គម្ពីរបរិសុទ្ធពិតជាបណ្ដាំរបស់ព្រះដែលបានត្រូវសរសេរក្រោមការដឹកនាំរបស់លោក
គម្ពីរបរិសុទ្ធពិតជាបណ្ដាំរបស់ព្រះដែលបានត្រូវសរសេរក្រោមការដឹកនាំរបស់លោក
តើសាវ័កប៉ូលចង់មានន័យអ្វីពេលគាត់និយាយថាគម្ពីរបានត្រូវសរសេរ«ក្រោមការដឹកនាំរបស់ព្រះ»? (ធីម៉ូថេទី២ ៣:១៦) ប៉ូលចង់និយាយថា ព្រះប្រើសកម្មពលរបស់លោកដើម្បីដឹកនាំអ្នកសរសេរគម្ពីរឲ្យសរសេរអ្វីដែលលោកចង់ឲ្យពួកគេសរសេរប៉ុណ្ណោះ។
សាវ័កពេត្រុសបានពោលថា អ្នកសរសេរគម្ពីរទាំងនេះ«បាននិយាយអ្វីដែលមកពីព្រះ ដោយមានសកម្មពលបរិសុទ្ធដឹកនាំពួកគេ»។ (ពេត្រុសទី២ ១:២១) អាស្រ័យហេតុនេះ សាវ័កប៉ូលអាចពណ៌នាសៀវភៅទាំងអស់ក្នុងគម្ពីរថាជា «ឯកសារបរិសុទ្ធនានាដែលអាចធ្វើឲ្យ[លោក]អ្នកមានប្រាជ្ញាដើម្បីទទួលសេចក្ដីសង្គ្រោះ តាមរយៈជំនឿដែលទាក់ទងនឹងគ្រិស្តយេស៊ូ»។—ធីម៉ូថេទី២ ៣:១៥
មនុស្សជាច្រើនបដិសេធយ៉ាងខ្លាំងថាព្រះមិនមែនជាអ្នកនិពន្ធគម្ពីរឡើយ។ អ្នកបុរាណវត្ថុវិទ្យាឆាលម៉ាស្តុនបានពិពណ៌នាអំពីអ្នករិះគន់គម្ពីរថា ពួកគេ«ខ្វះការគោរពចំពោះអ្វីដែលគម្ពីរបានរៀបរាប់» ហេតុនេះបានជាពួកគេវាយប្រហារយ៉ាងខ្លាំងទៅលើភាពត្រឹមត្រូវនៃគម្ពីរ។ អ្នកខ្លះបានចាត់ទុកគម្ពីរថាជា«រឿងព្រេងនិទានដែលគេចងក្រងឡើង»ប៉ុណ្ណោះ។
ចូរពិចារណាពីទីសំអាង
តើយើងអាចទុកចិត្តលើគម្ពីរឬទេ? គឺសំខាន់ឲ្យលោកអ្នកសម្រេចចិត្តយ៉ាងត្រឹមត្រូវអំពីរឿងនេះ។ ហេតុអ្វី? ពីព្រោះបើគម្ពីរមានការណែនាំពីព្រះផ្ទាល់ នោះការមិនអើពើចំពោះគម្ពីរគឺជាការល្ងង់ខ្លៅ ឬអាចនាំឲ្យអន្តរាយ។ បើលោកអ្នកមានទស្សនៈថាគម្ពីរគ្រាន់តែជាសម្ដីរបស់មនុស្សជាជាងបណ្ដាំរបស់ព្រះ នោះលោកអ្នកមិនអាចឲ្យគម្ពីរមានឥទ្ធិពលខ្លាំងទៅលើការប្រព្រឹត្ត និងជំនឿរបស់លោកអ្នកទេ។—ថែស្សាឡូនិចទី១ ២:១៣
តើលោកអ្នកអាចសម្រេចចិត្តយ៉ាងដូចម្ដេចថាលោកអ្នកអាចទុកចិត្តលើគម្ពីរ? សូមគិតថា តើលោកអ្នកសម្រេចចិត្តយ៉ាងដូចម្ដេចថាទុកចិត្តឬមិនទុកចិត្តបុគ្គលណាម្នាក់ដែលលោកអ្នកជួប? គឺពិបាកណាស់ឲ្យលោកអ្នកពិតជាទុកចិត្តទៅលើបុគ្គលណាដែលលោកអ្នកមិនសូវស្គាល់ មែនទេ? លុះត្រាតែលោកអ្នកស្គាល់គេច្បាស់អស់មួយរយៈពេល ទើបដឹងថាគេពិតជាទៀងត្រង់និងគួរឲ្យទុកចិត្តបាន។ លោកអ្នកអាចស្គាល់គម្ពីរតាមរបៀបស្រដៀងគ្នាដែរ។ សូមកុំទទួលយកដោយឥតគិតពិចារណានូវទ្រឹស្តីដែលគេប៉ាន់ស្មានឬលម្អៀងដែលធ្វើឲ្យលែងមានទំនុកចិត្តលើគម្ពីរ។ សូមចំណាយពេលដើម្បីពិចារណាទីសំអាងដែលគាំទ្រការអះអាងនៃគម្ពីរដែលថាបានត្រូវសរសេរ«ក្រោមការដឹកនាំរបស់ព្រះ»។
ការវាយប្រហារពីអ្នកដែលអះអាងថាជាអ្នកគាំទ្រគម្ពីរ
អ្នកខ្លះដែលអះអាងថាជាអ្នកគាំទ្រគម្ពីរបានធ្វើឲ្យមានការសង្ស័យទៅលើភាពត្រឹមត្រូវនៃគម្ពីរ ហើយចោទថាគម្ពីរជាសៀវភៅដែលមិនអាចទុកចិត្តបានទេ។ កុំឲ្យអ្វីនេះធ្វើឲ្យលោកអ្នករសាយចិត្ត
ទាល់តែសោះ។ សៀវភៅមួយបានចែងថា សព្វថ្ងៃ ទោះជាអ្នកធ្វើអត្ថាធិប្បាយភាគច្រើនអំពីគម្ពីរអះអាងថាខ្លួនជាគ្រិស្តសាសនិកក៏ដោយ តែពួកគេ«និយាយអំពីបទគម្ពីរថាជាសំណេររបស់មនុស្សតែប៉ុណ្ណោះ» (New Dictionary of Theology)។សាសនវិទូជាច្រើនធ្វើឲ្យមានការសង្ស័យថាតើអ្នកណាជាអ្នកនិពន្ធគម្ពីរ។ ជាឧទាហរណ៍ អ្នកខ្លះនិយាយថាអេសាយដែលជាអ្នកប្រកាសទំនាយម្នាក់ មិនបានសរសេរសៀវភៅអេសាយឡើយ។ គេបានចោទថា សៀវភៅនេះបានត្រូវសរសេរយូរឆ្នាំក្រោយសម័យអេសាយ។ សៀវភៅមួយដែលធ្វើអត្ថាធិប្បាយអំពីគម្ពីរចែងថា សៀវភៅអេសាយជា«ស្នាដៃរបស់មនុស្សជាច្រើនដែលមកពីជំនាន់ផ្សេងៗ»។ (Concise Bible Commentary) ប៉ុន្តែ ការអះអាងនេះបំភ្លេចថា ម្ដងហើយម្ដងទៀតលោកយេស៊ូគ្រិស្តនិងអ្នកកាន់តាមលោកបានចាត់ទុកអេសាយថាជាអ្នកសរសេរសៀវភៅនោះ។—ម៉ាថាយ ៣:៣; ១៥:៧; លូកា ៤:១៧; យ៉ូហាន ១២:៣៨-៤១; រ៉ូម ៩:២៧, ២៩
អាក្រក់ជាងនេះទៅទៀត អ្នករិះគន់គម្ពីរដូចជាអ្នកធ្វើអត្ថាធិប្បាយឈ្មោះ យ៉ូន ឌុំមេឡូ បាននិយាយថា ទំនាយក្នុងសៀវភៅដានីយ៉ែល«តាមពិតជាព្រឹត្ដិការណ៍ជាប្រវត្ដិសាស្ត្រដែលបានកើតឡើងរួចទៅហើយ ដែលអ្នកសរសេរបានយកមកធ្វើជាទំនាយមួយ»។ ម្ដងទៀត ពេលនិយាយដូច្នេះ ពួកគេបំភ្លេចសក្ខីភាពដែលលោកយេស៊ូបានធ្វើដោយផ្ទាល់។ លោកយេស៊ូបានព្រមានអំពីអ្វីដែលលោកហៅថា«អ្វីដ៏គួរឲ្យស្អប់ខ្ពើមដែលបំផ្លិចបំផ្លាញ កំពុងឈរនៅកន្លែងបរិសុទ្ធ ដូចទំនាយដែលបានត្រូវប្រកាសតាមរយៈដានីយ៉ែល»។ (ម៉ាថាយ ២៤:១៥) តើសមហេតុផលឲ្យគ្រិស្តសាសនិកជឿថាលោកយេស៊ូគ្រិស្តចូលដៃបំភាន់គេ ហើយគាំទ្រការយកព្រឹត្ដិការណ៍ជាប្រវត្ដិសាស្ត្រមកក្លែងបន្លំជាទំនាយឬទេ? មិនមែនទាល់តែសោះ។
តើជាការសំខាន់ឬទេ?
អ្នកប្រហែលជាសួរថា‹បើដឹងថានរណាជាអ្នកសរសេរគម្ពីរ តើនេះពិតជាការសំខាន់មែនឬ?›។ នេះពិតជាសំខាន់មែន។ តើលោកអ្នកទុកចិត្តលើឯកសារមួយដែលអះអាងថាជាបណ្ដាំចុងក្រោយរបស់មិត្តភក្ដិម្នាក់ឬទេ បើនៅទីបំផុតគេដឹងថាគាត់មិនមែនជាអ្នកសរសេរឯកសារនោះ? ឧបមាថា អ្នកឯកទេសម្នាក់បានប្រាប់លោកអ្នកថាឯកសារនោះគឺក្លែងក្លាយទេ ហើយថាអ្នកឯទៀតដែលមានបំណងចិត្តល្អបានសរសេរអ្វីដែលពួកគេជឿថាជាឆន្ទៈរបស់មិត្តភក្ដិលោកអ្នក។ នេះធ្វើឲ្យឯកសារនោះលែងមានតម្លៃ មែនទេ? តើលោកអ្នកមានទំនុកចិត្តពិតប្រាកដថាអ្វីក្នុងឯកសារពិតជាឆន្ទៈរបស់មិត្តភក្ដិលោកអ្នកឬទេ?
ចំពោះគម្ពីរក៏ដូចគ្នាដែរ។ មិនមែនជាការចម្លែកទេ ដែលមនុស្សជាច្រើនសូម្បីតែអ្នកដែលអះអាងថាជាគ្រិស្តសាសនិកគិតថា ពួកគេមិនចាំបាច់យកចិត្តទុកដាក់ទេនឹងអ្វីដែលគម្ពីរចែងស្តីអំពីរឿងផ្សេងៗដូចជាភាពទៀងត្រង់ សីលធម៌ខាងផ្លូវភេទជាដើម។ តើប៉ុន្មានដងដែលលោកអ្នកឮមនុស្សនិយាយបន្តុះបង្អាប់ថា៖ «ប៉ុន្តែ នេះនៅក្នុងគម្ពីរសញ្ញាចាស់ទេ!» ហាក់ដូចជាអ្វីនោះមិនសូវមានតម្លៃឡើយ។ មនុស្សនៅតែមានទស្សនៈដូច្នេះ ទោះជាសាវ័កប៉ូលបានរៀបរាប់អំពីអ្វីដែលមនុស្សហៅថាជាសញ្ញាចាស់ជា«ឯកសារបរិសុទ្ធ»ដែលបានត្រូវសរសេរ«ក្រោមការដឹកនាំរបស់ព្រះ»ក៏ដោយ។
លោកអ្នកប្រហែលប្រកែកថា‹ប៉ុន្តែយើងមិនអាចមិនអើពើនឹងទីសំអាងដែលអ្នកឯកទេសនិងអ្នកប្រាជ្ញទាំងឡាយបានរកឃើញទេ›។ ត្រូវហើយ យើងមិនអាចធ្វើដូច្នេះឡើយ! ជាឧទាហរណ៍ យើងដឹងគុណចំពោះការស្រាវជ្រាវដ៏ស្មោះត្រង់ដែលបានជួយយើងឲ្យសម្គាល់ច្បាប់ដើមនៃគម្ពីរបរិសុទ្ធ។ ពិតមែនតែពាក្យខ្លះបានត្រូវចម្លងខុសបន្ដិចបន្តួចពីឯកសារដើម កាលដែលគេចម្លងម្ដងហើយម្ដងទៀតអស់រយៈពេលជាច្រើនសតវត្សរ៍មក។
ប៉ុន្តែ សូមចាំថាការទទួលស្គាល់ថាមានពាក្យខ្លះបានត្រូវចម្លងខុសបន្ដិចបន្តួចពីឯកសារដើម និងការចាត់ទុកគម្ពីរទាំងមូលជាអ្វីដែលមនុស្សក្លែងបន្លំ គឺខុសគ្នាឆ្ងាយណាស់។រក្សាជំនឿលើ«ឯកសារបរិសុទ្ធ»
មុនប៉ូលរៀបរាប់ថាគម្ពីរបានត្រូវសរសេរក្រោមការដឹកនាំរបស់ព្រះ គាត់បានប្រាប់ធីម៉ូថេអំពីមូលហេតុដែលចាំបាច់មានគម្ពីរ។ គាត់បាននិយាយថា៖ «គ្រាចុងក្រោយបង្អស់ . . . មនុស្សទុច្ចរិតព្រមទាំងជនបោកប្រាស់នឹងកាន់តែអាក្រក់ទៅៗ ដោយបំភាន់អ្នកឯទៀត ព្រមទាំងត្រូវគេបំភាន់ដែរ»។ (ធីម៉ូថេទី២ ៣:១, ១៣) នៅសម័យប៉ូល មានមនុស្សខ្លះដែលមើលទៅហាក់ដូចជា‹ពួកអ្នកប្រាជ្ញ និងអ្នកចេះដឹង› ហើយពួកគេបានប្រើ«ការវែកញែកដែលស្ដាប់ទៅដូចជាគួរឲ្យជឿ»ដើម្បីបោកបញ្ឆោតមនុស្ស និងដើម្បីធ្វើឲ្យជំនឿរបស់ពួកគេលើលោកយេស៊ូគ្រិស្តចុះខ្សោយ។ (កូរិនថូសទី១ ១:១៨, ១៩; កូឡុស ២:៤, ៨) ដើម្បីការពារកុំឲ្យមានឥទ្ធិពលពីពួកគេ សាវ័កប៉ូលបានដាស់តឿនធីម៉ូថេឲ្យ‹បន្តប្រព្រឹត្តតាមអ្វីៗដែលគាត់បានរៀនតាំងពីគាត់នៅជាទារកនៅឡើយ តាមរយៈឯកសារបរិសុទ្ធនានា›ដែលព្រះផ្ដល់ឲ្យ។—ធីម៉ូថេទី២ ៣:១៤, ១៥
ជាការសំខាន់ឲ្យលោកអ្នកធ្វើដូច្នោះដែរក្នុងអំឡុង«គ្រាចុងក្រោយបង្អស់»។ សូមកុំមើលស្រាលនូវគ្រោះថ្នាក់ដែលមកពីការបោកបញ្ឆោតរបស់មនុស្សឆ្លាតដែលច្រើនតែប្រើ«ការវែកញែកដែលស្ដាប់ទៅដូចជាគួរឲ្យជឿ»។ ផ្ទុយទៅវិញ ដូចគ្រិស្តសាសនិកនៅសតវត្សរ៍ទី១ សូមការពារខ្លួនដោយទុកចិត្តទាំងស្រុងលើអ្វីដែលលោកអ្នករៀនពីគម្ពីរដែលពិតជាបណ្ដាំរបស់ព្រះដែលបានត្រូវសរសេរក្រោមការដឹកនាំរបស់លោក។
សាក្សីព្រះយេហូវ៉ានឹងសប្បាយចិត្តជួយលោកអ្នកឲ្យមានជំនឿកាន់តែខ្លាំងលើគម្ពីរបរិសុទ្ធ។ ជាឧទាហរណ៍ ពួកគេអាចបង្ហាញលោកអ្នកនូវរបៀបដែលគោលការណ៍គម្ពីរបានសឲ្យឃើញថាគួរឲ្យទុកចិត្តមែនក្នុងអំឡុងប្រវត្ដិសាស្ត្រ ហើយបង្ហាញថាគម្ពីរគឺសមស្របតាមវិទ្យាសាស្ត្រកាលណានិយាយអំពីរឿងដែលទាក់ទងនឹងវិទ្យាសាស្ត្រ គម្ពីរមានសេចក្ដីបង្រៀនដែលស៊ីគ្នាតាំងពីដើមដល់ចុង មានទំនាយដែលបានសម្រេចរាល់ដង និងអ្វីៗជាច្រើនទៀត។ យើងសូមអញ្ជើញលោកអ្នកទាក់ទងសាក្សីព្រះយេហូវ៉ាដើម្បីទទួលព័ត៌មានបន្ថែមដែលបានជួយមនុស្សរាប់លាននាក់ដែលមានចិត្តស្មោះឲ្យឃើញថា គម្ពីរពិតជាបណ្ដាំរបស់ព្រះមែន។
[ឃ្លាអក្សរធំនៅទំព័រ៥]
តើលោកអ្នកសម្រេចចិត្តយ៉ាងដូចម្ដេចថាទុកចិត្តឬមិនទុកចិត្តបុគ្គលណាម្នាក់ដែលលោកអ្នកជួប?
[ឃ្លាអក្សរធំនៅទំព័រ៦]
យើងដឹងគុណចំពោះការស្រាវជ្រាវដ៏ស្មោះត្រង់ដែលបានជួយបញ្ជាក់ច្បាប់ដើមនៃគម្ពីរបរិសុទ្ធ