Ku Akwa Loma 12:1-21
12 Phange jami, kuma Nzambi wa mi kwatela henda, nga mibhingi nga midyóndo, bhakulenu o mikutu yenu kala sata ikôla, yanda xikina Nzambi. Mu ku mubheza, mu bhezyenu ni kilunji kyoso.
2 Ki mwehele o mundu* yú ku mifunyisa, maji ehelenu Nzambi kulungulula o ilunji yenu, phala mu tongolole o vondadi ya Nzambi, yawabha, yatenena, i mu wabhela kyambote.
3 Kuma Nzambi wa ng’idikisa o ngalasa yê, ngi mitangela enu oso kuma ki mu xinganeke kwila mwala ni valolo yavulu. Maji xinganeke-nu mu ukexilu watokala, kala kyasoko o kixikanu kya mibhana* Nzambi.
4 Mukonda o mukutu wala ni idyandu yavulu, maji o ikalakalu ibhanga o idyandu, ki yene imoxi.
5 Kyene we kimoxi, sumbala twavulu, twala tu mukutu umoxi ngó mwa Kidistu. Maji kala o kidyandu kimoxi kyatokala ku mukutu, etu we twa ditokala mudyetu.
6 Etu enyoso bhukaxi ka ngalasa ya Nzambi, twala ni mauhete avulu kadifu. Mu kiki se twala ni uhete wa kutula o njimbu ya Nzambi, tu itule ni kixikanu ki twala nakyu.
7 Se twala ni uhete wa kukwatekesa, tukwatekese jinga. Se twala ni uhete wa kulonga, tulonge jinga.
8 Se uhete wetu wa kuswinisa,* tuswinise* jinga, se wa kubhana,* tubhane ni muxima woso. Woso wala ni ujitu wa kukala kupholo, a u bhange ni kuswina kwoso, woso ukwatela henda ku akwâ, abhange ni kusanguluka.
9 O henda yenu ikale ya kidi. Mu zembe o ima yayibha, mu di kwatenene ku ima yambote.
10 Dizodyenu mu dyenu kala mu jindandu. Dyangenu kuxila akwenu.
11 Kalakalenu ni kuswina, ki mukale mu imonya.* Ehelenu o nzumbi ikôla ku mibhangesa kufulujuka. Kalakalenu kala mu abhika a Jihova.
12 Kidyelelu kyenu ki mi sangulukise. Kolokotenu kyoso ki mu dibhana ni ibhidi. Kolokotenu mu kusamba.
13 Wanenu o ima i mwala na-yu ni jiphange jenu.* Mu zalela jinga akwenu.
14 Besowalenu yó a mi zukutisa, mu a besowala, kanenu kwa zwela kyayibha.
15 Sangulukenu kumoxi ni yó asanguluka. Dilenu kumoxi ni yó adila.
16 Xinganekenu akwenu kala ki mwene mu dixinganeka. Ki mu kale ni ukexilu wa kudizangeleka,* maji kalenu ni ukexilu wa kuditolesa. Ki mu dimone kwila, enu mwa betakota akwenu ndenge.
17 Kanenu kuvutwila athu oso phulu mu phulu. Sotenu kubhanga o ima yambote ku mesu a athu oso.
18 Bhangenu yoso i mwa tena, phala mu kale ku paze ni athu oso.
19 Jiphange jami ja kazola, kanenu kuvutwila phonzo, maji ehelenu Nzambi kubhanga kiki mu njinda yê. Mukonda o Mikanda Ikôla yambe: “Jihova wambe, ‘o phonzo ya ngi tokala eme, éme mwene nganda ivutwila.’”
20 Maji bhangenu kiki: “Se nguma yé wala ni nzala mu bhane kudya, se wala ni dinyota mubhane menya. Mu kubhanga kiki, eye wa mu mu tudila makala a wama kuthandu dya mútwe wê.”*
21 Kanenu kwehela o phulu ku mitolola, maji tololenu o phulu ni mbote.
Footnotes
^ Tala o Dilombolwelu.
^ Mba, “kya mi wanena.”
^ Mba, “wa kutendelesa.”
^ Mba, “tu tendelese.”
^ Mba, “wa kuwanena.”
^ Mba, “Ki mu kale mu imonya mu ikalakalu yenu.”
^ Mu Ngel.: “athu akôla.”
^ Mba, “ki mu xinganeke ima ya makota.”
^ Kiki kilombolola kutululukisa o muxima wa muthu ni kubhwisa o njinda yê.
