Upperisarsiornerit tamarmik Guutimut qaninnerulersitsippat?
Akissut Biibilimeersoq
Naamik, upperisarsiornerit tamakkerlutik Guutimut qaninnerulersitsinngillat. Upperisarsiornernik Guutip iluarinngisaanik Biibilimi assersuutissarpassuaqarpoq. Upperisarsiornerit Guutip iluarinngisai marlunnut immikkoortinneqarsinnaapput.
1: Guutipilussiorneq
Guutipilussiornerit ‘suussuseqanngitsutut’ ‘iluaqutaassuseqanngitsutullu’ Biibilimi allaatigineqarput. (Jeremia 10:3-5; 16:19, 20) Jehovap a Guutip itsaq inuiaat Israalikkut ima naalakkerpai: “Allanik guuteqassanngilatit uangaanngitsunik.” (Mosesimik 2. 20:3, 23; 23:24) Israalikkut guutit allat pallorfigileraangatigit Jehova kamangaalertarpoq. – Mosesimik 4. 25:3; Mosesimik 3. 20:2; Eqqartuussisut 2:13, 14.
Guutip ‘guutinik’ taaneqartunik pallorfiginninnermut isiginnittaasia ullumikkut suli taamaappoq. (Korintimiunut 1. 8:5, 6; Galaatiamiut 4:8) Imminik pallorfiginnikkumasut peqquai upperisarsiornerit eqqunngitsut qimaqqullugit, ima oqarami: “Akorngannit anigitsi qimallugillu.” (Korintimiunut 2. 6:14-17) Upperisarsiornerit tamarmik Guutimut qaninnerulersitsippata taama peqqusisimassagaluarpa?
2: Guutip ilumoortup iluarinngisaanik guutisiorneq
Ilaannikkut Israalikkut Guutimik ilumoortumik guutisiornerminni guutipilussiortut upperisaat ileqqulersuutaallu ilaarlugit guutisiorniartarput. Jehovalli upperisarsiorneq eqqortoq eqqunngitsumik akooqqunngilluinnarpaa. (Mosesimik 2. 32:8; Mosesimik 5. 12:2-4) Jiisusip nalimini upperisarsiortut siuttuisa guutisioriaasiat avoqqaaraa. Upperluartoorpasikkaluarlutik ilumoorusserpasikkaluarlutillu ‘Moorsisip inatsisaani pingaarnerusut – tassa naapertuilluarneq, nallittuineq aalajaannerlu – soqutiginngilaat’. – Matiusi 23:23.
Ullumikkuttaaq upperisarsiorneq ilumoortumik tunngavilik kisimi Guutimut qaninnerulersitsivoq. Ilumoortorlu Biibilimi nassaassaavoq. (Johannesi 4:24; 17:17; Timuutiusimut 2. 3:16, 17) Upperisarsiornerit Biibilimut akerliusumik ilinniartitsisut inuit Guutimit avinngarutitittarpaat. Ilinniartitsissutigineqartorpassuit inuit Biibilimeersuusorisaat – ilaatigut ataasiullunilu pingasuussuseq, tarneq toqusuitsoq naassaanngitsumillu anniartitaaneq – upperisarsiornernit eqqunngitsunit aallaaveqarput. Taakkuninnga ilinniartitsisut Guutip inassutaanik aalajangiusimanninnatik inuit ileqqutoqaannik aalajangiusimannikkamik guutisiornerat asuliinnaavoq iluaqutaananilu. – Makkorsi 7:7, 8.
Upperisarsiornikkut ilumoortuusaarneq Guutip maajugaa. (Tittusi 1:16) Upperisarsiorneq Guutimut qaninnerulersitsissaguni ileqqulersuutinik kingornussarsianillu tunngaveqaannartussaanngilaq, inuilli ulluinnarni inuunerannut sunniuteqartariaqarpoq. Assersuutigalugu Biibilimi allassimavoq: “Upperisarsiortuusorisoq oqqaminik aqutsisinnaanngitsoq imminut salloqittarpoq, Guutisiorneralu asuliinnaavoq. Upperisarsioriaasermi Guutitta Ataatattalu minguitsutut mingutsinneqarsimanngitsutullu isigisaa tassaavoq: Iliarsunnik uillarnernillu annikilliortunik isumassuineq inuillu ajortut inooriaasiannit mingutsinneqannginneq.” (Jaaku 1:26, 27; quppernerup ataani ilanngussat) Ilumoorluni guutisiorneq tamanna Biibilimi dronningimit Margrethe aappaannit atortussanngortitami ‘guutisiornertut minguitsutut piviusutullu’ taaneqarpoq.
a Biibili naapertorlugu Guuti ilumoortoq Jehovamik ateqarpoq.