O athu ene mu bhanga o ibhuidisu íii ió a bhiti mu mavuua, a texika imbamba iavulu. Kienhiki, ene a sota kikuatekesu ni itambuijilu ia ibhuidisu íii. Athu a mukuá amba kuila o mavuua, o kuiibha kua beta o kuiibha, mukonda dia kiki, athu enhá ka xikina kua Nzambi.

 Makutu: Kima kia iibha kuibhula kua Nzambi se mukonda diahi muéne uehela o mavuua o ku bhita.

 Kidi: Athu akexile abhezi a Nzambi ebhula kua Nzambi se mukonda diahi muéne uehela o kuiibha mu ngongo. Mu kifika, o polofeta Habakuke uebhula kua Nzambi: ‘Phala-hi u ngi muesa o ufusa ni lusebu, anga u ngi bhangesa ku tala ungulungumba?’ (Habakuke 1:3) Mu veji dia ku bazela Habakuke, Nzambi ua sonekesa o ibhuidisu ia diiala didi dia fiiele mu Bibidia phala athu ku i tanga.

 Makutu: Nzambi ka suu o athu kioso kia tala hadi.

 Kidi: Nzambi ua iibhila o kuiibha ni hadi ioso. (Jisabhu 6:16-19) Mu izuua ia Noué, o kuiibha kuezalele mu ngongo, kiki ‘kia bhekela lamba ku muxima ua Nzambi.’ (Dimatekenu 6:5, 6) Sé phata, Nzambi ua divu ué kia iibha ku muxima.—Malakiia 3:6.

 Makutu: O mavuua ukexilu ua Nzambi ua ku kaxtikala o Jijudé.

 Kidi: Nzambi uehela akua Loma ku bhuisa o mbanza ia Jeluzaleme ku hama ia dianga. (Matesu 23:37–24:2) Maji tundé o kithangana kieniókio, Nzambi kene mu sola dingi athu phala kua bhanga mbote mba phala ku a kaxtikala. Bhu pholo ia Nzambi, “kana-ku katungu mu Judé, ni ió ki Judé.”—Loma 10:12.

 Makutu: Se Nzambi Muteni-a-Ioso, mukua henda muéne ueji fidisa o mavuua phala ka bhite.

 Kidi: Sumbala Nzambi ki muéne u bheka o hadi, maji muéne uehela o hadi o ku bhita.—Tiiaku 1:13; 5:11

 Nzambi uehela o mavuua ni hadi mu ngongo mukonda dia maka a bhitile m’ukulu. O Bibidia ilondekesa kuila o ua mu tumina o mundu iú ki Nzambi kana maji Diabhu. (Luka 4:1, 2, 6; Nzuá 12:31) O maka enhá o jimbulule kiá mu Mulangidi u jimbulula se mukonda diahi Nzambi uehela o hadi, maji kindala tala ima iiadi i tu sanga mu Bibidia ilondekesa se mukonda diahi Nzambi uehela o Mavuua o ku bhita.

1.   O ku sola kia iibha ku bhekesa Mavuua? Nzambi ua tangela o diiala ni muhatu ua dianga, Adá ni Eva ihi ia mesenene kuila ene a bhanga maji muéne ka a jijidika o ku mu belesela. Ene a solo mudiâ o ima ia uabha ni ima ia iibha—o ima íii ia solo ene ni ima ia mukuá iene mu sola o athu iene mu bheka jiphaxi javulu ku athu oso mu ngongo. (Dimatekenu 2:17; 3:6; Loma 5:12) O divulu Declaração de Principios do Judaísmo Conservador, diambe: “O ku kamba ku sola kiambote o ima, iene iene mu bheka o hadi ioso mu ngongo.” Mu veji dia ku katula o ufolo ku athu, Nzambi ua a bhana kithangana phala a di tumine mudiâ sé o kikuatekesu kiê.

2.   Nzambi ua-nda zubha o hadi ioso ijila mukonda dia Mavuua. Nzambi ua kanena ku fukununa jimidi ni jimidi ja athu afu kiá kála ió afu mu Mavuua. Muéne ua-nda zubha ué o ndolo iene mu kuívua o athu a bhiti mu mavuua. (Izaia 65:17; Ikalakalu 24:15) O henda ia Nzambi ku athu, ilondekesa kuila muéne ua-nda kumbidila o ikanenu iê.— Nzuá 3:16.

 Athu avulu a bhiti mu Mavuua, a tenene ku kolokota ni ufiiele uâ ni ku sanguluka ku muenhu, ene a di longo se mukonda diahi Nzambi uehela o hadi ni kiebhi muéne kia-nda bhuisa o ima ioso ia iibha.