Mutindu nkumbu Yinzo ya Kimfumu memonisa yau, malongi ya Biblia yina kelongamaka kuna metala ntetentete Kimfumu ya Nzambi, yina vuandaka yintu ya diambu yina Yesu tubilaka mingi na malongi na yandi.​—Luka 8:1.

Yau kele bisika ya nsambudulu ya kedika na buala to na kartye. Bayinzo ya Kimfumu yakele bisika yina Bambangi ya Yehova kebongisaka kisalu ya kusamuna nsangu ya mbote ya Kimfumu ya Nzambi. (Matayo 24:14) Bayinzo ya Kimfumu nionso kevuandaka mutindu mosi ve, kansi nionso kevuandaka na bima mingi mingi ve, mpe na bisika mingi, bimvuka mingi kesadilaka Yinzo ya Kimfumu kaka mosi. Na bamvula memanisa luta, beto metunga mafunda ya Bayinzo ya Kimfumu ya yimpa, (beto tuba kilumbu na kilumbu Bayinzo ya Kimfumu tanu ketungamaka) samu bimvuka kena kubuelama kaka. Yau kesalamaka yinki mutindu?​—Matayo 19:26.

Yau ketungamaka na mbongo ya makabu yina mekatuka na yinza ya mvimba. Makabu yango ketindamaka na biro ya filiale samu bimvuka yina fueti tunga to kubongisa Yinzo ya Kimfumu yalenda deva mbongo yango mpe kuvutula yau na manima kondua matabisi.

Yau ketungamaka na bampangi mutindu na mutindu, mpe bakefutaka bau ve. Na bayinsi mingi, Bimvuka ya kutunga Bayinzo ya Kimfumu mebongisama. Bimvuka ya batungi mpe ya bampangi yina kepesaka bau maboko bau kekuendaka tunga Bayinzo ya Kimfumu na babuala mpe na bisika yankaka ya ntama. Bau ketuadisaka kisalu ya kutunga mpe bakesadisaka bampangi ya bisika yango na kisalu ya kutunga Yinzo ya Kimfumu na bau. Na babuala yankaka, Bambangi yina mezaba kisalu ketulamaka samu na kutuadisa kisalu ya kutunga mpe kubongisa Bayinzo ya Kimfumu ya kizunga mosi bamepesa bau. Ata bampangi mingi yina mezaba kisalu bakepesaka maboko na kisika nionso kisalu ya kutunga Yinzo ya Kimfumu kena salama, kisalu ya ngolo kesalamaka nde na bampangi ya kimvuka kisika kisalu kena kusalama. Mpeve ya Yehova mpe vema yina bampangi kesalaka na ntima mosi nde kesalaka ti kisalu yango salama.​—Nkunga 127:1; Bakolosai 3:23.

• Samu na yinki bisika na beto ya nsambudulu mebokudulua Yinzo ya Kimfumu?

• Yinki kesalaka ti Bayinzo ya Kimfumu tungama na yinza ya mvimba?