote kikilu. Kansi, olenda kukiyuvula: ‘Nga Bibila kiyikanga e ntangwa ina e mbaninu ikwiza? Nga ifinamene? Adieyi mfwete vanga muna vuluka?’