Ɛkliziastis 4:1-16

  • Fɔ sɔprɛs pɔsin wɔs pas day (1-3)

  • Tink di rayt we bɔt wok (4-6)

  • Di valyu we padi gɛt (7-12)

    • Tu pipul dɛn bɛtɛ pas wan pɔsin (9)

  • Pɔsin we de rul, in layf kin bi vaniti (13-16)

4  A tink bak bɔt ɔl di tin dɛn we mɔtalman dɔn du we de mek dɛn kɔmpin dɛn sɔfa na di wɔl. A si kray wata na di wan dɛn we de sɔfa dɛn yay, ɛn nɔbɔdi nɔ de fɔ kɔrej dɛn. Di wan dɛn we de mek dɛn sɔfa gɛt pawa pas dɛn ɛn nɔbɔdi nɔ de fɔ kɔrej dɛn.  Dɔn a tɔk se di wan dɛn we dɔn day bɛtɛ pas di wan dɛn we stil de alayv.  Ɛn di wan we bɛtɛ pas dɛn ɔl tu na di wan we dɛn nɔ bɔn yet, we nɔ si di bad bad tin dɛn yet we de apin na di wɔl.  A dɔn si aw di tranga wok ɛn di sɛns we mɔtalman de pul pan dɛn wok na bikɔs dɛn de jɛlɔs dɛnsɛf; dis bak na vaniti, i tan lɛk we pɔsin de rɔnafta briz.  Fulman de fol in an dɛn ɛn fɔ dat, i de ambɔg insɛf.*  I bɛtɛ fɔ gɛt smɔl tɛm fɔ rɛst* pas fɔ yuz bɔku tɛm de wok tranga wan* ɛn rɔnafta briz.  A tink bak ɛn si wan ɔda tin we na vaniti na di wɔl:  Wan man de we na in wangren de, i nɔ gɛt nɔbɔdi; i nɔ gɛt pikin ɔ brɔda, bɔt i nɔ de stɔp fɔ wok tranga wan. I nɔ de ɛva satisfay wit jɛntri. Bɔt i dɔn ɛva aks insɛf se, ‘Na fɔ udat a de wok tranga wan ɛn stɔp misɛf* fɔ ɛnjɔy gud tin dɛn’? Dis bak na vaniti ɛn na wok we de mek mɔtalman at pwɛl.  Tu pipul dɛn bɛtɛ pas wan pɔsin bikɔs dɛn go gɛt bɔku bɛnifit fɔ dɛn tranga wok. 10  If wan pan dɛn fɔdɔm, di ɔda wan go ɛp in kɔmpin fɔ grap. Bɔt wetin go apin to wan pɔsin we fɔdɔm we nɔ gɛt nɔbɔdi fɔ ɛp am fɔ grap? 11  Dɔn bak, if tu pipul dɛn ledɔm togɛda, kol nɔ go kech dɛn. Bɔt aw wan pɔsin go ledɔm ɛn kol nɔ kech am? 12  Dɔn sɔmbɔdi go ebul fɔ bit wan pɔsin, bɔt tu pipul dɛn go ebul chalenj am. Ɛn i nɔ izi fɔ kɔt tri rop we dɛn tay togɛda. 13  Pikin we po ɛn gɛt sɛns bɛtɛ pas kiŋ we ol ɛn ful, we nɔ gɛt bɛtɛ sɛns igen fɔ lisin to wɔnin, 14  bikɔs i* kɔmɔt na prizin fɔ bi kiŋ, pan ɔl we dɛn bɔn am insay po di tɛm we di ol kiŋ de rul. 15  A tink bɔt ɔl di wan dɛn we de alayv we de waka na di wɔl, ɛn wetin go apin to di yɔŋman we go tek di ɔda pɔsin in ples. 16  Pan ɔl we di wan dɛn we de sɔpɔt am rili bɔku, di wan dɛn we go kam leta nɔ go gladi fɔ am. Dis bak na vaniti, i tan lɛk we pɔsin de rɔnafta briz.

Futnot

Insay Ibru, “ɛn i de it in yon flɛsh.”
Insay Ibru, “gɛt wan mɔndɔ rɛst.”
Insay Ibru, “gɛt tu mɔndɔ tranga wok.”
Ɔ “mi sol.”
Sɔntɛm i de tɔk bɔt di smɔl pikin we gɛt sɛns.