Mua ntangu fioti tekila Yesu kufua, yandi tubaka mutindu yayi: “Bo talonga Nsangu yai ya Mbote ya Kimfumu na nsitoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto takuisa.” (Matayo 24:14) Kasi yinki mutindu kisalu yango zolaka salama na yinza ya mvimba? Na kulandaka kifuani yina Yesu bikaka ntangu yandi vuandaka awa na ntoto.​—Luka 8:1.

Beto kesalaka ngolo beto kutana na bantu na bayinzo na bau. Yesu monisaka banlonguki na yandi mutindu ya kusamuna nsangu ya mbote yinzo na yinzo. (Matayo 10:11-13; Bisalu 5:42; 20:20) Bapesaka bansamuni ya nsangu ya mbote yango ya ntete bisika yina bafuanaka samuna. (Matayo 10:5, 6; 2 Bakorinto 10:13) Mutindu mosi diaka bubu yayi, kisalu ya beto ya kusamuna mebongisama mbotembote, mpe bakepesaka kimvuka mosimosi kisika yina bafueti samuna. Na mutindu yina, beto kekokisaka mambu Yesu tindaka ya ‘kusamunina bantu mpe kupesa kimbangi mbotembote.’​—Bisalu 10:42.

Beto kesalaka ngolo beto kutana na bantu bisika nionso yina bau kele. Yesu bikaka diaka kifuani na mutindu yandi vuandaka samuna na bisika ya bantu nionso, kifuani na dibongo to na penepene ya dibulu yina bantu kekuizaka tekila maza. (Marko 4:1; Yoane 4:5-15) Beto diaka beto kesololaka na bantu mambu ya Biblia na bisika nionso: na balabala, na wenze, to na nzila ya telefone. Beto kesamuninaka diaka bantu yina kevuandaka pembeni ya beto, bankundi ya beto ya kisalu to ya kalasi, mpe bampangi ya beto ya dibuta, kana diluaku memonana. Vema nionso yina beto kesalaka mesala ti bamilio ya bantu na yinza mvimba kuwa ‘nsangu ya mbote ya luvulusu.’​—Nkunga 96:2.

Yakele na muntu mosi yina nge kesepela kutubila nsangu ya mbote ya Kimfumu ya Nzambi mpe mambote yina yau kenatina yandi na bilumbu kena kuiza? Kulunda ve nsangu ya mbote yango samu na nge mosi. Banda kutubila bantu nsangu yango malumalu!

• Yinki “nsangu ya mbote” beto fueti samuna?

• Yinki mutindu Bambangi ya Yehova kelandaka mutindu yina Yesu vuandaka samunina?