Mukanda wa Tiyaku 1:1-27
1 Eme Tiyaku ngi mubhika wa Nzambi ni wa Ngana Jezú Kidistu, nga mu sonekena o kwinyi ni kiyadi kya miji ya dimwange mu ngongo yoso:
Nga mi menekena!
2 Jiphange jami, sangulukenu kyoso kimubhita mu ibhidi yavulu.
3 Mukonda enu mwejiya kwila o kumilola o kixikanu kyenu ki mibhangesa dingi kukolokota.
4 Maji ehelenu o kukolokota kuzubha o kikalakalu kyê, phala mu ima yoso mutenene mukale sé kikuma, sé ku mi kamba kima.
5 Kyenyiki se muthu wakambe unjimu akolokote mu ku ubhinga kwa Nzambi, mukonda mwene mukwa kubhana ku athu enyoso ni ngalasa sé kwabazela, anga mwene u mubhana.
6 Maji o muthu mwenyú akolokote mu kubhinga ni kixikanu kyoso, sé kukala ni jiphata mukonda woso ukala ni jiphata wadifwangana ni mabhuku a musanza wa kalunga, o kitembu kya atakujula kumbandu joso kuku ni koko.
7 Mu kidi o muthu mwenyú kafike kwila wanda tambula kima kwa Jihova.
8 Mwene mukwa mixima iyadi, o ixinganeku yê u ilungulula ithangana yoso.
9 Maji phange wala ngadyama asanguluke* mukonda Nzambi wa mujingisa.
10 Maji o yó wala mvwama asanguluke mukonda dya ku mutolesa, kuma o mvwama wanda jimuka kala kijimuka o kithulu ku mabhya.
11 Mukonda o dikumbi dibanda kumoxi ni kutema kwê, anga o yangu ilela, o ithulu ilawuka o kuwabha kwê kujimuka, kyene we kyanda jimuka o mvwama mwaxaxi ka jimbote jê.
12 Wazediwa yó ukolokota mu malamba, mukonda kyoso kyazubha ku mulola wanda tambula o kitundu kya mwenyu kya kanena Jihova kubhana kwa yó amuzolo.
13 Muthu kyoso kyabhita mu jihadi kazwele, wixi: “Nzambi mwene wa mu ngi polovala.” Mukonda athu katena ku polovala Nzambi ni imbamba yayibha, mwene we kene mu polovala muthu.
14 Maji kala muthu a mu polovala ku jihânji jê jayibha, jimusunga anga jimubhomba.
15 O jihânji jayibha kijizubha o kwimita jivwala o kituxi, kyoso o muthu kyata o kituxi kyene kimubhekela o kufwa.
16 Jiphange jami jakazola ki mu dinganale.
17 Maujitu moso mambote mayuka atunda kwa Tata wabhange o mikengeji ya dyulu o mwene kene mulunguluka kala o kilembeketa.
18 Mu vondadi yê, mwene watubhange bhukaxi ka maka mê a kidi, phala tukale o athu adyanga kwasola mwaxaxi ka ima yabhange mwene.
19 Ijiyenukyu jiphange jami jakazola kwila athu oso alenguluke mu kwívwa, maji akokoloke mukuzwela ni mukukala ni njinda.
20 O njinda ya muthu ki ibhekela kuyuka bhupholo ya Nzambi.
21 Kyenyiki ehenu o ifwa yoso ya ufusa ni wendelu woso wayibha,* xikinenu ni kubatama kwoso, kyoso Nzambi kyata kumixima yenu o maka mê atena kumibhulula.
22 Kalenu mwakwa kukumbidila o mak’â Nzambi kana ngó mwakwa kwívwa, mu kudinganala ni ixinganeku ya makutu.
23 Mukonda se muthu wívwa ngó o mak’â Nzambi maji ka akumbidila wadifwangana ni muthu utala o pholo yê mu lumwenu.
24 Mukonda mwene uditalesa mu lumwenu anga uye, ujimba o kidifwa kyê mwene.
25 O yó utokwesa kyambote o kijila kyayuka kya ufôlo anga ukolokota mwenyómo, mwene kakala ngó mukwa kwívwa anga ujimba ni lusolo lwoso o ima, maji ukala mukwa kukumbidila o maka anga uzediwa mu ima yoso yabhanga.
26 Se muthu ufika kwila wamubheza Nzambi maji kalange o dimi dyê wa mu nganala o muxima wê mwene, o ubhezelu wê kiwala ni valolo.
27 O ubhezelu wazele wayuka bhupholo ya Tata yetu ni Nzambi yetu, wenyú: O kulanga o ana itungu ni atudi mu ibhindamu yâ ni kukala sé dixaka* dya mundu yú.
