Ɛkliziastis 3:1-22
3 Tɛm de fɔ ɔltin;Tɛm de fɔ ɔltin we de apin na di wɔl.
2 Tɛm de fɔ bɔn ɛn tɛm de fɔ day;Tɛm de fɔ plant ɛn tɛm de fɔ rut wetin dɛn plant;
3 Tɛm de fɔ kil ɛn tɛm de fɔ mɛn;Tɛm de fɔ brok ɛn tɛm de fɔ bil;
4 Tɛm de fɔ kray ɛn tɛm de fɔ laf;Tɛm de fɔ fil sɔri ɛn tɛm de fɔ dans;*
5 Tɛm de fɔ trowe ston dɛn ɛn tɛm de fɔ gɛda ston dɛn;Tɛm de fɔ ɔg ɛn tɛm de nɔ fɔ ɔg;
6 Tɛm de fɔ luk fɔ sɔntin ɛn tɛm de fɔ tek am se sɔntin dɔn lɔs;Tɛm de fɔ kip ɛn tɛm de fɔ trowe;
7 Tɛm de fɔ chɛr ɛn tɛm de fɔ so;Tɛm de fɔ sɛt mɔt ɛn tɛm de fɔ tɔk;
8 Tɛm de fɔ lɛk ɛn tɛm de fɔ et;Tɛm de fɔ wɔ ɛn tɛm de fɔ pis.
9 Us bɛnifit wokman de gɛt frɔm ɔl wetin i de du?
10 A dɔn si di wok we Gɔd dɔn gi mɔtalman fɔ kip dɛn bizi.
11 I dɔn mek ɔltin fayn* di rayt tɛm. I dɔn ivin mek dɛn want fɔ de sote go.* Bɔt mɔtalman nɔ go ɛva faynd awt di wok we di tru Gɔd dɔn du frɔm di biginin to di ɛnd.
12 A dɔn kam fɔ no se natin nɔ bɛtɛ fɔ dɛn pas fɔ gladi ɛn du gud di tɛm we dɛn de alayv.
13 Dɔn bak, ɔlman fɔ it ɛn drink ɛn ɛnjɔy bikɔs ɔf ɔl di tranga wok we dɛn dɔn du. Dat na gift frɔm Gɔd.
14 A dɔn kam fɔ no se ɔltin we di tru Gɔd mek go de sote go. Natin nɔ de fɔ ad pan am ɛn natin nɔ de fɔ pul frɔm am. Di tru Gɔd mek am da we de, so dat pipul dɛn go fred am.
15 Ɛnitin we apin na sɔntin we ɔlrɛdi bin dɔn bi, ɛn wetin gɛt fɔ kam na sɔntin we ɔlrɛdi bin dɔn de, bɔt di tru Gɔd de luk fɔ wetin mɔtalman dɔn rɔnafta.*
16 Na dis bak a dɔn si na di wɔl: Usay jɔstis fɔ de, na wikɛdnɛs de de. Usay dɛn fɔ du wetin rayt, na wikɛd tin dɛn de du de.
17 So a tɔk na mi at se: “Di tru Gɔd go jɔj di wan we de du wetin rayt ɛn di wan we de du wikɛd tin dɛn, bikɔs tɛm de fɔ ɔltin we de apin ɛn fɔ ɔltin we dɛn de du.”
18 A tɔk bak na mi at bɔt mɔtalman dɛn se di tru Gɔd go tɛst dɛn ɛn sho dɛn se dɛn tan lɛk animal dɛn,
19 bikɔs mɔtalman gɛt ɛndin ɛn animal dɛn bak gɛt ɛndin; dɛn ɔl gɛt di sem ɛndin. As wan de day, na so di ɔda wan de day, ɛn dɛn ɔl gɛt wan spirit. So mɔtalman nɔ pas animal dɛn, bikɔs ɔltin na vaniti.
20 Dɛn ɔl de go na di sem ples. Na dɔti dɛn ɔl kɔmɔt ɛn na dɔti dɛn ɔl de go bak.
21 Udat rili no if mɔtalman in spirit de go ɔp, ɛn if animal in spirit de go dɔŋ?
22 Ɛn a si se natin nɔ bɛtɛ pas fɔ mek mɔtalman ɛnjɔy di wok we i de du, bikɔs dat na in bɛnifit;* udat go mek i si wetin go apin afta we i dɔn go?
Futnot
^ Insay Ibru, “jomp jomp.”
^ Ɔ “I dɔn arenj ɔltin.”
^ Insay Ibru, “I dɔn put am na dɛn at fɔ de sote go.”
^ Ɔ i kin bi, “wetin nɔ de igen.”
^ Ɔ “in pɔshɔn.”
