Kana, jingeleja joso kijidifwangana kana. Mu Bibidya mwala misoso yavulu ya jingeleja Nzambi wa ji ibhile. Jingeleja jiji jala mu matelu ayadi.

Ditelu 1: Kubheza nzambi ja makutu

 O Bibidya itanga kuma o kubheza jinzambi ja makutu, kima kya “kingoho” ni kwila “ki kwala kubhanduluka kwa kima.” (Jelemiya 10:3-5; 16:19, 20) Jihova a Nzambi watumu o kifuxi kyokulu kya Izalayele, kwila: “Kana kukala ni nzambi jengi bhu pholo yami.” (Makatukilu 20:3, 23; 23:24) Kyoso akwa Izalayele kya kexile mu bheza jinzambi jengi, “njinda ya Jihova anga i wama.”—Dyalwilu 25:3; Ijila 20:2; Afundixi 2:13, 14.

 Katé kiki Nzambi wa ibhila hanji o ubhezelu wa yó “a j’ixana jinzambi.” (1 Kolindu 8:5, 6; Ngalásya 4:8) Mwene utuma yó andala kumubheza phala ehe kudilunga ni yó akwa ngeleja ya makutu, mwene wexi: “Tundenu mwaxaxi kâ, mu disandule.” (2 Kolindu 6:14-17) Se jingeleja joso jadifwangana ni kwila jambata o athu kwa Nzambi, mukonda dyahiphe Nzambi wabhana o kitumu kiki?

Ditelu 2: Kubheza o Nzambi ya kidi mu ukexilu wa ibhila mwene

 Kwexile ithangana, akwa Izalayele abhezele Nzambi mu kukayela ilongesu ni ibhangelu yatokalele mu ubhezelu wa jinzambi ja makutu, maji Jihova waditunu o ukexilu yú wakufunga o ubhezelu wa kidi ni wa makutu. (Makatukilu 32:8; Matendelelu 12:2-4) Jezú wabazela o atwameni a jingeleja mu izuwa yê mukonda dya ukexilu wâ wakexile mubheza nau Nzambi; akexile mudilondekesa kala athu amubheza kyambote Nzambi maji ni mangonya moso kakexile “mu kumbidila o maka amakota mu Kitumu kya Mozé, kala o kuyuka, o henda ni ufiyele.”—Matesu 23:23.

 Kyene we kimoxi ni lelu, o ngeleja ilonga o kidi yene ngo yendesa athu katé kwa Nzambi. O kidi kiki tukisanga mu Bibidya. (Nzwá 4:24; 17:17; 2 Timote 3:16, 17) O ngeleja yakambe kulonga kala kyala mu Bibidya, ngeleja yiyi ijimbidisa o athu phala kazukame kwa Nzambi. Ilongesu yavulu ibanza athu kwila yatundu mu Bibidya—mu kifika o ilongesu ya Tilindade, o ilongesu yakwila muthu kafu, ni ifernu ya tubhya—ilongesu yoso yiyi a isobho ku yó akexile mu bheza jinzambi ja makutu. O jingeleja jilonga o ilongesu yiyi, ngeleja ya “kingoho,” mba yakambe valolo mukonda ikatula o ijila ya Nzambi anga itamu o ijila ya ngeleja.—Máluku 7:7, 8.

 Nzambi wa ibhila o makutu a jingeleja. (Titu 1:16) Phala kukwatekes’o athu kuzukama kwa Nzambi, o ngeleja yatokala ibhangesa o muthu kukala ni ifwa yambote mu kizuwa ni kizuwa mu veji ya kukala ngo mu kanu. Mu kifika, o Bibidya yamba: “Se muthu ufika kwila wamubheza Nzambi maji kalange o dimi dyê wa mu nganala o muxima wê mwene, o ubhezelu wê kiwala ni valolo. O ubhezelu wazele wayuka bhupholo ya Tata yetu ni Nzambi yetu, wenyú: O kulanga o ana itungu ni atudi mu ibhindamu yâ ni kukala sé dixaka dya mundu yú.” (Tiyaku 1:26, 27; tala kulwiji) O Bibidya Rei James yamba “o ngeleja yazele” ilombolola o ubhezelu wakambe mangonya.