A ngi vuala ku mbanza ia Mulhouse ku ixi ia França, ku maxokololo kuezalele ni usuéia uavulu. Mu undenge uami nga mono miji iavulu ku di kuata ni kudibeta. Ku muiji uetu o ahatu ka kexile mu a xila, o mala ué ka kexile mu kuívua o ibanzelu ia ahatu. A ngi longo kuila, o ahatu a a bhange ngó phala kulamba ni kulanga o muiji.

O undenge uami ua bhonzele kiavulu. Kioso ki nga kexile ni kuinhi dia mivu tat’etu uafu mukonda uexile hôlua. Mu kubhita mivu itanu, kota diami ua di jibha. Ku muvu uenhó, nga mono muthu a mu jibha kuala ndandu iê, mukonda dia kudibhakela phonzo, nga luualele kiavulu. O jindandu jami a ngi longo kukuata ji phoko, mauta ni kubhala, kioso ki moneka maka. Nga mateka kusema o mukutu uami ni kunuá.

Ki nga tenesa 16 kia mivu, ku kizuua nga kexile mu nua 10 mba 15 kia jisele ni kudita mu jidroga. Phala kusumba o jisele ni jidroga, nga kexile mu sumbisa imbamba ni kunhana. Ki nga bhange 17 ia mivu, a ngi tele kiá mu kaleia. A ngi fundisa 18 dia jiveji mukonda dia kunhana ni kubhanga usuéia.

Ku 20 a mivu, o ibhidi iami ia dibandekesa. Ku kizuua Nga kexile mu buakula 20 a ji phexi ja makanha. Mu ithangana iavulu hinu nga fú, mukonda dia kubuakula kiavulu. Nga mateka kusumbisa jidroga, mukonda dia kiki, mu kuenda nga kexile mu di bhakata ni ji phoko ni mauta. Saí kizuua nga lozo diiala, maji nga mu lueza! Kioso ki nga tenesa 24 kia mivu, mam’etu uafu, o njinda iami ia dibandekesa dingi. O athu akexile mu ngi lenga. Mukonda dia jinvunda, nga kexile mu bhita o mausukilu a semana mu kaleia mba mu inzo ia kusaka.

Ki nga tenesa 28 dia mivu, nga kazala. Maji ki ngi kexile mu xila muhatu’ami. Nga kexile mu mu xonguena ni ku mu beta. Ki tu kexile ni ukexilu ua kubhanga kumoxi o ima kála kia bhanga o makaza. Nga fikile kuila, o ku mu bhana o ima ia ulu i nga kexile mu nhana, kua sokele. Maji kua bhiti kima ki ngi ki fikilé. Muhatu’ami ua mateka kudilonga o Bibidia ni Jimbangi ja Jihova. Kioso kia dilongo mu veji ia dianga, o makanha ua a eha, ua kexile mu dituna o kitadi kiami kia uii, ua ngi vutuila o ima ioso ia ulu i nga mu bhanene. Njinda ia ngi kuata. Nga mateka ku mu fudisa kudilonga o Bibidia ni ku mu takula o dixi dia makanha u  nga kexile mu buakula ku pholo. Nga kexile ué mu mu xonguena bhu kaxi ka athu mu diembu.

Saí kizuua nga kodiuile, nga ximika túbhia m’onzo ietu. Muhatu’ami ua ngi bhulula, ua bhulula ué mon’etu ua kexile ni mivu itanu. Kioso o uhôlua ki ua ngi bhiti, nga divu kia iibha. Nga divuile kala Nzambi keji ngi loloka dingi. Nga lembalala o izuelu ia zuelele padele kuila, o athu a iibha a-nda jokota ku ifernu. O dotolo iami ua ngi’ambele: “Eie kuívué dingi! Ua-nda fua muene.”

Kioso kia jimi o túbhia, tuai m’onzo ia ukouami. Kioso o Jimbangi ja Jihova kiéza mu kunda muhatu’ami, nga a ebhuidisa, “O kuila Nzambi u tena kuloloka o ituxi iami ioso?” Ene a ngi londekesa mu Bibidia o divulu dia 1 Kolindo 6:9-11. O ji velusu jiji, ji jimbulula kiambote o ima ia iibhila Nzambi, maji ji zuela ué: “Enu amoxi-mu, kiene ki mua kexile.” O izuelu íii ia ngi londekesa kuila, ngi tena kulungulula o ukexilu uami. O Jimbangi ja Jihova a ngi tangela ué kuila Nzambi ua ngi zolo, ia a ngi londekesa o divulu dia 1 Nzuá 4:8. Nga divu kiambote, nga bhingi o Jimbangi ja Jihova phala ku ngi longa o Bibidia luiadi ku semana, nga mateka kuia mu kiônge kumoxi ni ene. Nga kexile mu samba kiavulu kua Jihova.

Mu mbeji imoxi ng’eha o jidroga ni uhôlua. Kuma o mukutu uejidile kiá, nga divu kia iibha! Nga tale hadi, mutué ua kexile mu ngi kata kiavulu, mukutu uami ua kexile mu teketa. Maji ku mbandu ia mukuá, nga divu kala Jihova ua kexile ku mbandu iami, iú ua kexile mu ngi kuatekesa. Nga divu kala kia divuile poxolo Phaulu. Mu kusoneka ia lungu ni kikuatekesu kia mu bhanene Nzambi, Phaulu uambe: “Ima ioso nga soko na-iu mua Kristu ió mukua ku ngi bhana o kutena.” (Filipe 4:13) Mu kubhita thembu, nga xisa ué o makanha.​—2 Kolindo 7:1.

O Bibidia ki i lungulula ngó o ukexilu uami, ua lungulula ué o muiji uami. Nga mateka kuxila muhatu’ami, nga mateka kubhinga “nga ku dióndo” ni “ku sakidila.” Nga mateka ué kulanga kiambote mon’ami. Kioso ki nga tenesa muvu umoxi ni kudilonga, nga kaiela o phangu ia muhatu’ami, nga dibhakula kua Jihova ia a ngi batizala.

Ng’ejiia kuila o itumu ia Bibidia ia bhulula o muenhu uami. Katé muene ni jindandu jami ki Jimbangi ja Jihova a xikina kuila, hinu nga fu mukonda dia ji droga mba jinvunda.

O itumu ia Bibidia ia lungulula o muenhu ua muiji uami, ia ngi jimbulula kiambote o kikalakalu kia diiala ni kia tata kubhata. (Efezo 5:25; 6:4) Tua mateka kubhanga kumoxi o ima. Lelu mu veji dia kumona muhatu’ami kala mubhika, ni kusanguluka kuoso ngene mu mu kuatekesa, phala kutena kukala muboki ua thembu ioso. Kuma ngi kafunga mu kilunga, muhatu’ami ua sanguluka kiavulu mu ku ngi kuatekesa mu kikalakalu kiki.

O henda ni mbote iene mu ngi bhangela Jihova ia lungulula o muenhu uami. Ngi sanguluka kiavulu mu kuzuela o ima íii ni athu edi kala a jimbidila kála ki nga kexile m’ukulu. Ng’ejiia kuila o Bibidia iala ni kutena kua kulungulula muthu uoso-uoso phala kukala ni muenhu ua zele ni kuzediua. O Bibidia ki i ngi longo ngó kuxila akuetu, mala ni ahatu maji ia ngi longo ué kubhana valolo ku muenhu uami.