တၢ်ဂ့ၢ်လၢ အဘၣ်ထွဲလိာ်သးဒီး လံာ်ကုခိၣ် | တၢ်ဒုးတၢ်ယၤန့ၣ် မ့ၢ်ယွၤထံၣ်ဝဲဒ်လဲၣ်
ကစၢ်ယွၤအတၢ်ထံၣ်ဘၣ်ဃးဒီး တၢ်ဒုးတၢ်ယၤ လၢမုၢ်မဆါတနံၤအံၤ
မုၢ်မဆါတနံၤအံၤ ပှၤဟီၣ်ခိၣ်ဖိတဖၣ် ဘၣ်တၢ်ဆီၣ်တံၢ်မၤနၢၤအီၤလီၤ. ပှၤအါဂၤ ကိးပသူထီၣ်ဆူယွၤအအိၣ် ဒီးဆိကမိၣ်ဝဲလၢ မ့ၢ်ယွၤကမၤစၢၤပှၤ တဘျီဘျီဧါ. မ့ၢ်ကစၢ်ယွၤဒိကနၣ် အဝဲသ့ၣ် အတၢ်ကိးပသူထီၣ်ဧါ. မ့မ့ၢ်ပှၤလၢ အဒုးတၢ်ယၤတၢ် ဒ်သိးအဝဲသ့ၣ် ကထူၣ်ဖျဲးထီၣ်လၢ တၢ်ဆီၣ်တံၢ်မၤနၢၤအဂီၢ်န့ၣ် မ့ၢ်ကစၢ်ယွၤထံၣ်အဝဲသ့ၣ်ဒ်လဲၣ်. မ့ၢ်ကစၢ်ယွၤဆီၣ်ထွဲအဝဲသ့ၣ် အတၢ်ဒုးတၢ်ယၤဧါ.
အၢ်မက့းဒိၣ်မ့ၢ်တၢ်ဒုးတခါလၢ ကမၤဟးဂီၤကွံာ်တၢ်ဒုးတၢ်ယၤခဲလၢာ်လီၤ
အဆိကတၢၢ်န့ၣ် နကဘၣ်သ့ၣ်ညါ တၢ်မ့ၢ်တၢ်တီတခါလီၤ. ကစၢ်ယွၤထံၣ်ဘၣ်ဝဲ တၢ်နးတၢ်ဖှီၣ် လၢ ပှၤဟီၣ်ခိၣ်ဖိတူၢ်ဘၣ်ဝဲတဖၣ် ဒီးအသးအိၣ်မၤစၢၤအဝဲသ့ၣ်လီၤ. (စံးထီၣ်ပတြၢၤ ၇၂:၁၃, ၁၄) လၢလံာ်စီဆှံအပူၤန့ၣ် ကစၢ်ယွၤအၢၣ်လီၤဝဲလၢ ‘ပှၤလၢအဘၣ်တၢ်နးတၢ်ဖှီၣ်သုဝဲသ့ၣ်အံၤ . . . သုကန့ၢ်ဘၣ်တၢ်အိၣ်ဘှံး’ လီၤ. အဝဲသ့ၣ် ကဒိးန့ၢ်ဘၣ်တၢ်အိၣ်ဘှံးလၢ အဆၢကတီၢ်ဖဲလဲၣ်. “ဖဲကစၢ်ယ့ၣ်ၡူးအိၣ်ဖျါထီၣ်လၢမူခိၣ် အိၣ်ဒီးအကလူး . . . အကဟ့ၣ်ဆၢ တၢ်လၢပှၤတသ့ၣ်ညါဘၣ်ယွၤ, ဒီးပှၤတစူၢ်ဘၣ် ပကစၢ်ယ့ၣ်ၡူးခရံာ် အတၢ်သးခုအကစီၣ်အကတီၢ်လီၤ.” (၂ သ့းစၤလနံ ၁:၇, ၈) လံာ်စီဆှံစံးဝဲလၢ ဖဲယ့ၣ်ၡူးလီၣ်ဖျါထီၣ်အသးန့ၣ် “တၢ်ဒုးတၢ်ယၤဘၣ်ဃးဒီးယွၤလၢ အသ့တၢ်လၢာ်အနံၤဖးဒိၣ်” ကကဲထီၣ်အသးလီၤ. ဒီးတၢ်ဒုးအဝဲအံၤဘၣ်တၢ်သ့ၣ်ညါစ့ၢ်ကီးအီၤလၢ အၢ်မက့းဒိၣ် အတၢ်ဒုးန့ၣ်လီၤ.—လီၣ်ဖျါ ၁၆:၁၄, ၁၆.
ခါဆူညါ ဖဲတၢ်ဒုးဖးဒိၣ်အံၤဟဲကဲထီၣ်အသး အဆၢကတီၢ်န့ၣ် ကစၢ်ယွၤတသူဝဲ ပှၤဟီၣ်ခိၣ်ဖိလၢကဒုးဝဲပှၤအၢပှၤသီတဖၣ်ဘၣ်. ယွၤကသူဝဲ အဖိခွါယ့ၣ်ၡူးခရံာ် ဒီးပှၤနီၢ်သးဖိလၢအဂံၢ်ဆူၣ်ဘါဆူၣ်တဖၣ် ဒ်သိးကဒုးတၢ်ဒီး ပှၤအၢပှၤသီ ဒီးမၤဟးဂီၤကွံာ်တၢ်ဆီၣ်တံၢ်မၤနၢၤခဲလၢာ်န့ၣ်လီၤ.—ယၡါယၤ ၁၁:၄; လီၣ်ဖျါ ၁၉:၁၁-၁၆.
တုၤလီၤလၢမုၢ်မဆါတနံၤအံၤ ယွၤအတၢ်ထံၣ်လၢ အဘၣ်ဃးဒီး တၢ်ဒုးတၢ်ယၤန့ၣ် တဆီတလဲဝဲဘၣ်. ကစၢ်ယွၤထံၣ်ဝဲလၢ တၢ်ဒုးတၢ်ယၤန့ၣ်မ့ၢ်ကျဲတဘိလၢ အကမၤကတၢၢ်ကွံာ်တၢ်ဆီၣ်တံၢ်မၤနၢၤဒီး တၢ်အၢတၢ်သီန့ၣ်လီၤ. ဘၣ်ဆၣ်သနာ်က့ ဒ်လၢအပူၤကွံာ်အသိး ပှၤကဘၣ်ဒုးတၢ်လၢ အဆၢကတီၢ်ဖဲလဲၣ် ဒီး မတၤတဖၣ် ကဘၣ်ဒုးတၢ်လဲၣ်န့ၣ် ထဲယွၤတဂၤဧိၤ ဆၢတဲာ်ဝဲသ့လီၤ. ဒီးပမၤလိဘၣ်လၢ ကစၢ်ယွၤဃုထၢပာ်စၢၤဝဲတၢ်ဆၢကတီၢ်လၢ အဝဲကမၤကၣ်တၢ်လၢ ပှၤလၢအဘၣ်တၢ်ဆီၣ်တံၢ်မၤနၢၤတဖၣ်အဂီၢ် ဒီးမၤဟးဂီၤကွံာ်တၢ်အၢတၢ်သီလီၤ. တကးဒံးဘၣ် ကစၢ်ယွၤဃုထၢပာ်စၢၤဝဲ အဖိခွါယ့ၣ်ၡူးလၢအကဒုးတၢ်ဒီး
ပှၤအၢပှၤသီတဖၣ်န့ၣ်လီၤ. လၢတၢ်န့ၣ်အဃိ ပသ့ၣ်ညါဘၣ်လၢ တၢ်ဒုးတၢ်ယၤလၢ အဟဲကဲထီၣ်အသးလၢဟီၣ်ခိၣ်ချၢသ့ၣ်တဖၣ်အံၤန့ၣ် မ့ၢ်အိၣ်ဒီးတၢ်ဂ့ၢ်လၢအဂ့ၤထဲလဲၣ်သနာ်က့ တမ့ၢ်တၢ်ဒုးလၢအဘၣ်ယွၤအသးဘၣ်.တၢ်အဒိအတဲာ်တခါ– ဆိကမိၣ်ကွၢ်ပှၤဒီပုၢ်ဝဲၢ်ခွါခံဂၤလၢ အထိလိာ်အသးဖဲအပၢ်တအိၣ်လၢဟံၣ်အခါန့ၣ်တက့ၢ်. အဝဲသ့ၣ်အိၣ်ပတုာ်ဝဲတစိၢ်ဖိဒီး ကိးအပၢ်လၢလီတဲစိ ဒီးတဲဘၣ်ဝဲအပၢ်လၢ တၢ်ဂ့ၢ်တၢ်ကျိၤန့ၣ်လီၤ. အဖိခွါအဆံးတဂၤတဲဝဲလၢ အကၠီစးထီၣ်ထိအီၤလၢညါ ဒီးမ့မ့ၢ်အကၠီစံးဝဲလၢ အပုၢ်ဟဲမၤအီၤလၢညါန့ၣ်လီၤ. အဝဲသ့ၣ်ခံဂၤလၢာ် မုၢ်လၢ်ဝဲလၢအပၢ်ကအိၣ်ဃူဒီးအီၤန့ၣ်လီၤ. ဘၣ်ဆၣ်သနာ်က့ ဖဲအပၢ်နၢ်ဟူဘၣ်အဝဲသ့ၣ်အတၢ်ဂ့ၢ်ဝံၤအလီၢ်ခံန့ၣ် အပၢ်စံးဘၣ်အဝဲသ့ၣ်လၢ ထိလိာ်သုသးလၢၤတဂ့ၤ ဒီးအိၣ်ခိးတုၤလၢယဟဲက့ၤတက့ၢ်. အဝဲသ့ၣ်ခံဂၤ အိၣ်ခိးဝဲအပၢ်တစိၢ်ဖိလီၤ. ဘၣ်ဆၣ် အဝဲသ့ၣ်စးထီၣ်ထိလိာ်အသး လၢအသီတဘျီလီၤ. ဖဲအပၢ်ဟဲက့ၤတုၤလၢဟံၣ်အခါန့ၣ် သးဒိၣ်ထီၣ်ဝဲ အဖိခံဂၤလၢာ်လီၤ. ဒီးအပၢ်ဟ့ၣ်အဝဲသ့ၣ် တၢ်စံၣ်ညီၣ် မ့ၢ်လၢအဝဲသ့ၣ် တဒိကနၣ်အကလုၢ်အဃိလီၤ.
မုၢ်မဆါတနံၤအံၤ ပှၤလၢအဒုးတၢ်ယၤတၢ်သ့ၣ်တဖၣ်န့ၣ် ဃ့တၢ်မၤစၢၤ လၢကစၢ်ယွၤအအိၣ်န့ၣ်လီၤ. ဘၣ်ဆၣ် ယွၤတအိၣ်ဃူဒီးမၤစၢၤ အဝဲသ့ၣ်နီတကပၤဘၣ်. လံာ်စီဆှံပာ်ဖျါထီၣ်န့ၢ်ပှၤလၢ– “သုတမၤဆၢတၢ်အၢလၢတၢ်အၢ, လၢပှၤနီတဂၤတဂ့ၤ” ဒီး “သုတမၤကၣ်တၢ်, လၢသုဂီၢ်ဒၣ်သုဝဲတဂ့ၤ.” (ရိမ့ၤ ၁၂:၁၇, ၁၉) တကးဒံးဘၣ် ကစၢ်ယွၤဒုးသ့ၣ်ညါဝဲ ပှၤဟီၣ်ခိၣ်ဖိတဖၣ်လၢ အဝဲသ့ၣ်ကဘၣ် “အိၣ်ခိးကွၢ်လၢ်အီၤ လၢတၢ်ဝံသးစူၤအပူၤ” တုၤလီၤလၢ အၢ်မက့းဒိၣ်တၢ်ဒုးအဆၢကတီၢ်န့ၣ်လီၤ. (စံးထီၣ်ပတြၢၤ ၃၇:၇) ဖဲပှၤဟီၣ်ခိၣ်ဖိတဖၣ် မၤဖဲအသးဒီး ဒုးလိာ်ယၤလိာ်သးအခါ ကစၢ်ယွၤအသးအုးဝဲဒိၣ်မးလီၤ. လၢအၢ်မက့းဒိၣ်အဆၢကတီၢ်န့ၣ် ကစၢ်ယွၤကပာ်ဖျါထီၣ်အတၢ်သးဒိၣ် ဒီးကမၤကတၢၢ်ကွံာ် ထံကီၢ်အတၢ်သဘံၣ်သဘုၣ်ခဲလၢာ် ခီဖျိလၢအဝဲက “ဒုးအိၣ်ကတီၢ်တၢ်ဒုးတၢ်ယၤတဖၣ် တုၤလၢဟီၣ်ခိၣ်အကတၢၢ်လီၤ.” (စံးထီၣ်ပတြၢၤ ၄၆:၉; ယၡါယၤ ၃၄:၂) အၢ်မက့းဒိၣ်န့ၣ် မ့ၢ်ဝဲတၢ်ဒုးတၢ်ယၤတခါလၢ အကမၤကတၢၢ်ကွံာ်ဝဲ တၢ်ဒုးတၢ်ယၤခဲလၢာ်န့ၣ်လီၤ.
တၢ်မၤကတၢၢ်ကွံာ်တၢ်ဒုးတၢ်ယၤန့ၣ် မ့ၢ်ဝဲတၢ်ဆိၣ်ဂ့ၤတခါလၢ ကစၢ်ယွၤအဘီအမုၢ်ကဟ့ၣ်ပှၤန့ၣ်လီၤ. ဘၣ်ဃးဒီးဘီမုၢ်အံၤန့ၣ် ယ့ၣ်ၡူးဃ့ဘါထုကဖၣ်ဝဲလၢ– “နဘီနမုၢ်န့ၣ်မ်အဟဲတက့ၢ်. ဒ်လၢမူခိၣ်အသိးန့ၣ် မ်တၢ်မၤအသးလၢ ဟီၣ်ခိၣ်ချၢစ့ၢ်ကီး ဖဲဒၣ်နသးတက့ၢ်.” (မးသဲ ၆:၉, ၁၀) ကစၢ်ယွၤအဘီအမုၢ် ကမၤကတၢၢ်ကွံာ်တၢ်ဒုးတၢ်ယၤ တကးဒံးဘၣ် ကမၤလီၤမၢ်ကွံာ်ဝဲ တၢ်အၢတၢ်သီလၢအဒုးအိၣ်ထီၣ်ဝဲ တၢ်ဒုးတၢ်ယၤန့ၣ်လီၤ. * (စံးထီၣ်ပတြၢၤ ၃၇:၉, ၁၀, ၁၄, ၁၅) လၢတၢ်န့ၣ်အဃိ ယ့ၣ်ၡူးခရံာ်အပျဲၢ်အဘီၣ်သ့ၣ်တဖၣ် အိၣ်ခိးကွၢ်ဝဲ တၢ်ဆိၣ်ဂ့ၤလၢကစၢ်ယွၤအဘီအမုၢ် ကဟ့ၣ်လီၤဝဲန့ၣ်လီၤ.—၂ ပ့းတရူး ၃:၁၃.
ယွၤအဘီအမုၢ်လၢ အကမၤလီၤမၢ်ကွံာ်ဝဲ တၢ်နးတၢ်ဖှီၣ်, တၢ်အၢတၢ်သီဒီး တၢ်ဆီၣ်တံၢ်မၤနၢၤတဖၣ်န့ၣ် ပကဘၣ်အိၣ်ခိးအီၤဆံးယံာ်လဲၣ်. ဝံအတၢ်စံးပာ် ပာ်ဖျါထီၣ်ဝဲလၢ ပအိၣ်မူဘၣ်လၢ “မုၢ်နံၤအခံအတၢၢ်” အဆၢကတီၢ်န့ၣ်လီၤ. (၂ တံၤမသ့း ၃:၁-၅) * တယံာ်လၢၤဘၣ် မုၢ်နံၤခံကတၢၢ်ကကတၢၢ်ကွံာ်ဝဲ ဖဲယွၤအဘီအမုၢ်မၤလီၤမၢ်ကွံာ်ဝဲ တၢ်အၢတၢ်သီခဲလၢာ်လၢ အၢ်မက့းဒိၣ်တၢ်ဒုးအဆၢကတီၢ်န့ၣ်လီၤ.
ဒ်လံာ်တဘ့ၣ်အံၤ ပာ်ဖျါထီၣ်တ့ၢ်ဝဲအသိး ပှၤလၢအတဒိကနၣ် “ယ့ၣ်ၡူးခရံာ် အတၢ်သးခုအကစီၣ်” န့ၣ်ကဘၣ်တၢ်မၤဟးဂီၤကွံာ်အဝဲသ့ၣ် ဖဲအၢ်မက့းဒိၣ်တၢ်ဒုးအခါန့ၣ်လီၤ. (၂ သ့းစၤလနံ ၁:၈) ဘၣ်ဆၣ်, နကဘၣ်သ့ၣ်နီၣ်ထီၣ်က့ၤလၢ ကစၢ်ယွၤန့ၣ်တအဲၣ်ဒိးဝဲလၢ ပှၤအၢပှၤသီဒၣ်လဲာ် ကတုၤလၢတၢ်သံနီတဂၤဘၣ်. (ယဃ့းစက့လး ၃၃:၁၁) မ့ၢ်လၢအဝဲ “တဘၣ်ဘၣ်အသးလၢ ပှၤကတုၤလၢတၢ်ဟးဂူာ်ဟးဂီၤနီတဂၤဘၣ်” အဃိတၢ်သးခုကစီၣ်လၢ ဘၣ်ဃးဒီးယ့ၣ်ၡူးန့ၣ် “ကဘၣ်တၢ်စံၣ်တဲၤတဲလီၤအီၤ လၢဟီၣ်ခိၣ်ဒီဘ့ၣ်ညါ” တချုးလၢတၢ်ကတၢၢ်ဟဲဘၣ်ဝဲအဆၢကတီၢ်လီၤ. (၂ ပ့းတရူး ၃:၈, ၉; မးသဲ ၂၄:၁၄; ၁ တံၤမသ့း ၂:၃, ၄) ခီဖျိလၢ ယဟိဝၤပှၤအုၣ်အသးတဖၣ် စံၣ်တဲၤတဲလီၤတၢ်လၢ ဟီၣ်ခိၣ်ဒီဘ့ၣ်အဃိ မုၢ်မဆါတနံၤအံၤ ပှၤဟီၣ်ခိၣ်ဖိတဖၣ် အိၣ်ဒီးတၢ်ခွဲးတၢ်ယာ်လၢ ကသ့ၣ်ညါဘၣ်ယဟိဝၤယွၤအဂ့ၢ် ဒီးကဒိကနၣ်တၢ်သးခုကစီၣ်ဘၣ်ဃးဒီးယ့ၣ်ၡူးခရံာ်န့ၣ်လီၤ. ပှၤသ့ၣ်တဖၣ်အံၤ မ့ၢ်မၤဝဲဒ်န့ၣ်ဒီး အဝဲသ့ၣ်ကအိၣ်မူဘၣ်ဝဲပၢၢ်တုၤလၢ မုၢ်နံၤလၢ တၢ်ဒုးတၢ်ယၤတအိၣ်လၢၤအဆၢကတီၢ်န့ၣ်လီၤ.
^ လံာ်အဆၢ. 9 ယွၤအဘီအမုၢ်ကမၤလီၤမၢ်ကွံာ်ဝဲ ဒုၣ်ဒါလၢအမ့ၢ်တၢ်သံန့ၣ်လီၤ. ကစၢ်ယွၤကဒုးဂဲၤဆၢထၢၣ်သမူထီၣ်က့ၤ ပှၤသံတဖၣ် ပၣ်ဃုာ်ဒီးပှၤလၢအသံလၢ တၢ်ဒုးတၢ်ယၤအပူၤန့ၣ်လီၤ.
^ လံာ်အဆၢ. 10 နမ့ၢ်အဲၣ်ဒိးသ့ၣ်ညါအါထီၣ် တၢ်ဂ့ၢ်လၢအဘၣ်ဃးဒီးမုၢ်နံၤခံကတၢၢ်န့ၣ် ကွၢ်လံာ်လၢယဟိဝၤပှၤအုၣ်အသးတဖၣ်ထုးထီၣ်ဝဲ လံာ်စီဆှံသိၣ်လိတၢ်နီၢ်နီၢ် မ့ၢ်မနုၤလဲၣ် တၢ်နီၤဖး ၉ တက့ၢ်.