အၢ်မက့းဒိၣ် အတၢ်ဒုးန့ၣ် မ့ၢ်မနုၤလဲၣ်
လံာ်စီဆှံ တဲဝဲလၢ
အၢ်မက့းဒိၣ် အတၢ်ဒုးန့ၣ် မ့ၢ်ဝဲ တၢ်ဒုးအလီၢ်ခံကတၢၢ်တခါလၢ ပှၤဟီၣ်ခိၣ်ဖိ အပဒိၣ်ပပှၢ်တဖၣ် ဒီးကစၢ်ယွၤ ကဒုးလိာ်သးလီၤ. ပဒိၣ်ပပှၢ်သ့ၣ်တဖၣ်အံၤ ဒီးပှၤလၢ အဆီၣ်ထွဲအဝဲသ့ၣ်န့ၣ် ထီဒါဝဲ ကစၢ်ယွၤ တုၤလီၤလၢ ခဲအံၤ ခီဖျိအဝဲသ့ၣ် တဒိးပၢအသးလၢ ကစၢ်ယွၤ အတၢ်ပၢဖီလာ်ဘၣ်. (စံးထီၣ်ပတြၢၤ ၂:၂) အၢ်မက့းဒိၣ် အတၢ်ဒုးန့ၣ် ကမၤဟးဂီၤကွံာ်ဝဲ ပှၤဟီၣ်ခိၣ်ဖိ အတၢ်ပၢတၢ်ပြးတဖၣ်လီၤ.—ဒၤနံးယ့လး ၂:၄၄.
တၢ်ကတိၤလၢအမ့ၢ် “အၢ်မက့းဒိၣ်” န့ၣ်ပထံၣ်ဘၣ်အီၤ လၢလံာ်စီဆှံအပူၤ ထဲတဘျီဖဲ လီၣ်ဖျါ ၁၆:၁၆. ဖဲလီၣ်ဖျါအပူၤန့ၣ် ဝံအတၢ်စံးပာ် ပာ်ဖျါထီၣ်ဝဲလၢ “စီၤပၤတဖၣ်လၢ အအိၣ်လၢ ဟီၣ်ခိၣ်ဒီဘ့ၣ်” န့ၣ် “ကပာ်ဖှိၣ်ထီၣ် . . .အသး ဖဲသ့တၢ်လၢာ်ကစၢ်ယွၤ အမုၢ်နံၤဖးဒိၣ်” လၢ “တၢ်လီၢ်လၢ အဘၣ်တၢ်ကိးအီၤလၢ ဧ့ၤဘြံၤအကျိာ်လၢ အၢ်မက့းဒိၣ်.”—လီၣ်ဖျါ ၁၆:၁၄.
မတၤသ့ၣ်တဖၣ် ကဒုးတၢ်ဖဲ အၢ်မက့းဒိၣ်လဲၣ်. ယ့ၣ်ၡူးခရံာ် ကတီခိၣ်ရိၤမဲ မူခိၣ်အသုးမုၢ်သံၣ်ဘိ လၢကမၤနၢၤကွံာ် ကစၢ်ယွၤအဒုၣ်အဒါတဖၣ် အဂီၢ်လီၤ. (လီၣ်ဖျါ ၁၉:၁၁-၁၆, ၁၉-၂၁) ကစၢ်ယွၤ အဒုၣ်အဒါသ့ၣ်တဖၣ်န့ၣ် မ့ၢ်ဝဲ ပှၤလၢအထီဒါ ကစၢ်ယွၤအတၢ်ပၢတၢ်ပြး ဒီးမ့ၢ်ပှၤတဖၣ်လၢ အတပာ်ကဲ ကစၢ်ယွၤဘၣ်.—ယဃ့းစက့လး ၃၉:၇.
အၢ်မက့းဒိၣ် အတၢ်ဒုးန့ၣ် ကကဲထီၣ်အသးဖဲ မုၢ်ထီၣ်တၢ်ခၢၣ်သးလီၢ်ကဝီၤဧါ. တမ့ၢ်ဘၣ်. အၢ်မက့းဒိၣ် အတၢ်ဒုးန့ၣ် တမ့ၢ်လၢ အကကဲထီၣ်အသးလၢ တၢ်လီၢ်ထဲတတီၤဘၣ်. အကကဲထီၣ်အသး လၢဟီၣ်ခိၣ်ဒီဘ့ၣ်.—ယံးရမံယၤ ၂၅:၃၂-၃၄; ယဃ့းစက့လး ၃၉:၁၇-၂၀.
လၢဧ့ၤဘြံၤကျိာ်န့ၣ် အၢ်မက့းဒိၣ် အခီပညီမ့ၢ်ဝဲ “ကစၢၢ်မကံးဒိၤ.” မကံးဒိၤန့ၣ် တဘျီခါ အမ့ၢ်တ့ၢ် ဝ့ၢ်တဖျၢၣ်လၢ အအိၣ်လၢ လၢပျၢၤကီၢ်အံၣ်စရ့အပူၤ. တၢ်စံၣ်စိၤတဲစိၤ ပာ်ဖျါထီၣ်ဝဲလၢ တၢ်ဒုးတဖၣ် ကဲထီၣ်တ့ၢ်အသးဖဲန့ၣ် ဒီးတၢ်လီၢ်လၢ အခိၣ်အဃၢၤတဖၣ်လီၤ. တကးဒံးဘၣ် တၢ်ဒုးတနီၤန့ၣ် ဘၣ်တၢ်ကွဲးနီၣ်အီၤ လၢလံာ်စီဆှံအပူၤ စ့ၢ်ကီးလီၤ. (စံၣ်ညီၣ်ကွီၢ် ၅:၁၉, ၂၀; ၂ စီၤပၤ ၉:၂၇; ၂၃:၂၉) ဘၣ်ဆၣ် အၢ်မက့းဒိၣ် လၢလီၣ်ဖျါအပူၤအံၤန့ၣ် တအဲၣ်ဒိးတဲဝဲ တၢ်လီၢ်နီၢ်ကီၢ်တတီၤလၢ အအိၣ်ဖဲ ဝ့ၢ်မကံးဒိၤလၢပျၢၤ အခိၣ်အဃၢၤဘၣ်. ဖဲတၢ်လီၢ်အဝဲန့ၣ်န့ၣ် ကစၢၢ်ဖးဒိၣ် တအိၣ်ဘၣ်. ဒီးပှၤကိးဂၤဒဲးလၢ အကဒုးထီဒါ ကစၢ်ယွၤန့ၣ် မ့ၢ်လဲၤပာ်ဖှိၣ်ထီၣ်အသးဖဲ ယံးစရ့လးအတၢ်ပၢၤခိၣ် ဒီတဘ့ၣ် သနာ်က့ တတြီၢ်ဘၣ်. အဃိ အၢ်မက့းဒိၣ်န့ၣ် အအဲၣ်ဒိးတဲဝဲ တၢ်ဒုးလၢ ပှၤကလုာ်တဖၣ် ကပာ်ဖှိၣ်ထီၣ်သးဒီး ထီဒါဝဲ ကစၢ်ယွၤ အတၢ်ပၢတၢ်ပြးလၢ အလီၢ်ခံကတၢၢ် တဘျီလီၤ.
ဖဲအၢ်မက့းဒိၣ် အတၢ်ဒုးအဆၢကတီၢ်န့ၣ် တၢ်ကမၤအသးဒ်လဲၣ်. လၢအပူၤကွံာ်န့ၣ် ကစၢ်ယွၤသူဝဲ သူၣ်, ဟီၣ်ခိၣ်ဟူး, ထံလုၢ်ဘၢတၢ်, မ့ၣ်အူဒီးကး, လီဝၢ်ဒံး ဒီးတၢ်ဆူးတၢ်ဆါ ဒ်သိးကမၤဟးဂီၤ အဒုၣ်အဒါအဂီၢ်. ဘၣ်ဆၣ် ဖဲအၢ်မက့းဒိၣ် အဆၢကတီၢ် ကစၢ်ယွၤ ကသူအတၢ်စိတၢ်ကမီၤ ဒ်လဲၣ်န့ၣ် ပတသ့ၣ်ညါဘၣ်. (ယိၤဘး ၃၈:၂၂, ၂၃; ယဃ့းစက့လး ၃၈:၁၉, ၂၂; ဃဘးကူာ် ၃:၁၀, ၁၁; စကၤရယၤ ၁၄:၁၂) ဖဲန့ၣ်န့ၣ် ကစၢ်ယွၤ ကမၤဘံဘူ အဒုၣ်အဒါတနီၤ အခိၣ်နူာ် ဒ်သိးအဝဲသ့ၣ် ကဒုးလိာ်က့ၤအသး ကဒဲကဒဲလီၤ. ဒ်လဲၣ်ဂ့ၤဒ်လဲၣ်ဂ့ၤ လၢခံကတၢၢ်န့ၣ် အဝဲသ့ၣ် ကသ့ၣ်ညါလီၤအသးလၢ အဝဲသ့ၣ်ဒုးတၢ်ဒီး ကစၢ်ယွၤလီၤ.—ယဃ့းစက့လး ၃၈:၂၁, ၂၃; စကၤရယၤ ၁၄:၁၃.
အၢ်မက့းဒိၣ် အတၢ်ဒုးန့ၣ် ကမၤဟးဂီၤကွံာ် ဟီၣ်ခိၣ်ဧါ. ပဟီၣ်ခိၣ်တဖျၢၣ်အံၤ မ့ၢ်ပှၤဟီၣ်ခိၣ်ဖိ အတၢ်အိၣ်တၢ်ဆိးအလီၢ် အထူအယိာ်အဃိ တၢ်ဒုးအံၤ တမၤဟးဂီၤကွံာ် ပဟီၣ်ခိၣ်ဘၣ်. (စံးထီၣ်ပတြၢၤ ၃၇:၂၉; ၉၆:၁၀; စံၣ်တဲၤတဲလီၤတၢ် ၁:၄) လံာ်စီဆှံ ပာ်ဖျါထီၣ်ဝဲလၢ ကစၢ်ယွၤ အခ့အပှၤလၢအမ့ၢ် “ပှၤဂီၢ်မုၢ်ဖးဒိၣ်” န့ၣ်ကပူၤဖျဲးဝဲအဃိ ပသ့ၣ်ညါဘၣ်လၢ အၢ်မက့းဒိၣ် အတၢ်ဒုးန့ၣ် တမၤဟးဂီၤကွံာ်ဝဲ ပဟီၣ်ခိၣ်ဘၣ်.—လီၣ်ဖျါ ၇:၉, ၁၄; စံးထီၣ်ပတြၢၤ ၃၇:၃၄.
တဘျီတခီၣ် လံာ်စီဆှံသူဝဲ တၢ်ကတိၤလၢအမ့ၢ် “ဟီၣ်ခိၣ်” န့ၣ်အဲၣ်ဒိးတဲဝဲ ပှၤဟီၣ်ခိၣ်ဖိ လၢအအၢအသီတဖၣ် လၢအထီဒါ ကစၢ်ယွၤ. (၁ ယိၤဟၣ် ၂:၁၅-၁၇) အဃိ အၢ်မက့းဒိၣ် ကမၤဟးဂီၤကွံာ် “ဟီၣ်ခိၣ်” န့ၣ်အဲၣ်ဒိးတဲဝဲ အကမၤဟးဂီၤကွံာ်ဝဲ ပှၤဟီၣ်ခိၣ်ဖိ လၢအအၢအသီတဖၣ်လီၤ.—မးသဲ ၂၄:၃, မ့ၤစံၣ် လံာ်စီဆှံ.
အၢ်မက့းဒိၣ် အတၢ်ဒုးန့ၣ် ကကဲထီၣ်အသး အခါဖဲလဲၣ်. အၢ်မက့းဒိၣ် အတၢ်ဒုး ကစးထီၣ်သးဖဲ “တၢ်နးတၢ်ဖှီၣ်ဖးဒိၣ်” ကကတၢၢ်ဘူးထီၣ်အခါ. ဒီးဘၣ်ဃးဒီး တၢ်ဆၢကတီၢ်အဝဲန့ၣ် ယ့ၣ်ၡူးတဲဝဲလၢ “ဘၣ်ဃးဒီး မုၢ်နံၤအဝဲန့ၣ် ဒီးနၣ်ရံၣ်အဝဲန့ၣ် ပှၤတသ့ၣ်ညါ နီတဂၤဘၣ်. မူခိၣ်ကလူးတဖၣ်လၢ မူခိၣ်မ့ၢ်ဂ့ၤ, ဖိခွါမ့ၢ်ဂ့ၤ တသ့ၣ်ညါဝဲဘၣ်. သ့ၣ်ညါထဲဒၣ် ပၢ်တဂၤလီၤ.” (မးသဲ ၂၄:၂၁, ၃၆) လံာ်စီဆှံ ပာ်ဖျါထီၣ်ဝဲလၢ အၢ်မက့းဒိၣ် အတၢ်ဒုး ကကဲထီၣ်အသးဖဲ ယ့ၣ်ၡူး ဟဲက့ၤအိၣ်ဒီးပှၤအတီၢ်ပူၤ တတီၤတီၤ ဒီးယ့ၣ်ၡူး ဟဲက့ၤအိၣ်ဒီးပှၤန့ၣ် စးထီၣ်အသးဖဲ ၁၉၁၄ တုၤလၢ ခဲအံၤလီၤ.—မးသဲ ၂၄:၃၇-၃၉.