We Jiova bin mek di famili, i gi mama ɛn papa dɛn di rayt fɔ de oba dɛn pikin dɛn. (Lɛta Fɔ Kɔlɔse 3:20) So na mama ɛn papa dɛn gɛt di wok fɔ tren dɛn pikin dɛn fɔ lɛk Jiova ɛn fɔ mek dɛn ebul du tin fɔ dɛnsɛf we dɛn dɔn big. (Sɛkɛn Lɛta To Timoti 1:5; 3:15) Yu fɔ no wetin de na yu pikin in at. Yusɛf yon ɛgzampul impɔtant. Yu go ebul tich yu pikin dɛn Jiova in Wɔd if yu fɔs gɛt am na yu at.—Sam 40:8.

DI BAYBUL SE: “Una fɔ shap una yes fɔ yɛri wetin pipul de tɔk, bɔt una fɔ tek tɛm tɔk.” (Jems 1:19) As mama ɔ papa, yu go want mek yu pikin dɛn fil fri fɔ tɔk to yu. Dɛn fɔ no se yu rɛdi fɔ lisin to dɛn ɛnitɛm dɛn want fɔ tɔk to yu. Mek yu ɛn dɛn bi padi so dat i go izi fɔ mek dɛn tɔk to yu. (Jems 3:18) If dɛn tink se yu go ala pan dɛn ɔ yu kwik fɔ jɔj dɛn, dat go mek dɛn frɛd fɔ tɛl yu wetin rili dɛn tink. Na fɔ peshɛnt wit yu pikin dɛn ɛn fɔ de tɛl dɛn se yu lɛk dɛn.—Matyu 3:17; Fɔs Lɛta Fɔ Kɔrint 8:1.

DU DIS:

• I fayn fɔ rɛdi fɔ lisin ɔltɛm we yu pikin dɛn want fɔ tɔk to yu

• Mek tɛm fɔ tɔk to yu pikin dɛn ɔltɛm, nɔto we una gɛt prɔblɛm nɔmɔ

DI BAYBUL SE: “Bɛtɛ go fala udat tek wetin dɛn tich am na layf.” (Prɔvabs 16:20) Sɔntɛnde, i fayn fɔ tink gud wan bɔt wetin yu pikin dɛn de se, so dat yu go rili ɔndastand aw dɛn de fil. Bɔku yɔŋ pipul dɛn kin tɔk sɔntin we nɔto so i rili bi ɔ tɔk sɔntin we dɛn nɔ rili min. “If yu ansa bifo yu yɛri wetin dɛn de tɔk, yu jɛs de sho se yu na fulman.” (Prɔvabs 18:13) Nɔ fɔ de vɛks kwik.—Prɔvabs 19:11.

DU DIS:

• Na fɔ mekɔp yu maynd nɔ fɔ vɛks kwik ɔ kɔt wɔd na yu pikin in mɔt, ilɛk wetin i de se nɔ fayn

• Tray fɔ mɛmba aw yusɛf bin de fil di tɛm we yu bin de di sem ej lɛk yu pikin ɛn wetin bin impɔtant to yu

DI BAYBUL SE: “Mi pikin, pe atɛnshɔn to wetin yu papa de tel yu, nɔ fɔgɛt wetin yu mama de tel yu.” (Prɔvabs 1:8) Jiova dɔn gi mama ɛn papa dɛn di rayt fɔ de oba dɛn pikin. So una fɔ tich una pikin dɛn fɔ rɛspɛkt ɛn obe una. (Lɛta Fɔ Ɛfisɔs 6:1-3) Pikin dɛn kin no we dɛn mama ɛn papa nɔ gɛt “wanwɔd.” (Fɔs Lɛta Fɔ Kɔrint 1:10) If yu nɔ gri wit wetin de apin, nɔ tɔk am bifo di pikin dɛn bikɔs dat go mek dɛn ridyus di rɛspɛkt we dɛn gɛt fɔ yu as mama ɔ papa.

DU DIS:

• Una tɔk bɔt aw fɔ tren una pikin ɛn una fɔ gɛt wanwɔd

• If yu ɛn yu man ɔ yu wɛf gɛt difrɛn we aw fɔ tren di pikin dɛn, tray fɔ ɔndastand wetin yu man ɔ yu wɛf de tink

DI BAYBUL SE: “Gi pikin gud trenin.” (Prɔvabs 22:6) Fɔ tich yu pikin fɔ mek i kɔmɔt fayn nɔ de apin wantɛm wantɛm. Yu fɔ plan aw fɔ tren yu pikin dɛn. (Sam 127:4; Prɔvabs 29:17) Fɔ tren yu pikin dɛn nɔ jɔs min se yu fɔ de pɔnish dɛn, bɔt yu fɔ ɛp yu pikin dɛn fɔ ɔndastand di rizin we mek yu put ɛni lɔ. (Prɔvabs 28:7) I fayn fɔ tich dɛn fɔ lɛk Jiova in Wɔd ɛn fɔ ɔndastand wetin i se. (Sam 1:2) Dis go ɛp dɛn fɔ gɛt gud kɔnshɛns.—Di Ibru Pipul Dɛn 5:14.

DU DIS:

• Mek shɔ se yu pikin dɛn si Gɔd lɛk rial Pɔsin we dɛn fɔ abop pan

• Ɛp dɛn fɔ sabi ɛn avɔyd bad tin dɛn na di Intanɛt. Tich dɛn aw fɔ avɔyd pipul dɛn we de du mami ɛn dadi biznɛs wit pikin dɛn