Nga kudila mu Warialda, mbanza iofele ku Nova Gales do Sul. Warialda, mbanza mua sasa jimbudi ni jingombe, ni idima iavulu. Maji mbanza ia zele, sé-ku ubandi uavulu.

Mu ku kala o mona ua dianga bhu kaxi ka dikuinhi dia phange jami, ki nga tenesa 13 dia mivu, nga mateka ku kalakala phala ku kuatekesa o muiji. Mukonda dia ku di longa bhofele mu xikola, nga kexile mu kalakala ku mábhia. Ki nga tenesa 15 dia mivu, nga kexile mu inga jikabalu.

O ku kalakala ku mábhia kiexile dibesá dia dikota. Nga uabhele kiavulu o kikalakalu ki nga kexile mu bhanga ni kididi bhu nga kexile. Mu usuku, nga kexile mu xikama ku mbandu a túbhia mu kuota, ni ku tala o dieji, ni jithéthembua ku diulu, kioso o mulenge ua usuku kia kexile mu bhusa ni ku bheka dizumba dia uabha. Nga kexile mu xinganeka kuila saí muthu ua bhange o ima íii iambote. Maji nga kexile ué ni makamba a iibha ku mábhia. Saí ithangana, nga kexile mu kuívua jindaka, ni ku mona o athu ku buakula makanha. Kienhiki, nga mateka uami o ku buakula makanha ni ku xinga ué kala kia kexile mu bhanga ene.

Ki nga tenesa 18 dia mivu, ngai mu tunga ku mbanza ia Sydney. Eme nga mesenene ku bokona mu usoladi, maji ka ngi xikina mukonda dia ku di longa bhofele mu xikola. Maji nga sange salu iéngi, eme nga xala mu mbanza ia Sydney, muvu umoxi. Ku muvu iú, kiene ki nga di sange ni Jimbangi ja Jihova. A ngi xana phala kuia mu kiônge kiâ, eme nga xikina, eme nga mono kuila ene akexile mu longa o kidi.

Maji mu ku bhita thembu iofele, nga vutuka mu mábhia. Ngai katé ku Goondiwindi, ku kibatu kia Queensland. Kuenhoko nga sange-ko salu, eme nga kazala, maji nga mateka o kúnua.

Tua kexile ni tuana tu iiadi. Kioso ki tua vuala an’etu, nga mateka ku banza kiavulu ku muenhu uami. Nga lembalala o maka u ngevu mu kiônge kia Jimbangi ja Jihova mu mbanza  ia Sydney, eme nga banze ku bhanga kima phala ku lungulula o muenhu uami.

Nga sange milongi iokulu ia Mulangidi, mua kexile o kijimbuete kia filiiale kia Jimbangi ja Jihova mu mbanza ia Austrália. Nga tumikisa mukanda mu ku bhinga kikuatekesu. A ngi tumikisa Mbangi ia Jihova. Muéne ua mateka o ku ngi longa o Bibidia.

Kioso ki nga kexile mu di longa o Bibidia, nga mono kuma nga tokalele ku lungulula o ukexilu ua muenhu uami. O velusu ia Bibidia ia ngi tula dingi ku muxima, iala ku divulu dia 2 Kolindo 7:1. O velusu íii i tu suínisa ‘ku di zelesa ku ufusa uoso ua xitu.’

Nga banze kueha o kifua kia ku buakula makanha ni kúnua kiavulu. Maji kia ngi bhonzele kiavulu ku lungulula o ukexilu uami, mukonda nga kexile ni ifua íii thembu iavulu. Maji nga mesenene ku bhanga ioso phala ku kala ni ukexilu u uabhela Nzambi. O kikuatekesu kia dikota, o ku kumbidila o milongi iala mu divulu dia Loma 12:2, iambe: “Ki mu kaiele o funza ia mu ngongo, maji ehelenu Nzambi a mi kitule kienge, katé kilunji kienu kieza ku ubhe.” Nga mono kuila, phala ku tena ku lungulula o ifua iami ia iibha, nga tokalele ku lungulula o ukexilu uami ua ku banza, ni ku mona o ifua iami kala ki mona Nzambi—ifua ia iibha. Ni kikuatekesu kiê, nga tena kueha o ku buakula makanha ni kúnua kiavulu.

Maji o kibhidi kia dikota, o kueha o kifua kia ku xinga. Nga kijidile o milongi mu divulu dia Efezo 4:29, iambe: “Ki mu tunde ndaka iabolo mu kanu dienu.” Maji né kiki, ki nga kexile mu tena ku zelesa o dimi diami ni lusolo. Nga sange kikuatekesu mu ku xinganeka mu izuelu iala mu divulu dia Izaia 40:26. I zuela: “‘Bhetulenu-phe o mesu menu bhulu, mu talese. Nanhi ua bhanga o ima ioso íii? Ió u tena ku bhangesa kuila kifuxi kiê ku tunda mu im’iii he u ki’alula; Ió u tena kuixana o jithéthembua joso ku majina mukonda dia unéne ua nguzu iê, kuma-phe o mu kutena ni mu ku suína muene Ngungu-a-Nzumba, kana-bhu kima ki tena ku di nhunga.’” Eme nga xinganeka kuila, se Nzambi ua kexile ni kutena kua ku bhanga o ngongo—i nga uabhela kiavulu u ku i tala—mu kidi muéne u tena ku ngi bhana o nguzu phala ku lungulula o muenhu uami, phala ku bhanga o vondadi iê. Ni ku samba ithangana iavulu ni ku bhanga nguzu, nga tena ku langa o dimi diami.

Kuma nga kexile mu kalakala mu mábhia mu ku langa o ibhaku, ki ngi kexile ni kithangana kiavulu phala kuzuela ni athu, mukonda ki kuexile athu avulu ku mábhia ku nga kexile mu kalakala. Maji mukonda dia milongi i nga tambuile mu iônge ia Jimbangi ja Jihova, nga di longo o kuzuela kiambote. O milongi íii ia ngi kuatekesa ku tula o njimbu iambote ia Utuminu ua Nzambi ku athu.—Matesu 6:9, 10; 24:14.

Mu mivu iavulu, nga uabhela o kikalakalu kia ku kala kafunga mu kilunga. Ujitu ua dikota phala eme ku bhanga kima phala ku kuatekesa o phange jami mu kilunga. Maji o dibesá dia dikota, o ku sidivila Jihova kumoxi ni kaza diami dia kazola ni an’etu.

Ngi sakidila Jihova mu ku ng’ehela—sumbala ki ngi di longo kiavulu mu xikola—ku di longa ia lungu ni muéne. (Izaia 54:13) Ngi xikina ué mu izuelu iala mu divulu dia Jisabhu 10:22, dizuela: ‘Dibesá dia Jihova—diene di muesa jimbongo.’ Eme ni muiji uami, tua mesena ku di longa dingi ia lungu ni Jihova ni ku mu sidivila katé ku hádia ni hádia.