As yu dɔn lan na dis buk, di Baybul gɛt bɔku advays dɛn we go ɛp yu ɛn yu famili. Jiova want mek yu gladi. I dɔn prɔmis fɔ ‘gi yu ɔl dɛn tin ya’ if yu put in wɔship fɔs na yu layf. (Matyu 6:33) I rili want mek yu bi in padi. So na fɔ yuz ɛni chans we yu gɛt fɔ mek yu padi biznɛs wit Gɔd tayt. Dis na big ɔnɔ we pɔsin kin gɛt.—Matyu 22:37, 38.

DI BAYBUL SE: “A go bi una Papa ɛn una go bi mi bɔy pikin ɛn mi gyal pikin dɛn, na so di Masta we gɛt pawa pas ɔl, se.” (Sɛkɛn Lɛta Fɔ Kɔrint 6:18) Gɔd want mek yu bi in tayt padi. Prea na wan tin we go ɛp wi fɔ du dat. Jiova want lɛ yu “de pre ɔltɛm.” (Fɔs Lɛta Fɔ Tɛsalonayka 5:17) I rili want mek yu tɛl am wetin de na yu at ɛn wetin de wɔri yu. (Lɛta Fɔ Filipay 4:6) We yu de pre wit yu famili, dɛn go no se Jiova na rial Pɔsin to yu.

Yu nɔ fɔ jɔs de tɔk to Gɔd, yu fɔ de lisin to am. Yu go ebul lisin to Gɔd bay we yu de stɔdi in Wɔd ɛn di buk ɛn magazin dɛn we de tɔk bɔt di Baybul. (Sam 1:1, 2) Tink gud wan bɔt wetin yu de lan. (Sam 77:11, 12) Fɔ lisin to Gɔd min bak se yu de go mitin na Kiŋdɔm Ɔl ɔltɛm.—Sam 122:1-4.

We yu de tɔk to ɔda pipul dɛn bɔt Jiova, na ɔda impɔtant we fɔ mek yu padi biznɛs tayt wit am. Di mɔ yu du ɔl dɛn tin ya, na di mɔ yu go si se yu padi biznɛs wit Jiova de tayt.—Matyu 28:19, 20.

DU DIS:

• Ɛvride na fɔ spɛn tɛm fɔ rid di Baybul ɛn fɔ pre

• Yu ɛn yu famili fɔ put Gɔd in wɔship bifo ɛnjɔymɛnt

DI BAYBUL SE: “Una kam klos Gɔd ɛn i go kam klos una.” (Jems 4:8) Una fɔ mek plan bɔt aw una want du una famili wɔship ɛn una fɔ fala da plan de ɔltɛm. (Jɛnɛsis 18:19) Bɔt una nid fɔ du mɔ. Una fɔ mɛmba Gɔd ɛvride pan ɛnitin we una de du. Mɛk yu famili gɛt tayt padi wit Gɔd bay we yu de tɔk bɔt am ‘we una de na os, na trit, we una de wok ɛn we una de blo.’ (Ditarɔnɔmi 6:6, 7) Yu fɔ tan lɛk Jɔshwa we bin tɔk se: “As fɔ mi ɛn ɔl udat de na mi os, na PAPA GƆD wi de wɔship.”—Jɔshwa 24:15.

DU DIS:

• Una fɔ gɛt tɛm fɔ stɔdi ɔltɛm. We una de stɔdi una fɔ tink bɔt ɔlman na di famili