NAJOQQUTASSIATOQQAT NALITSINNI ATORIAANNAASUT
Isumakkeerfigeqatigiittaritsi
NAJOQQUTASSIAQ BIIBILIMEERSOQ: “[Isumakkeerfigeqatigiittaritsi] arlassinnut assuarliutissaqaraangassi. Soorlu Naalakkap isumakkeerfigigaasi taamatuttaaq ilissi iliussaasi.” – Kolossemiut 3:13.
Tamanna qanoq paasisariaqarpa? Biibilimi ajortuliorneq akiitsunut assersuunneqarpoq isumakkeerfiginninnerlu akiitsunik isumakkiinermut assersuunneqarluni. (Lukasi 11:4) Ujarlerfissiat ilaanni allassimavoq grækerit oqaasiat Biibilimi “isumakkeerfiginninnermik” nutserneqartartoq “akileeqqusinnginnikkut akiitsumik isumakkiinertut” paasisariaqartoq. Taamaattumik uagutsinnik ajuallatsitsisoq isumakkeerfigigaangatsigu taassuma iliuuseqarnerunissaa naatsorsuutigineq ajorparput. Isumakkeerfiginnikkusunnerput ajortumik pissusilersortoqarneranik akuerinninnertut ajuallatsinneqarnitsinnilluunniit suusupaginninnertut paasisariaqanngilaq. ‘Assuarliutissaqarnissamut’ allaat immaqa pissutissaqaraluarluta narrujuumminiarnata aalajangertarpugut.
Ullumikkut maleruarneqarsinnaava? Naammalluinnanngitsuugatta tamatta ajortuliortarpugut. (Romamiut 3:23) Taamaattumik isumakkeerfiginnikkumasuunerput kingusinnerusukkut isumakkeerfigineqartariaqalerutta iluaqutigisinnaavarput. Isumakkeerfiginninniarluta aalajangernerput aamma nammineq iluaqutigisarparput. Qanoq?
Kamassimajuarnerput narrujuummisimajuarnerpullu – aamma isumakkeerfiginnikkumannginnerput – ajoqutigisarparput. Taamatut nikallornartumik misiginerput nuannaarunnaassutigisinnaallugulu nanertisimassutigilersinnaavarput. Aamma peqqissutitsinnut ajoqutaasinnaavoq. Nakorsaq Yoichi Chida aamma tarnip pissusii pillugit ilisimatusarnermi professori Andrew Steptoe Journal of the American College of Cardiology-mi nalunaarusiaminni ima inerniliipput: “Qanittukkut misissuinerit ersersippaat kamaqqaneq akeqqersimaarnerlu uummatip taqarsuisigut nappaateqalersitsisinnaasut.”
Isumakkeerfiginninnerulli iluaqutissartai nuannersut eqqarsaatigikkit. Allanik isumakkeerfiginnittarnerput ataasiussutsimik eqqisseqatigiinnermillu attassiinnarnissamut allanullu attaveqarluarnermut iluaqutaasarpoq. Pingaarnertut Guuti, ajortuliortunik peqqissimisunik isumakkeerfiginnittartoq uatsinnillu taamaalioqqusisoq, ilaartarparput. – Markusi 11:25; Efesosimiut 4:32; 5:1.