LUZIYA WENE MU TENGUNA KU KINAMA KYA KYASU. O kyexile hanji kabwetele, wa kwata uhaxi wa huhyalenge. O uhaxi yú, u bhangesa o mixibha kukonana, mukutu ki u kale ni nguzu. Kyoso kya kexile ni 16 a mivu; sayi muhatu u kalakala nê wa mwambela wixi: “Nzambi mwene wa kubhangesa kukala huhyalenge, mukonda eye u mukwa kuxibhaka mam’enu, ni kwila u muthu wayibha.” Kwa bhiti mivu yavulu maji Luziya wexile hanji mu lembalala o izwelu yenyoyo.

KYOSO DAMARIS KYEVU KWILA WA KEXILE NI UHAXI MU WONGO A WIXANA CANCER, tat’ê wa mwibhula: “Ihi i wa bhange phala kukala ni uhaxi yú? Nange eye wa bhange kima kyayibha kinene. Kyene Nzambi kya kubhana o kaxtiku kaka. Izwelu yiyi ya luwalesa kyavulu Damaris.

O ibanzelu ya kwila o jiphaxi kaxtiku ka Nzambi ya ukulu. O divulu Hábitos e Costumes das Terras Bíblicas di zwela kwila athu avulu mu thembu ya Jezú a xikinine kwila, “o mawuhaxi exile mu moneka mukonda dya ituxi ya muthu mba ituxi ya jindandu, ni kwila a a tumikisa kwala Nzambi kala kaxtiku.” Mu ukulu , “Athu exile mu xikina kwila Nzambi u bhekela mabhebhu phala kukaxtikala o athu mukonda dya ituxi yâ,” kala ki zwela o divulu Medicina Medieval e Praga. Mu kiki-phe, kyoso kyafu o mazunda ni mazunda athu ku Europa yoso mu hama ya 14, o kwila Nzambi mwene wa kaxtikala o athu yó? Inga o dibhebhu uhaxi ngó kala kya mono o jingijiye mivu kupholo? Amukwa a tena kudibhwidisa, o kwila Nzambi u kaxtikala o athu bhu kaxi ka mawuhaxi? Amukwa nange a dibhwidisa, o kwila Nzambi u kaxtikala mwene o athu ni mawuhaxi mukonda dya i tuxi yâ? a

XINGANEKA: Mukonda dyahi Jezú, wa sakele o jihaxi, se o mawuhaxi ni hadi kexile kaxtiku ka Nzambi? Se kyene, ki kyeji moneka kala Jezú wa balukila o kuyuka kwa Nzambi? (Matesu 4:23, 24) Jezú nuka weji balukila o ibhangelu ya Nzambi. Mwene wambe: “O kyoso kya ngi tumu [Tata], Eme kyene ki ngi bhanga.”—Nzwá 8:29; 14:31.

O Bibidya yamba ni kidi kyoso kwila: Jihova Nzambi “ki mukwa mangonya.” (Matendelelu 32:4) Mu kifika, Nzambi katena kubwisa kiphululu há kufwa jihama ja athu, mukonda mwene wa-ndala kukaxtikala muthu mu kiphululu mwenyomo! Mu kuyuka kwa Nzambi, Mbalahamu selevende yê ya fiyele, wa zwela kwila Nzambi ka ‘bwikisa kumoxi yó a kumbidila, ni yó a bhukumuka.’ Kiki ki ki tena kubhita.’ (Dimatekenu 18:23, 25) O Bibidya yamba we kwila ‘Nzambi kene mu bhanga usweya,’ mwene kyene mu bhanga “kuyibha.”—Jobe 34:10-12.

Kyoso ki tu tala hadi, ko kwila Nzambi wa mu tu kaxtikala mukonda dya kituxi, kana. Jezú wa jimbulula kyambote o maka yá, kyoso mwene ni maxibulu mê kya mono o diyala a mu vwalele kifôfo. ‘Maxibulu mê anga a mu ibhwidisa, exi: ‘Mesene, phala-hi muthu yú a mu vwala kifôfo? Nanyi wate kituxi? Mwène wa te kituxi, inga o jitata jê a te kituxi?’ Kwala Jezú: ‘Mwène kala kifôfo mukonda dya ituxi yê yate, mba mukonda dya ituxi ya jitata jê; maji mwène wala kifôfo, nda o kutena kwa Nzambi ni ku di londekese mwa mwène.’’—Nzwá 9:1-3.

Nange o maxibulu a diwana kyoso Jezú kya tambwijila kwila, o dilamba dya diyala dyódyo, ki dya mwiza mukonda dya kituxi kyê mba kya jitata  jê kana; mukonda, avulu kyene kya kexile mu banza. Jezú ka sake ngó o kifôfo maji wa tolola we o kixinganeku kya kwila o hadi kaxtiku ka Nzambi. (Nzwá 9:6, 7) O athu a mu tala hadi mukonda dya uhaxi wa bhonzo lelu, a tena kusanga kikolokotesu mu kwijiya kwila, Nzambi ki mwene wa mu a talesa hadi.

O Bibidya i tu kanena

• “Nzambi kene ku mu diyangula ku kima kyayibha kyoso-kyoso, o mwène we kene mu diyangula muthu.” (TIYAKU 1:13) Kyenyiki, o ‘ima yayibha’” yene mu tatesa o athu mu hama ja mivu, kala o mawuhaxi, o ndolo ni kufwa ki ya-nda kala-ku dingi.

• Jezú Kidistu “wa sake o jihaxi joso.” (MATESU 8:16) Mu kusaka o jihaxi joso jejile kwa mwene, o Mon’a Nzambi wa londekesa ya-nda bhanga o Utuminu wa Nzambi ku mundu woso.

• “Mwène u a kondona o masoxi moso ku mesu mâ! Ki ku kala dingi kùfwa, nè ngó mukôndo, mba kudila, mba kukata. Mukonda ima ya dyangèle-ku, ya bhiti.”—DIJINGUNWINU 21:3-5.

Mukonda dyahi o athu ene mu tala hadi yavulu? O athu ene mu di bhanga o kibhwidisu kiki mu mazunda ni mazunda a mivu. Se Nzambi ki mwene wala ni kikuma, nanyi-phe wala ni kikuma? O milongi ya kayela-ku ya-nda tambwijila o ibhwidisu yiyi.