Ɛkliziastis 7:1-29
7 Gudnem bɛtɛ pas gud ɔyl, ɛn di de we pɔsin day bɛtɛ pas di de we dɛn bɔn am.
2 I bɛtɛ fɔ go na bɛrin os pas fɔ go na os we gɛt gladi gladi, bikɔs na so ɔlman go ɛnd, ɛn di wan we de alayv fɔ no dat.
3 I bɛtɛ fɔ gɛt pwɛlat pas fɔ de laf, bikɔs pwɛlat de mek yu bi bɛtɛ pɔsin.*
4 Pɔsin we gɛt sɛns de tink bɔt bɛrin os, bɔt fulman de tink bɔt os we gɛt gladi gladi.
5 I bɛtɛ fɔ lisin we pɔsin we gɛt sɛns de tɔk pan yu pas fɔ lisin we fulman de siŋ.
6 Jɔs lɛk di sawnd we chukchuk de mek we i de bɔn ɔnda pɔt, na so fulman in laf tan lɛk; dis bak na vaniti.
7 Siriɔs prɔblɛm de mek pɔsin we gɛt sɛns du tin lɛk se in ed nɔ de, ɛn brayb de kɔrɔpt pɔsin in at.
8 Di we aw sɔntin ɛnd bɛtɛ pas di we aw i bigin. I bɛtɛ fɔ peshɛnt pas fɔ prawd.
9 Nɔ kwik* fɔ vɛks, bikɔs na fulman kin vɛks kwik.*
10 Nɔ se: “Wetin mek trade bɛtɛ pas tide?” bikɔs sɛns nɔ de insay da kwɛstyɔn de.
11 Sɛns ɛn prɔpati na gud tin ɛn na advantej fɔ di wan dɛn we de alayv.*
12 Sɛns de protɛkt jɔs lɛk aw mɔni de protɛkt, bɔt di advantej fɔ no sɔntin na dat, sɛns de sev in ona in layf.
13 Tink bɔt di wok we di tru Gɔd dɔn du. Udat go ebul fɔ stret wetin Gɔd dɔn bɛn?
14 We tin fayn, tink bɔt da gudnɛs de, bɔt we tin nɔ fayn,* mɛmba se na Gɔd mek di wan jɔs lɛk di ɔda wan, so dat mɔtalman nɔ go shɔ bɔt* wetin go apin to am tumara bambay.
15 Insay dis mi layf we na vaniti, a dɔn si ɔltin; a dɔn si di wan we de du wetin rayt de day pan ɔl we i de du wetin rayt, ɛn a dɔn si di wan we wikɛd de liv lɔng pan ɔl we i de du bad tin dɛn.
16 Nɔ mek lɛk se na yu wan de du wetin rayt, ɛn nɔ mek lɛk se yu gɛt sɛns pasmak. Wetin mek yu fɔ briŋ trɔbul pan yusɛf?
17 Nɔ wikɛd pasmak, ɛn nɔ biev fulish we. Wetin mek yu fɔ day bifo yu tɛm?
18 I bɛtɛ fɔ tek wan wɔnin ɛn nɔ lɛf di ɔda wan, bikɔs di wan we de fred Gɔd go lisin to ɔl tu.
19 Sɛns de mek pɔsin we gɛt sɛns gɛt mɔ pawa pas tɛn strɔng man dɛn na wan siti.
20 Nɔbɔdi nɔ de na di wɔl we de du wetin rayt ɔltɛm ɛn nɔ wande sin.
21 Dɔn bak, nɔ lisin to ɔltin we pipul dɛn de tɔk. If yu du dat, yu go yɛri yu savant de tɔk bad bɔt* yu;
22 bikɔs yusɛf sɛf no gud wan na yu at se bɔku tɛm yu dɔn tɔk bad bɔt ɔda pipul dɛn.
23 A tray ɔl dis wit sɛns, ɛn a tɔk se: “A go gɛt sɛns.” Bɔt i bin tumɔs fɔ mi.
24 Wetin dɔn bi de fa frɔm wi, ɛn i rili dip. Udat go ɔndastand am?
25 A disayd fɔ no, fɔ faynd awt ɛn fɔ fɛn sɛns ɛn di rizin we mek tin dɛn de bi, ɛn fɔ ɔndastand wetin mek ful bad ɛn wetin mek kres na fulishnɛs.
26 Na dis a faynd awt: Uman we tan lɛk ɔntinman in nɛt, we in at tan lɛk big fishin nɛt, ɛn we in an dɛn tan lɛk prizin chen dɛn, wɔs* pas day. Di wan we de du wetin di tru Gɔd want go ɛskep na da uman de in an, bɔt i go kapchɔ di wan we de sin.
27 Di ticha se: “Na dis a kam fɔ no, a tray fɔ no bɔt difrɛn difrɛn tin dɛn fɔ si wetin a go faynd awt,
28 bɔt a nɔ si wetin a bin de fɛn. Pan wan tawzin pipul dɛn, na wan man nɔmɔ a si se de du wetin rayt, bɔt a nɔ si wan uman we de du wetin rayt.
29 Na dis wangren tin a faynd awt: Di tru Gɔd mek mɔtalman tret, bɔt dɛn dɔn fala dɛn yon plan dɛn.”
Futnot
^ Insay Ibru, “mek yu at bɛtɛ.”
^ Insay Ibru, “mek yu spirit ɔri.”
^ Ɔ i kin bi, “na so fulman de.”
^ Insay Ibru, “di wan dɛn we de si di san.”
^ Ɔ “we prɔblɛm kam.”
^ Ɔ “go faynd awt.”
^ Insay Ibru, “kɔs.”
^ Insay Ibru, “bita.”
