• Kwa Nzambi kesolwa. “Mono kibeni ngiadikidi ntinu ame . . . Ikuvana zula se vua diaku e nsuka za nza se vua diaku.”—Nkunga 2:6, 8.

• Mvingidi a Davidi wa Ntini kekala. Kadi tuwutilu mwana, tuveno mwan’ayakala . . . “O wokela kwa luyalu lwandi, yo luvuvamu vana kunda kia kimfumu kia Davidi ye muna kintinu kiandi, ke kukala nsuka ko, kitoma sikila.”—Yesaya 9:6, 7.

• Kuna Beteleme kewutukila. “Ongeye, Beteleme Eferata . . . , muna ngeye mukumpaikila ndiona oyala . . . “o nene wandi ulwaka yakuna nsuk’a nza.”—Mika 5:2, 4.

• Obembolwa kwa wantu yo vondwa. “Wavezwa, twamwena vo wakondwa o mfunu. . . . “Oyandi watompolwa mu kuma kia makuzuka meto; wakosomonua mu kuma kia bi weto.”—Yesaya 53:3, 5.

• Ofulwa muna mafwa yo kembeswa. “Kukunsisa muna Ziami ko. Kuyambula ko vo munkwikizi aku kamona e wulu. . . . “Kiese kina kuna koko kwaku kwalunene, yakwele mvu.”—Nkunga 16:10, 11.

Muna lusansu lwawonso lwa wantu, muntu mosi kaka wayifwanisa mu kala se Ntinu, o muntu ndioyu i Yesu Kristu. Mbasi mosi wazayisa Maria wa ngudi a Yesu vo: “Nzambi okumvana e kunda kia kimfumu kia Davidi wa se diandi, . . . “e Kintinu kiandi ke kikala ye nsuka ko.”—Luka 1:31-33.

Yesu kalendi yadila ova nza ko. Kansi, oyala wantu awonso tuka kuna zulu se Ntinu a Kintinu kia Nzambi. Nki kiankitula se Nyadi ofwanukini? Tala mana kavanga vava kakala ova ntoto.

•   Yesu wavuanga wantu o mfunu. Yesu wasadisa akala ye akento, ambuta ye aleke, kiakala nkia mpila zingu kiau ye una basansukila. (Matai 9:36; Maku 10:16) Vava nkwa wazi kandodokela vo: “Avo ozolele wo, umpelelesa,” Yesu wamfwila e nkenda yo kunwuka.—Maku 1:40-42.

• Yesu watulonga una tulenda yangidikila Nzambi. Wavova vo: “Ke nulendi kala ntaudi za Nzambi ye Kimvuama ko.” Wavova mpe vo twakadilanga ye akaka nze una tuzolelanga vo bakadila yeto. Vana ntandu, wasonga vo Nzambi ke sianga kaka sungididi ko muna mana tuvanganga kansi, osianga mpe e sungididi mu mana tuyindulanga ye una tumonanga. Ozevo, muna yangidika Nzambi, tufwete lunga-lunganga e ngindu zeto ye ntim’eto. (Matai 5:28; 6:24; 7:12) Yesu wasonga mpe vo, muna kala ye kiese kiakieleka, tufwete zaya mana Nzambi kazolele vo twavanga yo lemvokela mo.—Luka 11:28.

• Yesu walonga o mfunu wa zolanga akaka. E mvovo ye mavangu ma Yesu mankuma makala, masimbanga ntima mia awana banwanga. “E ndonga isivikidi e mpil’andi ya longela, kadi wabalonga nze nkwa wisa.” (Matai 7:28, 29) Wabalonga vo: ‘Nuzolanga e mbeni zeno.’ Kana nkutu vava kakala vana nti ampasi, wasamba muna wete dia awana bakala se akwa kuma muna lufwa lwandi. Wavova vo: “E Tata, ubaloloka, kadi dina bevanganga ke bazeye dio ko.”—Matai 5:44; Luka 23:34.

Yesu yandi kikilu ofwanukini kala se Nyadi a nza yawonso kadi nkwa ngemba ye ovuanga wantu o mfunu. Kansi, nkia ntangwa keyantika o yala?