Jems 1:1-27

  • Jems in gritin (1)

  • We wi de bia i de mek wi gladi (2-15)

    • We sɔntin tɛst wi fet (3)

    • Wi fɔ kɔntinyu fɔ gɛt fet we wi de aks Gɔd (5-8)

    • Di tin dɛn we pɔsin want kin mek i sin ɛn day (14, 15)

  • Ɔl gud gift na ɔp dɛn kɔmɔt (16-18)

  • Yɛri Gɔd in wɔd ɛn du am (19-25)

    • Sɔmbɔdi we de luk na glas (23, 24)

  • Wɔship we klin ɛn we nɔ dɔti (26, 27)

1  Mi, Jems, we na Gɔd ɛn Masta Jizɔs Krays dɛn slev de rayt to di 12 trayb dɛn we skata na difrɛn ples dɛn: Una adu o!  Mi brɔda dɛn, una fɔ rili gladi we difrɛn tɛst dɛn mit una,  bikɔs una no se we sɔntin tɛst una fet, dat go mek una ebul fɔ bia.  Bɔt una alaw di bia we una de kɔntinyu fɔ bia fɔ tren una gud gud wan, so dat una go kɔmplit ɛn gud pan ɔltin ɛn gɛt ɔltin.  So if ɛniwan pan una nɔ gɛt bɛtɛ sɛns, mek i kɔntinyu fɔ aks Gɔd, ɛn Gɔd go gi am, bikɔs i de gi bɔku bɔku wan ɛn i nɔ de fɛn fɔlt.  Bɔt lɛ di pɔsin kɔntinyu fɔ gɛt fet we i de aks Gɔd, mek i nɔ dawt atɔl, bikɔs pɔsin we de dawt tan lɛk swɛlin na di si we briz de blo ɛn kɛr go ɛnisay.  Infakt, da pɔsin de nɔ fɔ tink se Jiova* go gi am ɛnitin;  in na pɔsin we nɔ de mekɔp in maynd fɔ du sɔntin, i de chenj chenj in maynd ɔltɛm.  Bɔt mek di brɔda we pipul dɛn nɔ tek mek natin gladi* bikɔs i dɔn gɛt ay pozishɔn, 10  ɛn mek di jɛntriman gladi we i dɔn gɛt lo pozishɔn, bikɔs i go lɔs jɔs lɛk flawa. 11  Jɔs lɛk aw di san kin kɔmɔt in wam wam wan ɛn mek di plant wida, ɛn in flawa fɔdɔm ɛn nɔ fayn igen, na so bak di jɛntriman go lɔs we i de rɔnata jɛntri. 12  Di wan we kɔntinyu fɔ bia we sɔntin tɛst am gɛt gladi-at, bikɔs we Gɔd gladi fɔ am, i go gɛt di krawn we na layf, we Jiova* dɔn prɔmis di wan dɛn we kɔntinyu fɔ lɛk Am. 13  We sɔntin tɛst pɔsin, lɛ i nɔ se: “Na Gɔd de tɛst mi.” Nɔbɔdi nɔ ebul fɔ tɛst Gɔd wit bad tin, ɛn Gɔd insɛf nɔ de tɛst ɛnibɔdi. 14  Bɔt na di tin we pɔsin want, na in de tɛst am ɛn tɛmt am.* 15  Dɔn we di tin we di pɔsin want dɔn sidɔm na in at gud gud wan, dat kin mek i sin; ɛn we i dɔn sin, dat kin mek i day. 16  Mi brɔda dɛn we a rili lɛk, una nɔ ful unasɛf. 17  Ɔl gud gift ɛn ɔl pafɛkt prɛzɛnt na ɔp dɛn kɔmɔt. Dɛn kɔmɔt to di Papa we mek di layt dɛn na di skay, di wan we nɔ de chenj lɛk shado. 18  I yuz di wɔd we na tru fɔ mek wi de alayv bikɔs na dat i want. I du dis so dat wi go bi di fɔs wan dɛn we i pik pan di wan dɛn we i mek. 19  Mi brɔda dɛn we a rili lɛk, a want lɛ una no dis: Ɔlman fɔ kwik fɔ lisin, slo fɔ tɔk, ɛn slo fɔ vɛks, 20  bikɔs mɔtalman in wamat nɔ de mek wetin rayt na Gɔd in yay apin. 21  So una lɛf ɔlkayn dɔti layf ɛn ɔltin we bad,* ɛn una put unasɛf dɔŋ ɛn alaw Gɔd fɔ plant in wɔd insay una, we ebul fɔ sev una.* 22  Bɔt una fɔ de du wetin Gɔd in wɔd se ɛn nɔ jɔs de yɛri, bikɔs una go de ful unasɛf wit di we aw una de tink we nɔto tru. 23  If ɛnibɔdi de yɛri Gɔd in wɔd bɔt i nɔ de du am, i tan lɛk sɔmbɔdi we de luk in fes na glas. 24  I luk insɛf ɛn go. Ɛn wantɛm wantɛm i fɔgɛt uskayn pɔsin i bi. 25  Bɔt di wan we de luk gud gud wan insay di pafɛkt lɔ we gɛt sɔntin fɔ du wit fridɔm ɛn kɔntinyu fɔ du am dɔn bi pɔsin we nɔ de fɔgɛt we i yɛri, bɔt na pɔsin we de du di wok; ɛn i go gladi we i de du am. 26  If ɛnibɔdi tink se i de wɔship Gɔd bɔt nɔ de kɔntrol in tɔŋ, i de ful insɛf,* ɛn na fɔ natin i de wɔship Gɔd. 27  Di kayn wɔship we klin ɛn we nɔ dɔti na wi Gɔd ɛn Papa in yay na in dis: Fɔ kia fɔ pikin dɛn we de sɔfa we dɛn mama ɛn papa dɔn day ɛn uman dɛn we de sɔfa we dɛn man dɛn dɔn day, ɛn nɔ gɛt wan sten na di wɔl.

Futnot

Rid Baybul Wɔd dɛn Minin.
Insay Grik, “bost.”
Rid Baybul Wɔd dɛn Minin.
Ɔ “kech am wit bet.”
Ɔ i kin bi, “fɔ du bɔku bad tin.”
Ɔ “sol dɛn.”
Insay Grik, “in at.”