လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ ပကအိၣ်ကတဲာ်ကတီၤပသးလၢ ပကဟ့ၣ်တၢ်အဂီၢ် ဒီးပကဘၣ်ဟ့ၣ်တၢ်လၢ တၢ်သးအိၣ်အပူၤ. အဃိ ပှၤလၢအဟ့ၣ်တၢ်မ့ၢ်ဂ့ၤ ပှၤလၢအဒိးန့ၢ်ဘၣ်တၢ်မ့ၢ်ဂ့ၤ အဝဲသ့ၣ်ခံဂၤလၢာ်န့ၣ် ကဒိးန့ၢ်ဘၣ်တၢ်သးခု. (ကတိၤဒိ ၁၁:၂၅; လူၤကၣ် ၆:၃၈) ယ့ၣ်ၡူးတဲဝဲလၢ “ဟ့ၣ်တၢ်န့ၣ် ဒုးအိၣ်ထီၣ် တၢ်သးခုအါန့ၢ်ဒံး ဒိးန့ၢ်ဘၣ်တၢ်ဒံးလီၤ.”—မၤတၢ် ၂၀:၃၅.

•  ပဟ့ၣ်တၢ်န့ၣ် ကကဲဘျုးလၢ အခါဖဲလဲၣ်

•  တၢ်ဟ့ၣ်လၢအတဘၣ် ကစၢ်ယွၤအသးဘၣ်န့ၣ် မ့ၢ်တၢ်ဟ့ၣ်ဒ်လဲၣ်တကလုာ်လဲၣ်

•  လံာ်စီဆှံအဆၢတဖၣ်လၢ အဘၣ်ဃးဒီး တၢ်ဟ့ၣ်တၢ်

 ပမ့ၢ်ဟ့ၣ်တၢ်လၢ တၢ်သးအိၣ်န့ၣ် ကကဲဘျုးဝဲ. လံာ်စီဆှံတဲဝဲလၢ “မ်ပှၤကိးဂၤဒဲးဟ့ၣ်တၢ် ဒ်အဆၢတဲာ်ပာ်စၢၤလီၤအသး အသိးတက့ၢ်. ဒီးတဘၣ်မ့ၢ်လၢ တၢ်သးတအိၣ်ဘၣ်အပူၤ မ့တမ့ၢ် လၢတၢ်မၢဆူၣ် အဃိဘၣ်.”—၂ ကရံၣ်သူး ၉:၇.

 ပမ့ၢ်ဟ့ၣ်တၢ်လၢ တၢ်သးအိၣ်န့ၣ် အမ့ၢ် “တၢ်ဘူၣ်ထီၣ်ဘါထီၣ်” တခါလၢ ကစၢ်ယွၤ ဘၣ်သူၣ်ဘၣ်သးဝဲ. (ယၤကိာ် ၁:၁၇) ပှၤလၢအမၤစၢၤပှၤဂၤလၢ အလိၣ်ဘၣ်တၢ်မၤစၢၤန့ၣ် မ့ၢ်အမၤသးခု ကစၢ်ယွၤအသး. ပမ့ၢ်ဟ့ၣ်တၢ်ဒ်အံၤန့ၣ် ကစၢ်ယွၤ ထံၣ်ဝဲလၢ အကမၢ်ထီၣ်ဒီးပှၤ. (ကတိၤဒိ ၁၉:၁၇) လံာ်စီဆှံ ပာ်ဖျါထီၣ်ဝဲလၢ တၢ်လၢပဟ့ၣ်ပှၤဂၤသ့ၣ်တဖၣ်န့ၣ် ကစၢ်ယွၤ ကဟ့ၣ်ဆၢက့ၤပှၤ.—လူၤကၣ် ၁၄:၁၂-၁၄.

 ပမ့ၢ်တဟ့ၣ်တၢ်လၢ တၢ်သူၣ်အိၣ်သးအိၣ်အပူၤ အနီၢ်ကီၢ်ဘၣ်န့ၣ် ကစၢ်ယွၤ တဘၣ်သူၣ်ဘၣ်သးဝဲဘၣ်. အဒိ, ဒ်သိးဒီး-

•    ပှၤဂၤကထံၣ်ဒိၣ်ပှၤအဂီၢ်.​—မးသဲ ၆:၂.

•    မုၢ်လၢ်လၢ ကဒိးန့ၢ်ဘၣ်က့ၤတၢ်တမံၤမံၤ.​—လူၤကၣ် ၁၄:၁၂-၁၄.

•    ပပှ့ၤတၢ်မူအထူအယိာ်.​—စံးထီၣ်ပတြၢၤ ၄၉:၆, ၇.

 တၢ်ဟ့ၣ်လၢအတဘၣ် ကစၢ်ယွၤအသးဘၣ်န့ၣ် မ့ၢ်တၢ်ဟ့ၣ်ဒ်လဲၣ်တကလုာ်လဲၣ်. အဒိ, ပမ့ၢ်ဟ့ၣ်မၤစၢၤပှၤဂၤလၢ ကျိၣ်စ့ လၢကျဲလၢအကမၣ် ဒ်သိးဒီး ပှၤကသူဝဲလၢ တၢ်တၤကျိၣ်တၤစ့အဂီၢ်, လၢကပှ့ၤအီၣ် ကသံၣ်မူၤဘှီးအဂီၢ် ဒီးလၢကပှ့ၤအီသံးအဂီၢ်. (၁ ကရံၣ်သူး ၆:၉, ၁၀; ၂ ကရံၣ်သူး ၇:၁) တကးဒံးဘၣ် ပှၤလၢအလုၢ်လီၤအီၣ် အသးသမူသ့ ဘၣ်ဆၣ် အမ့ၢ်ကၢၣ်မၤတၢ်မၤန့ၣ် တကြၢးလၢ ပမၤစၢၤအဝဲသ့ၣ်ဘၣ်.—၂ သ့းစၤလနံ ၃:၁၀.

 ဟံၣ်ခိၣ်တဂၤ ဟ့ၣ်မၤစၢၤပှၤဂၤတၢ်အါတလၢ တုၤလၢ အသးပ့ၤနီၣ်ကွံာ်အမူဒါ. လံာ်စီဆှံ သိၣ်လိဝဲလၢ ဟံၣ်ခိၣ်န့ၣ်ကဘၣ်ကွၢ်ထွဲ အဟံၣ်ဖိဃီဖိ အတၢ်လိၣ်ဘၣ်တဖၣ်. (၁ တံၤမသ့း ၅:၈) ဟံၣ်ခိၣ်န့ၣ် တဘၣ်မၤစၢၤပှၤဂၤအါတလၢ တုၤလၢ အဘၣ်ဒိ အနီၢ်ကစၢ်အဟံၣ်ဖိဃီဖိ အတၢ်လိၣ်ဘၣ်ဘၣ်. တကးဒံးဘၣ် ပှၤလၢအတကွၢ်ထွဲ အမိၢ်အပၢ်လၢ အသးပှၢ်ဘၣ် ဒီးတဲဝဲလၢ တၢ်လၢအအိၣ်ဒီးအီၤတဖၣ် မ့ၢ်ဝဲ “တၢ်ဟ့ၣ်လၢ ကစၢ်ယွၤအဂီၢ်” န့ၣ် ယ့ၣ်ၡူး ပာ်ဒ့ၣ်ပာ်ကမၣ် အဝဲသ့ၣ်.—မၢ်ကူး ၇:၉-၁၃.