ပမ့ၢ်ဟ့ၣ်တၢ်န့ၣ် အဘျုးအိၣ်ဝဲဒ်လဲၣ်
ဖဲအဲးလဲစါဒြၤ ဆ့ၣ်နီၤအိၣ်ခိးတၢ်လၢဘၢး(စ်)ကါအပူၤ လၢကခီဂာ်ဝဲကီၢ်ဆၢ လၢကီၢ်အမဲရကၤကလံၤထံးအခါ အဝဲနၢ်ဟူဘၣ်ဝဲလၢ “ဘၢး(စ်)ကါလဲၤသ့လံ ဘၣ်ဆၣ် တရူးပိာ်ခွါအံၤဘၣ်အိၣ်တီၢ်ဖဲအံၤ.” အဲးလဲစါဒြၤ စံၣ်လီၤကွၢ်ဝဲတၢ်မနုၤမၤအသးလဲၣ်. ဒီးအဝဲထံၣ်ဘၣ်ဝဲတရူးပိာ်ခွါသးစၢ်တဂၤ ဂုာ်ကျဲးစၢးတဲနၢ်ပၢၢ်ဝဲ ပှၤဘၣ်မူဘၣ်ဒါတဂၤလၢ စပဲနံးအကျိာ်, ဘၣ်ဆၣ် အဝဲတဲဝဲတဘၣ်အါအါဘၣ်. မ့ၢ်လၢ အဲးလဲစါဒြၤ မ့ၢ်ယဟိဝၤပှၤအုၣ်အသးတဂၤလၢ အလဲၤထီၣ်ဝဲတရူးအတၢ်အိၣ်ဖှိၣ် အတၢ်ရဲၣ်တၢ်ကျဲၤအဃိ အဝဲကတိၤကျိာ်ထံန့ၢ်တၢ်လၢ တရူးခွါတဂၤအံၤအဂီၢ်လီၤ.
တရူးခွါသးစၢ်တဂၤအံၤ တဲဘၣ်ပှၤဘၣ်မူဘၣ်ဒါလၢ ပဒိၣ်ဟ့ၣ်ယၤလံာ်လဲၢ် ဒ်သိးယအိၣ်ဖဲအံၤကသ့အဂီၢ် ဘၣ်ဆၣ် ပှၤတမျာ်ယၤဒီး ဟုၣ်ယစ့အဃိ ယလံာ်လဲၢ်သ့ၣ်တဖၣ်တအိၣ်လၢၤဘၣ်. အဆိကတၢၢ်န့ၣ် ပှၤဘၣ်မူဘၣ်ဒါတတူၢ်လိာ်ဝဲ အတၢ်ကတိၤဘၣ် ဒီးဆိကမိၣ်ကမၣ်ဝဲလၢ အဲးလဲစါဒြၤ မ့ၢ်ပှၤတဂၤလၢအဆါလီၤအီၣ်ပှၤကညီလီၤ. လၢခံ ပှၤဘၣ်မူဘၣ်ဒါတဂၤအံၤ တူၢ်လိာ်ဝဲတရူးခွါအံၤအတၢ်ကတိၤလီၤ. ဘၣ်ဆၣ် မ့ၢ်လၢပိာ်ခွါသးစၢ်တဂၤအံၤ တအိၣ်ဒီးအလံာ်အုၣ်သးအဃိ ပှၤဘၣ်မူဘၣ်ဒါတဂၤအံၤ အီၣ်လိးအီၣ်အီၤလီၤ. တရူးခွါသးစၢ်အံၤ အစ့တအိၣ်ဘၣ်အဃိ အဲးလဲစါဒြၤ ဟ့ၣ်လိၢ်ဆိအီၤလၢ စ့ဒီလၣ် ၂၀ လီၤ. တရူးခွါအံၤစံးဘျုးဝဲ အဲးလဲစါဒြၤ လၢာ်သးဒီးတဲဝဲလၢ ယကလိးက့ၤနၤစ့ အါန့ၢ်ဒံးအဒီလၣ် ၂၀ လီၤ. အဲးလဲစါဒြၤ တဲဝဲလၢ အမၤဝဲဒ်အံၤန့ၣ်တမ့ၢ်လၢ အဝဲကဒိးန့ၢ်ဘၣ်က့ၤတၢ်အဘျုးအဂီၢ်ဘၣ်. မ့ၢ်လၢအဝဲမၤစၢၤဘၣ်ပှၤလၢ အလိၣ်ဘၣ်တၢ်မၤစၢၤအဃိ အဝဲသးခုဝဲလီၤ. အဲးလဲစါဒြၤ ဟ့ၣ်လီၤဝဲတရူးပိာ်ခွါအံၤ လံာ်လဲၢ်တနီၤလၢ အဘၣ်ဃးဒီးလံာ်စီဆှံ ဒီးဟ့ၣ်ဂံၢ်ဟ့ၣ်ဘါ ပိာ်ခွါအံၤလၢ ကမၤလိ လံာ်စီဆှံဒီး ယဟိဝၤပှၤအုၣ်အသးတဖၣ်လီၤ.
ဖဲပနၢ်ဟူဘၣ်ပှၤလၢ အဲၣ်ဒိးဟ့ၣ်မၤစၢၤတၢ်လၢ အသးဒီဖျၢၣ်အခါ ပသးခုဒိၣ်မးလီၤ. ပှၤလၢအိၣ်ဒီးတၢ်ဘူၣ်တၢ်ဘါမ့ၢ်ဂ့ၤ တအိၣ်ဒီးတၢ်ဘူၣ်တၢ်ဘါမ့ၢ်ဂ့ၤ အဝဲသ့ၣ်တနီၤန့ၣ်အိၣ်ဒီးသးလၢ အအဲၣ်ဒိးဟ့ၣ်တၢ်ဒ်န့ၣ်စ့ၢ်ကီးလီၤ. နၤစ့ၢ်ကီးမ့ၢ်နသးအိၣ်လၢ နကမၤစၢၤပှၤဂၤဒ်အဲးလဲစါဒြၤအသိးဧါ. တၢ်သံကွၢ်တဖျၢၣ်အံၤ လီၤထုးန့ၢ်သူၣ်ထုးန့ၢ်သးဒိၣ်မး မ့ၢ်လၢယ့ၣ်ၡူးတဲဝဲလၢ– “ဟ့ၣ်တၢ်န့ၣ်ဘၣ်တၢ်ဆိၣ်ဂ့ၤအါန့ၢ် ဒိးန့ၢ်တၢ်တက့ၢ်လီၤ.” (မၤတၢ် ၂၀:၃၅) တၢ်ဂ့ၢ်တခါအံၤလီၤသူၣ်အိၣ်သးအိၣ်ဒိၣ်မး မ့ၢ်လၢပှၤစဲအ့ၣ်ဖိတဖၣ်ဃုသ့ၣ်ညါဝဲလၢ ဟ့ၣ်တၢ်န့ၣ်အဘျုးအဖှိၣ်အိၣ်ဝဲဒိၣ်မးလီၤ. ပဟ့ၣ်တၢ်ကကဲဘျုး လၢပဂီၢ်ဒ်လဲၣ်န့ၣ် ပကဃုသ့ၣ်ညါလီၤ.
“ဟ့ၣ်တၢ်လၢတၢ်သးခုအပူၤ”
ပှၤဟီၣ်ခိၣ်ဖိအါဂၤ ထံၣ်ဘၣ်ဝဲလၢ တၢ်ဟ့ၣ်တၢ်ဒီးတၢ်သးခုန့ၣ် ဘၣ်ထွဲလိာ်အသးလီၤ. တၢ်မၢဖိပီလူးကွဲးဝဲလၢ– “ယွၤအဲၣ်ပှၤတဂၤလၢ အဟ့ၣ်တၢ်လၢတၢ်သးခုအပူၤန့ၣ်လီၤ.” ဖဲအံၤစီၤပီလူးတဲဝဲဘၣ်ဃးဒီး ခရံာ်ဖိတဖၣ်လၢ အဟ့ၣ်တၢ်လၢ တၢ်သူၣ်အိၣ်သးအအိၣ်အပူၤ ဒ်သိး ကမၤစၢၤဒီပုၢ်ဝဲၢ်လၢ အဘၣ်ကီဘၣ်ခဲတဖၣ်အဂီၢ်လီၤ. (၂ ကရံၣ်သူး ၈:၄; ၉:၇, ခ့ခါစှီၤကျိာ်) စီၤပီလူးတတဲဝဲလၢ အဝဲသ့ၣ်ဟ့ၣ်တၢ် မ့ၢ်လၢအအိၣ်ဒီးတၢ်သူၣ်ခုသးခုအဃိဘၣ်, အဝဲသ့ၣ်သးခု မ့ၢ်လၢအဟ့ၣ်တၢ်အဃိလီၤ.
ပှၤဃုသ့ၣ်ညါတၢ်တဖၣ်တဲဝဲလၢ ပှၤသးအိၣ်ဟ့ၣ်တၢ်လၢ တၢ်သူၣ်အိၣ်သးအိၣ်အပူၤန့ၣ် ဒုးအိၣ်ထီၣ် “ပခိၣ်နူာ်အတၢ်ဟူးတၢ်ဂဲၤတဖၣ်လၢအဘၣ်ထွဲလိာ်သးဒီး တၢ်ရ့တံၤရ့သကိး, တၢ်သူၣ်ခုသးခု, တၢ်နာ်န့ၢ်လိာ်သးဒီး တၢ်သူၣ်ဖှံသးညီလီၤ.” ပှၤဃုသ့ၣ်ညါတၢ်လၢ အဂၤတဲဝဲလၢ “ပှၤလၢအဟ့ၣ်မၤစၢၤ ပှၤအဂၤတဂၤလၢအစ့န့ၣ် အဝဲဒိးန့ၢ်ဘၣ်တၢ်သူၣ်ခုသးခုဒိၣ်န့ၢ်ဒံး အဝဲမ့ၢ်သူ စ့အံၤလၢအနီၢ်ကစၢ်အဂီၢ်န့ၣ်လီၤ.”
ခီဖျိလၢ နတၢ်အိၣ်သးအဃိ မ့ၢ်နတူၢ်ဘၣ်လၢ နဟ့ၣ်မၤစၢၤ ပှၤဂၤတသ့ဘၣ်န့ၣ် အိၣ်ဝဲတဘျီဘျီဧါ. ဘၣ်ဆၣ် ပမ့ၢ်တဲတီတီန့ၣ် ပှၤကိးဂၤဒဲး “ဟ့ၣ်တၢ်လၢတၢ်သးခုအပူၤ” သ့ဝဲလီၤ. ပတလိၣ် ဟ့ၣ်မၤစၢၤတၢ် အါအါဘၣ်. အရ့ဒိၣ်လၢ ပကဟ့ၣ်တၢ်လၢ တၢ်သူၣ်အိၣ်သးအိၣ်အပူၤလီၤ. ယဟိဝၤပှၤအုၣ်အသးတဂၤ ဆှၢလီၤဝဲတၢ်မၤဘူၣ်ဆူ ပှၤထုးထီၣ်ရၤလီၤဝဲ မဲးကစံအံၤအလီၢ် ဒီးတဲဝဲလၢ– “လၢအါနံၣ်အတီၢ်ပူၤန့ၣ် ယထၢနုာ် တိၢ်မၤဘူၣ်လၢ ဘီမုၢ်ဘျီၣ်ဒိၣ်ပူၤတန့ၢ်အါအါဘၣ်. ဘၣ်ဆၣ်သနာ်က့ ယဟိဝၤယွၤ ဟ့ၣ်လီၤယၤတၢ်အါန့ၢ်ဒံး တၢ်လၢယဟ့ၣ်လီၤန့ၣ်လီၤ. ဒီးမ့ၢ်လၢ သုတူၢ်လိာ်ယတၢ်မၤဘူၣ်အဃိ ယသူၣ်မံသးမုာ်ဒိၣ်မးလီၤ.”
ပဟ့ၣ်တၢ်န့ၣ် တမ့ၢ်လၢ ပဟ့ၣ်လီၤထဲ ကျိၣ်ဧိၤစ့ဧိၤတခါဘၣ်. ပဟ့ၣ်တၢ်သ့လၢ ကျဲအါဘိလီၤ.
ဟ့ၣ်တၢ်န့ၣ်ဂ့ၤလၢ တၢ်အိၣ်ဆူၣ်အိၣ်ချ့အဂီၢ်
နမ့ၢ်ဟ့ၣ်တၢ်န့ၣ် ကဲဘျုးလၢနဂီၢ် ဒီးပှၤဂၤအဂီၢ်
လံာ်စီဆှံပာ်ဖျါထီၣ်ဝဲလၢ– “ပှၤမၤဘျုးမၤဖှိၣ်တၢ်န့ၣ် မၤတၢ်ဂ့ၤလၢအသးဒၣ်ဝဲအဂီၢ်လီၤ. မ့မ့ၢ်ပှၤအသးကိၤန့ၣ် မၤကိၢ်မၤဂီၤအဖံးအညၣ်ဒၣ်ဝဲလီၤ.” (ကတိၤဒိ ၁၁:၁၇) ပှၤလၢအသူၣ်ဂ့ၤသးဝါန့ၣ် မ့ၢ်ပှၤလၢအဟ့ၣ်တၢ်ညီ, သးအိၣ်ဟ့ၣ်လီၤ အနီၢ်ကစၢ်အတၢ်ဆၢကတီၢ်, အဂံၢ်အဘါဒီး တၢ်ကဟုကယာ်လၢ ပှၤဂၤအဂီၢ်လီၤ. ခီဖျိလၢ အဝဲသ့ၣ်ဟ့ၣ်မၤစၢၤတၢ်လၢ တၢ်သးအိၣ်အပူၤလၢ ကျဲအါဘိ အဃိကဲဘျုးဝဲလၢ အဝဲသ့ၣ်အတၢ်အိၣ်ဆူၣ်အိၣ်ချ့အဂီၢ်စ့ၢ်ကီးလီၤ.
ပှၤဃုသ့ၣ်ညါတၢ်ဖိ ပာ်ဖျါထီၣ်ဝဲလၢ ပှၤလၢအဟ့ၣ်လီၤအသးလၢ ကမၤစၢၤပှၤဂၤန့ၣ် အဝဲသ့ၣ်တူၢ်ဘၣ်ဝဲလၢ အတၢ်ဆူးတၢ်ဆါဒ်သိးဒီး တၢ်အ့ၣ်စိၢ်အ့ၣ်ထုးဒီး အတၢ်သူၣ်ဘၣ်ဒိသးဘၣ်ထံး စှၤလီၤဝဲလီၤ. လၢတၢ်န့ၣ်အလီၢ် အတၢ်အိၣ်ဆူၣ်အိၣ်ချ့ ဟဲဂ့ၤထီၣ်ဝဲလီၤ. အဒိပှၤလၢအိၣ်ဒီး တၢ်ဆါယံာ်ယံာ်ထၢထၢဒ်သိးဒီး ဖံးညၣ်ထံးၡူတၢ်ဆါ (multiple sclerosis) ဒီး HIV န့ၣ် အဝဲသ့ၣ်တနီၤအတၢ်ဆါ ကိညၢ်ထီၣ်ဝဲတစဲး ခီဖျိလၢအဝဲသ့ၣ် သးအိၣ်ဟ့ၣ်တၢ်အဃိလီၤ. တကးဒံးဘၣ် ပှၤဃုသ့ၣ်ညါတၢ်ဖိတဖၣ် ထံၣ်ဘၣ်ဝဲလၢ ပှၤစွဲသံးလၢ အဂုာ်ကျဲးစၢးမၤစၢၤပှၤဂၤန့ၣ် အတၢ်သူၣ်ဘၣ်ဒိသးဘၣ်ထံး စှၤလီၤဝဲဒီးမၤစၢၤစ့ၢ်ကီးအီၤဒ်သိး အသုတအီသံးလၢၤတဂ့ၤအဂီၢ်လီၤ.
ဘၣ်မနုၤအဃိ ကဲထီၣ်တၢ်မၤစၢၤလၢ အဝဲသ့ၣ်အဂီၢ်လဲၣ်. ပှၤတနီၤတဲဝဲလၢ “ပမ့ၢ်အိၣ်ဒီးတၢ်သးကညီၤ တၢ်သူၣ်ဂ့ၤသးဝါဒီး သးလၢအဲၣ်ဒိးမၤစၢၤ ပှၤဂၤန့ၣ် ကဆီၣ်ဖျိးထီၣ်ကွံာ် ပတၢ်တူၢ်ဘၣ်လၢ အမၤဘၣ်ဒိပသးန့ၣ်လီၤ.” ပမ့ၢ်သးအိၣ်ဟ့ၣ်တၢ်န့ၣ် ပတၢ်ကိၢ်တၢ်ဂီၤဒီး သွံၣ်ထီၣ်တၢ်ဆါ လီၤစှၤဝဲသ့လီၤ. ဒီးပှၤတဂၤလၢ အသးသမူတံၤသကိး မ့ၢ်တအိၣ်လၢၤဘၣ်န့ၣ် အဝဲမ့ၢ်ဟ့ၣ်မၤစၢၤတၢ်န့ၣ် အတၢ်သူၣ်ဘၣ်ဒိသးဘၣ်ထံး စှၤလီၤဝဲသ့စ့ၢ်ကီးလီၤ.
လၢတၢ်ဂ့ၢ်သ့ၣ်တဖၣ်အံၤအဃိ ပသးဒ့ဒီအလီၢ်တအိၣ်ဘၣ်. နမ့ၢ်ဟ့ၣ်တၢ်န့ၣ် ကကဲဘျုးလၢနဂီၢ်သပှၢ်ကတၢၢ်လီၤ.
ပှၤဂၤကသးအိၣ်ဟ့ၣ်တၢ် ခီဖျိလၢ ပသးအိၣ်ဟ့ၣ်တၢ်အဃိ
ယ့ၣ်ၡူး ဟ့ၣ်သဆၣ်ထီၣ် အပျဲၢ်အဘီၣ်တဖၣ်လၢ– “ဟ့ၣ်တၢ်တက့ၢ်. ဒီးတၢ်ကဟ့ၣ်တၢ်လၢသုလီၤ. ပှၤကဃီၣ်ကစီဒီ, ကဆီၣ်လီၤဃာ်, ကဂံၤဂုၤ, ဒီးကမၤပှဲၤစိတရိၤ, ဒီးကဟ့ၣ်လီၤလၢ သုသးနါပှၢ်လီၤ. အဂ့ၢ်ဒ်အံၤ, ဒ်သုဃီၣ်ဟ့ၣ်တၢ်အသိးန့ၣ်, တၢ်ကဃီၣ်ဟ့ၣ်က့ၤသုလီၤ.” (လူၤကၣ် ၆:၃၈) ဖဲနသးအိၣ်ဟ့ၣ်မၤစၢၤတၢ်လၢ တၢ်သးအိၣ်အခါ ပှၤလၢအဒိးန့ၢ်ဘၣ်တၢ်ဟ့ၣ်န့ၣ် အဝဲသ့ၣ်ကစံးဘျုးနၤလၢ အသးဒီဖျၢၣ်လီၤ. တကးဒံးဘၣ် လၢခံန့ၣ်အဝဲသ့ၣ်ကသးအိၣ်ဟ့ၣ်တၢ်လၢ အသးဒီဖျၢၣ် စ့ၢ်ကီးလီၤ. လၢတၢ်န့ၣ်အဃိ ပမ့ၢ်ဟ့ၣ်တၢ်န့ၣ် ကဲဘျုးဒ်သိး ပကမၤသကိးတၢ်ဒီးပှၤဂၤ ဃူဃူဖိးဖိး ဒီးကဒုးအိၣ်ထီၣ် ပတၢ်ရ့တံၤရ့သကိးန့ၣ်လီၤ
ပမ့ၢ်ဟ့ၣ်တၢ်န့ၣ် ကဲဘျုးဒ်သိး ပကမၤသကိးတၢ်ဒီးပှၤဂၤဃူဃူဖိးဖိး ဒီးကဒုးအိၣ်ထီၣ်ပတၢ်ရ့တံၤရ့သကိး
ပှၤလၢအဃုသ့ၣ်ညါ ပှၤဟီၣ်ခိၣ်ဖိအတၢ်ရ့လိာ်မုာ်လိာ်န့ၣ် ပာ်ဖျါထီၣ်ဝဲလၢ “ပှၤလၢအဟ့ၣ်လီၤအသးလၢ ကမၤစၢၤပှၤဂၤအဂီၢ်န့ၣ် ကဲထီၣ်တၢ်ဂံၢ်တၢ်ဘါလၢ ပှၤအဂၤတဖၣ်ကမၤဝဲဒ်န့ၣ်အဂီၢ်လီၤ.” ပမ့ၢ်တဲတီတီန့ၣ် “ထဲနဖးဘၣ်ပှၤအဂ့ၢ်လၢ အအဲၣ်ဒိးဟ့ၣ်တၢ်လၢ တၢ်သးအိၣ်အပူၤန့ၣ် ကထိၣ်ဟူးထိၣ်ဂဲၤထီၣ်ပှၤဂၤအသးလၢ အဝဲသ့ၣ်ကအဲၣ်ဒိးဟ့ၣ်တၢ်စ့ၢ်ကီးလီၤ.” အဃိ ဒ်ပှၤဃုသ့ၣ်ညါတၢ်ဖိတဖၣ် ပာ်ဖျါထီၣ်ဝဲအသိး ‘ပှၤတဂၤဂ့ၤတဂၤဂ့ၤလၢ အဟ့ၣ်တၢ်ညီန့ၣ် ထုးန့ၢ်ဝဲပှၤလၢအကယၤတဖၣ် အသးသ့ဝဲလီၤ.’ ပမ့ၢ်တဲကဒီးတမံၤန့ၣ် ပဟ့ၣ်တၢ်ထဲတဘျီန့ၣ် ထိၣ်ဟူးထိၣ်ဂဲၤထီၣ် ပှၤတဂၤဘၣ်တဂၤလၢပှၤတဝၢအပူၤ ဒ်သိးအဝဲသ့ၣ်စ့ၢ်ကီး ကအဲၣ်ဒိးဟ့ၣ်တၢ်အဂီၢ်လီၤ. မ့ၢ်နအဲၣ်ဒိးအိၣ်မူဘၣ်လၢ ပှၤသ့ၣ်တဖၣ်အံၤအကျါဧါ. နကအဲၣ်ဒိးအိၣ်မူလၢ အဝဲသ့ၣ်အကျါလီၤ. ပှၤအါဂၤမ့ၢ်ဟ့ၣ်တၢ်ညီန့ၣ် ကကဲဘျုးကဲဖှိၣ်ဝဲဒိၣ်မးလီၤ.
အဒိ ဖဲကလံၤမုၢ်မၤဟးဂီၤတၢ်လၢ တၢ်လီၢ်တတီၤလၢ ဖျိရံဒၤ, ကီၢ်အမဲရကၤအပူၤန့ၣ် ယဟိဝၤပှၤအုၣ်အသးတနီၤ လဲၤမၤစၢၤတၢ် ဖဲန့ၣ်လီၤ. ဖဲယဟိဝၤပှၤအုၣ်အသးတဖၣ် အိၣ်ခိးဝဲ တၢ်ဖိတၢ်လံၤလၢ ကဘှီဂ့ၤထီၣ်က့ၤ ဟံၣ်လၢအလီၤပှီၢ်တဖၣ်အခါ အဝဲသ့ၣ်ပာ်သူၣ်ပာ်သးဘၣ်ဝဲလၢ ပှၤအိၣ်လၢ ဟံၣ်ခိၣ်ဟံၣ်ဃၢၤတဂၤ အဟံၣ်ကရၢၢ် ဟးဂီၤဝဲလီၤ. ဝံၤဒီးအဝဲသ့ၣ်လဲၤဃ့အခွဲးလၢ ဟံၣ်ကစၢ်အအိၣ်ဒီး ဘှီဂ့ၤထီၣ်က့ၤဝဲအကရၢၢ်လၢ အဟးဂီၤန့ၣ်လီၤ. လၢခံန့ၣ် ဟံၣ်ကစၢ်တဂၤအံၤ ကွဲးလံာ်ဆူ ယဟိဝၤပှၤအုၣ်အသးတဖၣ် အဝဲၤလီၢ်ခိၣ်သ့ၣ်အအိၣ် ဒီးတဲဝဲလၢ “ယစံးဘျုးဘၣ်သုဒိၣ်မး. ဒီးယထံၣ်ဘၣ်လၢ ပှၤသ့ၣ်တဖၣ်အံၤ အသူၣ်ဂ့ၤသးဝါကတၢၢ်လီၤ.” တကးဒံးဘၣ် တၢ်စံးဘျုးစံးဖှိၣ် ထိၣ်ဟူးထိၣ်ဂဲၤထီၣ်အသးလၢ အကမၤဘူၣ်လီၤစ့လၢ ပှၤကသူအီၤလၢ ယဟိဝၤပှၤအုၣ်အသးတဖၣ် အတၢ်ဖံးတၢ်မၤအဂီၢ်လီၤ.
ကွၢ်လိပှၤလၢ အဟ့ၣ်တၢ် အအါကတၢၢ်တဂၤ
ဖဲပှၤစဲအ့ၣ်ဖိတဖၣ် ဃုထံၣ်သ့ၣ်ညါတၢ်အခါ ထံၣ်ဘၣ်ဝဲ တၢ်လီၤဆီတခါဒီးတဲဝဲလၢ “ဖျါလၢပှၤဟီၣ်ခိၣ်ဖိန့ၣ်အိၣ်ဒီး သးလၢအအဲၣ်ဒိးမၤစၢၤ ပှၤလၢအဂၤတဖၣ်လီၤ.” ဒီးအဝဲသ့ၣ်တဲဝဲလၢ ဖိသၣ်တဖၣ်စ့ၢ်ကီး “တချုးလၢအဝဲသ့ၣ် တဲတၢ်သ့ဒံးဘၣ်အဆၢကတီၢ်ဒၣ်လဲာ် ပာ်ဖျါထီၣ်ဝဲလၢ အဝဲသ့ၣ်အိၣ်ဒီးသးလၢ အအဲၣ်ဒိးဟ့ၣ်မၤစၢၤပှၤဂၤလီၤ.” လၢမနုၤအဃိလဲၣ်. လံာ်စီဆှံပာ်ဖျါထီၣ်ဝဲလၢ ပှၤဟီၣ်ခိၣ်ဖိတဖၣ်န့ၣ် ဘၣ်တၢ်တ့လီၤအဝဲသ့ၣ်ဒ် “ယွၤအဂီၤ” အသိးလီၤ. လၢတၢ်န့ၣ်အဃိ ပှၤဟီၣ်ခိၣ်ဖိသ့ၣ်တဖၣ် ပာ်ဖျါထီၣ်တၢ်ဂ့ၤတၢ်ဝါ ဒ်ကစၢ်ယွၤအသိးလီၤ.—၁ မိၤၡ့ ၁:၂၇.
ပတၢ်ဘၣ်တ့ကစၢ် ယဟိဝၤယွၤန့ၣ် အိၣ်ဒီးတၢ်ဂ့ၤတၢ်ဝါအါမး တကးဒံးဘၣ် အဝဲဟ့ၣ်တၢ်ညီဒိၣ်မးလီၤ. ကစၢ်ယွၤ ဟ့ၣ်လီၤပှၤသးသမူ ဒီးဟ့ၣ်လီၤပှၤ တၢ်ခဲလၢာ်လၢ ပလိၣ်ဘၣ်တဖၣ်ဒ်သိး ပကပှဲၤဒီးတၢ်သးခုအဂီၢ်လီၤ. (မၤတၢ် ၁၄:၁၇; ၁၇:၂၆-၂၈) ပမ့ၢ်မၤလိလံာ်စီဆှံန့ၣ် ပကသ့ၣ်ညါအါထီၣ် ပပၢ်အိၣ်လၢမူခိၣ်အဂ့ၢ် ဒီးအတၢ်တိာ်ပာ်လၢအပှဲၤဒီး တၢ်အဲၣ်တၢ်ကွံန့ၣ်လီၤ. တကးဒံးဘၣ် လံာ်စီဆှံပာ်ဖျါထီၣ်န့ၢ်ပှၤ ကစၢ်ယွၤအတၢ်ရဲၣ်တၢ်ကျဲၤဒ်သိး ပကအိၣ်ဒီးတၢ်သးခုလၢ ခါဆူညါအဂီၢ်လီၤ. * (၁ ယိၤဟၣ် ၄:၉, ၁၀) မ့ၢ်လၢယဟိဝၤယွၤ ဟ့ၣ်တၢ်ညီ ဒီးပဝဲသ့ၣ်တဖၣ်အံၤ ပဘၣ်တၢ်တ့လီၤပှၤ ဒ်အက့ၢ်အဂီၤအဃိ ပမ့ၢ်ကွၢ်လိမၤဒိးအီၤဒီး ဟ့ၣ်မၤစၢၤပှၤဂၤန့ၣ် မ့ၢ်တၢ်လၢ အကဲဘျုးလၢပဂီၢ် ဒီးပကဒိးန့ၢ်ဘၣ် ယွၤအတၢ်ဘၣ်သးန့ၣ်လီၤ.—ဧ့ၤဘြံၤ ၁၃:၁၆.
တၢ်မၤလိအခီၣ်ထံး ပာ်ဖျါထီၣ်ဝဲ အဲးလဲစါဒြၤအဂ့ၢ်န့ၣ် မ့ၢ်နနီၣ်ဘၣ်ဒံးဧါ. လၢခံန့ၣ် တၢ်မၤအသးဒီးအီၤဒ်လဲၣ်. ပှၤလၢအလဲၤသကိးတၢ်ဒီး အဲးလဲစါဒြၤ တဂၤတဲဘၣ်အီၤလၢ လီၤဂာ်ဒ် နတၢၤလီၤစ့လၢ မ့ၣ်အူပူၤအသိးလီၤ. ဘၣ်ဆၣ် တရူးခွါသးစၢ်လၢ အဲးလဲစါဒြၤ မၤစၢၤဝဲန့ၣ် အဝဲဆဲးကျိးဒီး အသကိးတဖၣ် ဖဲဝ့ၢ်တဖျၢၣ်လၢ ဘၢး(စ်)ကါ ကလဲၤပတုာ်ဝဲအလီၢ်န့ၣ်လီၤ. တရူးခွါတဂၤအံၤ အသကိးတဖၣ် ဟ့ၣ်လီၤက့ၤဝဲ အဲးလဲစါဒြၤ အစ့ တကးဒံးဘၣ် တရူးခွါအံၤဒိကနၣ်ဝဲ အဲးလဲစါဒြၤအတၢ်ဟ့ၣ်ကူၣ်ဒီး စးထီၣ်မၤလိဝဲ လံာ်စီဆှံလီၤ. သၢလါပူၤကွံာ်ဝံၤအလီၢ်ခံန့ၣ် တရူးအတၢ်အိၣ်ဖှိၣ်ဖးဒိၣ်ဘၣ်လၢ ကီၢ်ဖရူအပူၤ ဒီးအဝဲသ့ၣ် ထံၣ်လိာ်က့ၤအသးဖဲန့ၣ်အဃိ အဝဲသ့ၣ်သးခုဝဲ ဒိၣ်မးလီၤ. မ့ၢ်လၢတရူးခွါသးစၢ်အံၤ အဲၣ်ဒိးစံးဘျုးဝဲ အဲးလဲစါဒြၤ အဃိ အဝဲကွဲမုာ်ဝဲ အဲးလဲစါဒြၤဒီးပှၤလၢဟဲပိာ်အခံတဖၣ် လၢကဟဲအီၣ်သကိးတၢ်လၢ အကျးပူၤလီၤ.
ပမ့ၢ်ဟ့ၣ်တၢ် ဒီးမၤစၢၤပှၤအဂၤန့ၣ် ပကဒိးန့ၢ်ဘၣ် တၢ်သးခုဖးဒိၣ်လီၤ. တကးဒံးဘၣ် ခီဖျိလၢနမၤဒ်န့ၣ်အဃိ ဘၣ်သ့ၣ်သ့ၣ် ကမၤစၢၤပှၤဂၤဒ်သိး အဝဲသ့ၣ်ကသ့ၣ်ညါအါထီၣ် ယဟိဝၤယွၤ လၢအမ့ၢ် ကစၢ်လၢအဟ့ၣ်ပှၤ ကယဲၢ်တၢ်ဟ့ၣ် အဂ့ၤအဝါန့ၣ်လီၤ. (ယၤကိာ် ၁:၁၇) မ့ၢ်နဒိးန့ၢ်ဘၣ် တၢ်အဘျုးအဖှိၣ် ခီဖျိလၢ နဟ့ၣ်မၤစၢၤတၢ်အဃိဧါ.
^ လံာ်အဆၢ. 21 နမ့ၢ်အဲၣ်ဒိးသ့ၣ်ညါအါထီၣ်တၢ်ဂ့ၢ်န့ၣ် ကွၢ်လံာ်လၢအမ့ၢ် လံာ်စီဆှံကသိၣ်လိပှၤ တၢ်ဂ့ၢ်မနုၤလဲၣ် လၢယဟိဝၤပှၤအုၣ်အသးတဖၣ် ထုးထီၣ်ဝဲဒီးနဒိးန့ၢ်ဘၣ်အီၤသ့လၢ www.pr418.com/ksw စံၢ်လီၤကွၢ်လၢ လံာ်လဲၢ်တဖၣ်ဝံၤဒီး လံာ်တဖၣ်ဒီးဘရိၣ်ခၠၣ်တဖၣ် တက့ၢ်.
You May Also Like
ကဲထီၣ်ယဟိဝၤယွၤ အတံၤသကိး
သးအိၣ်ဟ့ၣ်တၢ်တက့ၢ်
ခီဖျိလၢ ယဟိဝၤယွၤအခ့အပှၤတဖၣ် သးအိၣ်ဟ့ၣ်တၢ်အဃိ တၢ်အဂ့ၤမနုၤတဖၣ် ကဲထီၣ်သးလဲၣ်.
