Kala Kyasoneka Nzwá 8:12-59
8 12 Jezú anga uzwela nawu dingi, wixi: “Eme ngi mukengeji wa mundu. Woso u ngi kayela, kanda kwendela mu kitombe, maji wanda kala ni mukengeji wa mwenyu.”
13 Jifalizewu a mwambela, exi: “Eye ubhana umbangi walungu n’eye mwene, o umbangi wé ki wa kidi.”
14 Jezú wa avutwila, wixi: “Né mwene se ngibhana umbangi walungu n’eme, o umbangi wami wa kidi, mukonda eme ngejiya kwebhi ku ngatundu, ni kwebhi ku ngandaya. Maji enu ki mwejiya kwebhi ku ngatundu, ni kwebhi ku ngandaya.
15 Enu mwene mufundisa bhukaxi ka ijila ya athu, maji eme ki ngene mufundisa muthu.
16 Né mwene se ngi fundisa, o kufundisa kwami kwa kidi, mukonda o Tata wa ngi tumikisa, wala kumoxi n’eme.
17 Mu Kijila kyenu asoneka-mu kwila, ‘o umbangi wa kiyadi kya athu, wa kidi.’
18 Eme mwéne ngibhana umbangi walungu n’eme, o Tata wa ngi tumikisa ubhana we umbangi walungu n’eme.”
19 Ene anga a mwibhwidisa: “Tat’é wala kwebhi?” Jezú wa atambwijila: “Enu ki mwa ngijiya, ki mwejiya we Tata yami. Se mwa ng’ijidile, mweji kwijiya we Tata yami.”
20 Mwene wambe o izwelu yiyi, kyoso kyakexile mulonga mu tembulu, kya zukamene bhu kididi bhwakexile o jingonga* ja kitadi. Maji sé-ku muthu wamukutu, mukonda o kithangana kyê kiluwa kibhixila.
21 Kyenyiki mwene wa atangela dingi, wixi: “Eme nga muyami, enu mwanda ngisota, maji mwanda fwila mu ituxi yenu. Mukonda ku ngamuya, enu kimutena kuya-ku.”
22 O Jijudé anga amateka kuzwela, exi: “O kwila mwene wanda dijibha? Mukonda wambe: ‘Kwoso ku ngamuya, enu ki mutena kuya-ku.’”
23 Mwene wambe dingi: “Enu mu akwa ngongo, eme ngi mukwa dyulu.* Enu mwatokala ku mundu yú, eme ki ngi tokala ku mundu yú.
24 Kyene ki nga mi tangela kwila: Mwanda fwila mu ituxi yenu. Mukonda se mu kamba ku ngixikina kwila eme ngi muthu akexile ku mukinga, mwanda fwila mu ituxi yenu.”
25 Ene a mwibhwidisa, exi: “Eye nanyi?” Jezú wa atambwijila: “Manyi se mukonda dyahi nga muzwela hanji ni enu!
26 Ngala ni ima yavulu yalungu ni enu phala kuzwela, ni ku mi fundisa. Yó wa ngi tumikisa mukwa kidi, o ima ingevu kwa mwene, ngi itangela o mundu.”
27 Ene katendela kwila, wakexile mwa tangela yalungu ni Tata.
28 Kyenyiki Jezú wa atangela, wixi: “Kyoso kimwanda zubha ku phaphela o Mon’a muthu ku taka*, kyene ki mwanda kwijiya kwila eme mwéne. Eme ki ngi bhange né ngó kima kimoxi mu vondadi yami, maji ngizwela yoso ya ngilongo Tata.
29 O Yó wa ngi tumikisa wala n’eme, mwene ka ngixisa ubheka, mukonda ngibhanga jinga o ima ya mu wabhela.”
30 Kyoso mwene kyazubha kuzwela o ima yiyi, athu avulu a muxikana.
31 Jezú anga wambela o Jijudé a muxikina, wixi: “Se mu kolokota mu maka mami, mwala mu maxibulu mami,
32 mwanda kwijiya o kidi, o kidi anga ki mibhana ufôlo.”
33 Ene a mu tambwijila, exi: “Tu an’a Mbalahamu, kiluwa tukala tu abhika a muthu. Kyebhi ki wamuzwela kwila, ‘enu mwanda kala ni ufôlo’?”
34 Jezú wa atambwijila, wixi: “Ngi myambela ni kidi kyoso kwila, woso uta jinga ituxi, mwene mubhika wa kituxi.
35 O mubhika kene mu nangenena mu inzo ya ngana yê, maji o mona unangenena katé ku hádya ni hádya.
36 Kyenyiki se o Mona u mi bhulula, mwanda kala ni ufôlo wa kidi.
37 Eme ngejiya kwila mu an’a Mbalahamu. Maji mwa musota ku ngi jibha mukonda ki muxikina o maka mami.
38 Eme ngi zwela o ima i ngamono kyoso ki ngakexile ni Tata yami, maji enu mubhanga o ima i mwevu kwa tata yenu.”
39 Ene a mu tambwijila, exi: “Tat’etu Mbalahamu.” Jezú wa atangela: “Se mwexile mu an’a Mbalahamu, mweji bhanga o ima kala kyabhangele Mbalahamu.
40 Maji enu mwamesena ku ngi jibha éme nga mi tangela o kidi ki ngevu kwa Nzambi. Mbalahamu kabhangele o ima yiyi.
41 Enu mwa mubhanga o ikalakalu ya tata yenu.” Ene anga a muvutwila, exi: “Etu ka tuvwala mu undumbu,* kana. Twala ngó ni Tata imoxi, mwéne Nzambi.”
42 Jezú wa a tangela: “Se Nzambi wexile Tata yenu, mweji ngi zola, mukonda nga tundu kwa Nzambi, eme bhabha. Ki ngeza mu vondadi yami, maji mwéne wa ngi tumikisa.
43 Mukonda dyahi ki mwatendela o ima i nga muzwela? Mukonda ki mwa mesena kwívwa o maka mami.
44 Enu mu an’a tat’enu, Dyabhu, mwa mesena kubhanga o vondadi ya tat’enu. Mwene kijibhangânga tundé ku dimatekenu, mu kidi ka nange-mu, mukonda mwene ki mukwa kidi. Kyoso kyatanga makutu, ubhanga kala o kifwa kyê, mukonda mwene mukwa makutu, o tata ya makutu.
45 Kuma nga mu mi tangela o kidi, enu ki mu ngi xikina.
46 Nanyi mudyenu utena ku ngitatela kwila, ngate kituxi? Se nga muzwela o kidi, mukonda dyahi ki mu ngi xikina?
47 Woso watokala kwa Nzambi, wívwa o maka ma Nzambi. Kyene ki mwa kambela o kwívwa, mukonda ki mwatokala kwa Nzambi.”
48 O Jijudé a muvutwila, exi: “Etu ki twazwela o kidi kyoso ki twambe kuma, ‘eye u mukwa Samadiya ni kwila, wala ni dimonyo’?”
49 Jezú wa atambwijila, wixi: “Eme ki ngala ni dimonyo, maji ngibhana kijingu kwa Tata yami, enu-phe ki mu ngibhana kijingu.
50 Eme ki nga musota o fuma yami, maji Nzambi mwéne wamesena kwila, a ngi fumanesa, Mwéne o mufundixi.
51 Ngi myambela ni kidi kyoso kwila, se muthu ubelesela o maka mami, mwene nuka wanda fwa.”
52 O Jijudé a muvutwila, exi: “Kindala, twejiya kyá kwila eye wala ni dimonyo. Mbalahamu ni jipolofeta afu, maji eye wa muzwela kwila, ‘se muthu ubelesela o maka mami, nuka wanda fwa.’
53 O kwila eye wa betakota o tat’etu Mbalahamu wafu, ndenge? O jipolofeta afu we. Wa mu fika kwila, eye nanyi?”
54 Jezú wa atambwijila, wixi: “Se ngi di jingisa, o kijingu kyami kikyala ni valolo. O Tata mwéne u ngi jingisa, yó mwa mutange kwila, Nzambi yenu.
55 Maji enu ki mwa mwijiya, eme-phe nga mwijiya. Se ngi zwela kwila ki nga mwijiya, ngeji kala ngi mukwa makutu kala enu. Eme nga mwijiya, anga ngi belesela o maka mê.
56 Tat’enu Mbalahamu wasangulukile kyavulu ni kidyelelu kya kumona o kizuwa kyami, mwene wa kimono yu wasangulukile.”
57 Anga o Jijudé a mu tambwijila: “Eye ki wala luwa ni makwinyi atanu a mivu, kyebhi ki wamwene kyá Mbalahamu?”
58 Jezú wa atangela, wixi: “Ngi myambela ni kidi kyoso kwila, ande dya Mbalahamu ku mu vwala, eme ngakexile kyá ku mwenyu.”
59 Kyenyiki, abongo matadi phala ku mutakula, maji Jezú wadisweka, anga utunda mu tembulu.
Footnotes
^ Mba, “itutu.”
^ Mu Ngel.: “bhulu.”
^ Tala o Dilombolwelu.
^ Mu Ngeleku, por·nei′a. Tala o Dilombolwelu.
